Tag: Budget 2025-26

اسلام آباد: پاکستان پیپلز پارٹی نے وفاقی بجٹ 26-2025 کو ووٹ دینے سے متعلق حتمی فیصلہ کر لیا۔

چیئرمین بلاول بھٹو زرداری کی زیرِ صدارت پاکستان پیپلز پارٹی کی پارلیمانی پارٹی کا اجلاس ہوا جس میں خورشید شاہ، نوید قمر، راجہ پرویز اشرف، آغا رفیع اللہ، ڈاکٹر مہرین رزاق بھٹو اور ناز بلوچ نے شرکت کی۔

پارلیمانی پارٹی کے اجلاس میں وفاقی بجٹ 26-2025 کو ووٹ دینے کی منظوری دی گئی۔ اجلاس ختم ہونے کے بعد بلاول بھٹو زرداری اور آصفہ بھٹو پارلیمنٹ ہاؤس پہنچ گئے۔

یہ بھی پڑھیں: قومی اسمبلی آج وفاقی بجٹ کی منظوری دے گی

چند روز قبل ذرائع نے اے آر وائی نیوز کو بتایا تھا کہ پاکستان پیپلز پارٹی نے وفاقی بجٹ کو ووٹ دینے کا فیصلہ کر لیا ہے، اتحادی جماعت نے حکومت کو ووٹ کے فیصلے سے باضابطہ آگاہ کر دیا۔

حکومت نے بجٹ پر پیپلز پارٹی کے اکثر مطالبات تسلیم کر لیے، اس سلسلے میں بلاول بھٹو کو بجٹ پر حکومت سے مذاکرات پر بریفنگ دی گئی۔ چیئرمین پی پی نے حکومت سے مذاکرات کرنے والی ٹیم کو شاباش دی۔

ذرائع نے بتایا کہ بلاول بھٹو کی بجٹ تقریر کے نکات کو حتمی شکل دے دی گئی، وہ آج قومی اسمبلی میں بجٹ اجلاس سے خطاب کریں گے، بجٹ تقریر آدھے گھنٹے سے زائد دورانیہ کی ہوگی، تقریر میں بلاول دورہ امریکا، برطانیہ، یورپ کا ذکر کریں گے۔

ذرائع کے مطابق بلاول بھٹو بجٹ نکات پر اپنی جماعت کا مؤقف پیش کریں گے، سندھ سیلاب متاثرین کی بحالی کے اقدامات کا ذکر کریں گے، اور صوبہ سندھ کے بجٹ کے اہم نکات پر روشنی ڈالیں گے، بلاول بھٹو ملک کو درپیش چیلنجز کا مل کر مقابلہ کرنے کی بات بھی کریں گے، پی پی چیئرمین اپنی بجٹ تقریر میں سیاسی مفاہمت پر زور دیں گے۔

ذرائع کا کہنا تھا کہ پیپلز پارٹی ملازمین کی کم از کم تنخواہ کی حد اور پنشن بڑھانے کے مطالبے سے دست بردار ہو گئی ہے، پی پی سرکاری ملازم کی بیوہ کو تا عمر پنشن ادائیگی کے مطالبے سے بھی دست بردار ہو گئی ہے، حکومت نے پیپلز پارٹی کی بعض تجاویز ماننے سے انکار کر دیا تھا۔

وفاقی حکومت نے بجٹ پر پیپلزپارٹی کے اعتراضاف دور کردیے جس کے بعد معاہدہ طے پاگیا ہے۔

اے آر وائی نیوز کے مطابق ذرائع کا بتانا ہے کہ وفاقی حکومت نے یونیورسٹیز کے لیے 4.6 ارب روپے کی گرانٹ بحال کرنے پر اتفاق کرلیا ہے۔

معاہدے سے متعلق چیئرمین پیپلزپارٹی بلاول بھٹو کو آگاہ کردیا گیا ہے۔

ذرائع کا بتانا ہے کہ حکومت سولر پینلز پر مجوزہ ٹیکس 18 فیصد سے کم کرکے 10 فیصد کرنے پر آمادہ ہوگئی ہے۔

اس کے علاوہ سندھ میں وفاقی اسکیمز بھی سندھ حکومت کے حوالے کی جائیں گی۔

حکومت نے سکھر حیدرآباد موٹروے سے متعلق پیپلزپارٹی کو یقین دہانی کروائی ہے کہ اسلامک ڈیولپمنٹ بینک کے ذریعے قرضہ لیا جائے گا جس سے موٹروے کا کام شروع کیا جائے گا اور آئندہ دو سے تین سال میں یہ منصوبہ مکمل کیا جائے گا۔

