ریاض : سعودی حکومت کی جانب سے جنگلی حیات کے تحفظ اور ان کی افزائش نسل کیلئے نایاب جانوروں کو ایک محفوظ جنگل میں چھوڑ دیا گیا تاکہ ان کی نسل کو معدوم ہونے سے بچایا جاسکے۔
اس حوالے سے ذرائع کا کہنا ہے کہ سعودی العلا رائل اتھارٹی اور فروغ جنگلی حیاتیات کے قومی مرکز نے العلا کے محفوظ قومی جنگل شرعان میں متعدد نایاب جانور چھوڑ دیے ہیں۔
سعودی ذرائع ابلاغ کے مطابق نایاب جانوروں کے تحفظ اور افزائش پروگرام کے تحت 25 جنگلی پہاڑے، الریم نسل کے 50 ہرن، عام 20 ہرن، الوضیحی نسل کے 10عرب نژاد ہرن جنگل میں آزاد چھوڑدیے گئے ہیں۔
نایاب جانوروں کی نسل کو فروغ دینے کے اس پروگرام میں العلا کے شہریوں، نجی تنظیموں کے نمائندوں اور کئی عہدیداروں میں تعاون کیا ہے۔
یہ اقدام اس لیے کیا گیا ہے کہ ماضی قدیم میں یہاں یہ جانور اچھی خاصی تعداد میں پائے جاتے تھے تاہم اب وقت کے ساتھ ساتھ ان کے وجود کو خطرہ لاحق ہوگیا ہے۔
سینٹر کے ایگزیکٹیو چیئرمین محمد قربان نے بتایا کہ متعلقہ اداروں کے تعاون اور اشتراک سے اس طرح کے اور بھی مزید جانور جلد ہی جنگل میں چھوڑے جائیں گے۔
