لندن : شاہی خاندان میں تنازعات کی خبریں برطانیہ میڈیا میں زیر گردش ہیں تاہم رائل فیملی نے اس حوالے سے اب تک باقاعدہ کوئی تصدیق یا تردید نہیں کی ہے۔

شہزادہ ہیری اور میگھن مارکل کی زندگی پر لکھی گئی کتاب میں انکشاف کیا گیا ہے کہ برطانیہ کے شاہی خاندان میں بھی عام گھرانوں جیسے جھگڑے ہیں۔

برطانیہ چھوڑنے کے باوجود ان کے شہزادہ ولیم اور شہزادی کیٹ مڈلٹن کے ساتھ تعلقات سے متعلق مختلف خبروں کا سلسلہ رک نہیں سکا۔

فائنڈنگ فریڈم نامی کتاب پبلش ہوتے ہی شاہی خاندان میں ایک بار پھر کشمکش شروع ہوگئی ہے۔ کتاب میں شہزادہ ولیم اور شہزادی کیٹ مڈلٹن پر الزامات کی بوچھاڑ کی گئی ہے۔

مصنف نے دعویٰ کیا گیا ہے کہ شہزادی کیٹ مڈلٹن میگھن مارکل کو پسند نہیں کرتی تھیں اور دونوں کے درمیان ہمیشہ ان بن رہی۔ یہ دعویٰ بھی کیا گیا ہے کہ میگھن مارکل کو شاہی خاندان میں الوداعی پارٹی کے دوران کیٹ مڈلٹن نے ڈانٹا تھا۔

کتاب میں یہ دعویٰ بھی کیا گیا ہے کہ شہزادی کیٹ مڈلٹن، میگھن مارکل کو پسند نہیں کرتی تھیں اور ان سے کم گفتگو کرتی تھیں۔ کیٹ مڈلٹن نے تمام الزامات مسترد کر دیے ہیں جب کہ ہیری اور میگھن مارکل نے بھی کتاب کے لیے انٹرویو دینے کی تردید کی ہے۔

دوسری جانب کیٹ اور ولیم کے دوستوں کا کہنا ہے کہ شاہی جوڑے نے میگھن مارکل کو شاہی خاندان میں کھلے دل سے خوش آمدید کہا تھا ۔اس کتاب کی اشاعت سے شہزادہ ولیم کی دل آزاری ہوئی ہے۔

برطانوی شہزادی کا کہنا ہے کہ میگھن مارگل کو شاہی خاندان میں قبول نہ کرنے کا الزام غلط ہے۔ میگھن کا کھلے دل کے ساتھ شاہی خاندان میں استقبال کیا گیا تھا۔ شاہی خاندان کا کہنا ہے کہ کتاب محض مصنف کے ذاتی تجربات کی بنیاد پر لکھی گئی ہے۔

فائنڈنگ فریڈم نامی کتاب میں کتنا سچ ہے اور کتنا جھوٹ اس کا صحیح اندازہ تو آنے والے وقت میں ہوگا لیکن آج سے تین ماہ قبل شاہی خاندان سے الگ ہونے والی میگھن مارکل نے علیحدگی کا ذمہ دار شاہی خاندان کے رویئے کو قرار دیا تھا۔

برطانوی میڈیا کی رپورٹ کے مطابق میگھن مارکل نے اپنی دوست کو بتایا کہ انہیں کیٹ مڈلٹن کے مقابلے میں تعصب کا سامنا کرنا پڑا۔

بقول میگھن شاہی خاندان میں کیٹ کو زیادہ اہمیت حاصل تھی۔ شہزادہ ہیری کی اہلیہ کے مطابق میڈیا نے انہیں تنقید کا نشانہ بنایا لیکن شاہی خاندان خاموش رہا۔ میگھن نے کہا اگر کیٹ مڈلٹن کے ساتھ ایسا ہوتا تو میڈیا قوانین ہی بدل دیئے جاتے۔

ماضی میں ہونے والے چند واقعات بھی اس بات کے شاہد ہیں کہ شہزادہ ہیری اور ان اہلیہ شاہی خاندان میں خوش نہیں تھے۔

اکتوبر2019 میں ڈیلی میل اخبار نے میگھن کا ایک خط شائع کردیا تھا جو انہوں نے اپنے والد کو لکھا۔ میگھن مارکل نے اس حرکت پر ڈیلی میل کیخلاف قانونی کارروائی کی تھی۔

شہزادہ ہیری نے اس رویے کا موازنہ اپنی والدہ شہزادی ڈیانا کے ساتھ روا رکھے گئے رویے سے کرتے ہوئے کہا تھا کہ تاریخ اپنے آپ کو دہرا رہی ہے، جس بات پر انہیں انتہائی افسوس ہے۔

ان کا کہنا تھا کہ ایک وقت آتا ہے جب آپ ایسے رویے کے خلاف اٹھ کھڑے ہوتے ہیں۔ اسے عام الفاظ میں ہراساں کرنا کہتے ہیں، جو لوگوں کی خاموشی سے ناجائز فائدہ اٹھانے کا نام ہے۔ اس قسم کا رویہ ہر سطح پر ناقابل قبول ہے۔ ہم اسے برداشت نہیں کریں گے۔

تجزیہ نگاروں نے شاہی خاندان کی حالیہ صورتحال پر تبصرہ کرتے ہوئے یہ بھی کہا کہ اس طرح کی باتیں پہلے کبھی باہر نہیں آئیں اور اگر کبھی کوئی غلط خبر آئی بھی تو اُس کی فوری تردید کی گئی۔

یاد رہے کہ رواں برس19 مئی کو برطانوی شاہی خاندان کے چھوٹے شہزادے ہیری اور امریکی اداکارہ میگھن مرکل رشتہ ازدواج میں منسلک ہوئے تھے، اس شادی کو سال کی سب سے بڑی شادی قرار دیا گیا تھا۔