پیپلزپارٹی کی جانب سے وفاقی حکومت کو بجٹ میں ووٹ نہ دینے کا اعلان کیا گیا تھا جس کے بعد حکومت نے معاہدہ کیا ہے۔

واضح رہے کہ پاکستان تحریک انصاف نے مالی سال 2025-26 کے وفاقی بجٹ کی منظوری روکنے کی حکمت عملی کے تحت پیپلز پارٹی کو بجٹ ووٹنگ میں حصہ نہ لینے کی باضابطہ پیشکش کی تھی۔

بلوچستان کے بجٹ میں سرکاری ملازمین کی تنخواہوں میں 10 فیصد اور ریٹائرڈ ملازمین کی پنشن میں 7 فیصد اضافہ کردیا گیا۔

وزیر خزانہ بلوچستان شعیب نوشیروانی نے بجٹ تقریر کے دوران کہا کہ اہل صوبائی ملازمین کو گریڈ 1 سے 16 تک ڈسپیریاٹی ریڈکشن الاؤنس 20 کرنے کی تجویز ہے، پنشن فنڈز کے لیے ایک ارب روپے اور ہیلتھ کارڈ کے لیے 4 ارب 50 کروڑ روپے مختص کیے گئے ہیں۔

بجٹ دستاویز کے مطابق غیرترقیاتی اخراجات کا تخمینہ 640 ارب روپے لگایا گیا ہے، بلوچستان کے اپنے وسائل سے ترقیاتی اخراجات کے لیے 249 ارب روپے مختص کیے گئے ہیں، وفاقی ترقیاتی منصوبوں کے لیے 66.5 ارب اور غیرملکی امداد سے 30 ارب دستیاب ہوں گے۔

پبلک ہیلتھ انجینئرنگ کے محکمے کا غیر ترقیاتی بجٹ 11 ارب 20 کروڑ روپے مختص کیا گیا ہے، محکمہ ماہی گیری و ساحلی ترقی کے غیر ترقیاتی بجٹ کا تخمینہ 2 ارب 19 کروڑ روپے مختص کیا گیا۔ محکمہ کھیل و امور نوجوانان کے غیرترقیاتی بجٹ کا تخمینہ 2 ارب 44 کروڑ روپے ہے۔

وفاقی محاصل سے آمدن کا تخمینہ 801 ارب روپے، صبوائی محصولات سے 101 ارب روپے ہے، دستاویز کے مطابق سوئی گیس لیز توسیع بونس سے 24 ارب آمدن متوقع ہے، کل آمدن 1020 ارب اور کل اخراجات 986 ارب ہیں جبکہ 34 ارب روپے کی بجت متوقع ہے۔

محکمہ مواصلات و تعمیرات ترقیاتی بجٹ میں سرفہرست ہیں جن کا تخمینہ 55.21 ارب روپے ہے، محکمہ ایریگیشن کے لیے 42.78 ارب روپے، اسکول ایجوکیشن کے لیے 19.85 ارب روپے مختص کیے گئے ہیں۔

صحت کے لیے 16.15 ارب، بلدیات کے لیے 12.91 ارب جبکہ زراعت کے لیے 10.17 ارب روپے مختص کیے گئے ہیں، توانائی کے لیے 7.84 ارب، ہائر ایجوکیشن 4.99 ارب، معدنیات 56 کروڑ 76 لاکھ روپے رکھے گئے ہیں۔

سائنس و آئی ٹی کے لیے 12.66 ارب، پبلک ہیلتھ انجینئرنگ 17.16 ارب روپے، ترقی نسواں کے محکمہ کے ترقیاتی منصوبوں کے لیے 15 کروڑ 40 لاکھ روپے مختص کیے گئے ہیں، محکمہ ٹرانسپورٹ کے غیر ترقیاتی اخراجات کا تخمینہ 46 کروڑ 35 لاکھ روپے ہے۔

اسلام آباد: پاکستان پیپلز پارٹی نے وفاقی حکومت سے سولر پینل پر ٹیکس ختم کرنے اور اس تجویز کو فوری طور پر واپس لینے کا مطالبہ کر دیا۔

قومی اسمبلی میں بجٹ بحث کیلیے منعقدہ اجلاس کے دوران پیپلز پارٹی کی رکن شازیہ مری نے کہا کہ سندھ حکومت نے اپنے بجٹ میں غریب لوگوں کیلیے سولر پینل کی رقم رکھی ہے لیکن وفاقی حکومت نے اس پر ٹیکس لگا دیا جس کا اثر سندھ حکومت پر بھی پڑے گا۔

