کوئٹہ: کوئٹہ کے علاقے ہزار گنجی میں ایف سی کی گاڑی پر حملے کے بعد دو مشتبہ افراد کو گرفتار کر لیا گیا۔
تفصیلات کے مطابق کوئٹہ سے چودہ کلو میٹر کے فاصلے پر ہزار گنجی کے علاقے کے قریب سبزی منڈی میں دھماکے کیا گیا۔ دھماکے کی اطلاع کے بعد پولیس اور ریسکیو ذرائع موقع پر روانہ کر دیئے گئے۔ ذرائع کے مطابق دھماکے بعد سیکیورٹی فورسز نے علا قے کو گھیرے میں لے لیا۔
ابتدائی رپورٹس کے مطابق دھماکہ میں کسی بھی قسم کے جانی نقصان کی اطلاع نہیں ملی ہے تاہم بم ڈسپوزل اسکورڈ کو موقع پر طلب کر لیا گیا تاکہ دھماکے کی نوعیت کے بارے میں معلوم کیا جاسکے۔
پولیس کے مطابق دھماکے بہت شدید تھا تاہم اس کی نوعیت کے بارے میں کچھ بھی کہنا قبل از وقت ہوگا۔
دوسری جانب ایف سی کے ترجمان کے مطابق دھماکے کے بعد سرچ آپریشن کے دوران دو مشتبہ افراد کو گرفتار کر کے تفتیش کے لئے نامعلوم مقام پر منتقل کردیا گیاہے۔ ایف سی کے ترجمان کے مطابق بم حملہ ایف سی کی پیٹرولنگ ٹیم پر کیا گیا تھا۔