شازیہ مری نے مطالبہ کیا کہ سولر پینل پر ٹیکس ختم کیا جائے اور اس تجویز کو واپس لیا جائے۔ انہوں نے کہا کہ ای کامرس کے ساتھ زیادتی کی جا رہی ہے۔

یہ بھی پڑھیں: سولر پینل پر ٹیکس لگانا ظلم ہے، پیپلز پارٹی

انہوں نے کہا کہ وفاق نے سندھ کو کالونی سمجھ رکھا ہے، پی ڈبلیو ڈی کے منصوبے پنجاب، بلوچستان اور خیبر پختونخوا حکومت کو دے دیے گئے لیکن سندھ حکومت کو ٹرانسفر کیوں نہیں کیے گئے؟ کیا وفاقی حکومت اب صوبائی حکومت کے اختیارات استعمال کرے گی؟ کراچی کسی کے باپ کا نہیں سندھ کا ہے اور سندھ کا رہے گا۔

خطاب کے دوران متحدہ قومی موومنٹ (ایم کیو ایم) پاکستان کے اراکین قومی اسمبلی نے احتجاج تو شازیہ مری نے ان کو مخاطب کرتے ہوئے پوچھا کہ آپ نے سندھ کو اپنی کالونی سمجھا ہے؟ آپ کا جب دل کرتا ہے سندھ کے ساتھ زیادتی کرتے ہیں، سندھ کے ساتھ ناانصافی کی جا رہی ہے۔

ایم کیو ایم اراکین نے اپنی نشستوں پر کھڑے ہو کر احتجاج کیا، حکومتی اتحادی پیپلز پارٹی اور ایم کیو ایم ایک دوسرے کے آمنے سامنے آئے، ایم کیو ایم اراکین نے ایوان میں نعرے بازی کی تو ڈپٹی اسپیکر ان کو اپنی نشستوں پر بیٹھنے کی ہدایت کی۔

اراکین نے کہا کہ شازیہ مری سندھ کے ساتھ کراچی کی بھی بات کریں، پیپلز پارٹی کراچی پر بات کرنے سے کیوں کتراتی ہے؟

اس پر شازیہ مری نے کہا کہ کراچی، میرپور خاص اور حیدرآباد کو الگ کیوں کیا جا رہا ہے؟ یہ بہت غلط ہے آپ یہ نہیں کر سکتے، حکومت نے اعلان کیا عید پر لوڈشیڈنگ نہیں ہوگی، عید کے 3 دن سندھ میں لوڈشیڈنگ کی گئی۔

اسلام آباد: عالمی مالیاتی فنڈ (آئی ایم ایف) کی شرائط پر یکم جولائی 2025 سے ڈیجیٹل پروڈکشن ٹریکنگ سسٹم کے نفاذ میں تیزی لانے کا فیصلہ کر لیا گیا۔

فیڈرل بورڈ آف ریونیو (ایف بی آر) حکام نے بتایا کہ انفورسمنٹ اقدامات نہ لینے کی صورت میں 700 ارب روپے کے نئے ٹیکس لگانے پڑتے، سگریٹ، سیمنٹ، پولٹری، مشروبات، کھاد اور ٹیکسٹائل سیکٹر کی نگرانی بڑھائی جا رہی ہے، ٹوبیکو سیکٹر کی پیداوار اور سیل کو ڈیجیٹل ٹریکنگ سسٹم سے مانیٹر کیا جائے گا۔

یہ بھی پڑھیں: بجٹ 26-2025 میں آئی ایم ایف کی کڑی شرائط سامنے آگئیں

ایف بی آر حکام نے بتایا کہ مختلف علاقوں میں قائم سگریٹ کے کارخانوں کی نگرانی ہوگی، شوگر سیکٹر میں پیداوار کی نگرانی بہتر بنانے سے ٹیکس ریونیو میں 39 ارب روپے اضافہ ہوا، چینی کے شعبے میں پیداوار کی انڈر رپورٹنگ ہو رہی تھی۔

انہوں نے بتایا کہ ٹیکسٹائل سیکٹر کی بھی کیمروں کے ذریعے نگرانی کی جائے گی، سیلز ٹیکس ریونیو کو جی ڈی پی کے 5 فیصد کے مساوی تک لے جایا جائے گا۔

ایف بی آر حکام کے مطابق آئی ایم ایف کے ساتھ انفورسمنٹ اقدامات بڑھانے پر اتفاق کیا گیا، نئے مالی سال 14 ہزار 131 ارب روپے کے ٹیکس ہدف میں 389 ارب روپے کے انفورسمنٹ اقدامات شامل ہیں جبکہ 312 ارب روپے کے اضافی ٹیکس اقدامات بھی شامل ہیں۔