Tag: Budget 2025-26

اسلام آباد: پاکستان بزنس فورم نے بجٹ 26-2025 میں مقامی کپاس پر گڈز اینڈ سروسیز ٹیکس (جی ایس ٹی) ختم کرنے کا مطالبہ کر دیا۔

چیف آرگنائزر پاکستان بزنس فورم احمد جواد نے اپنے بیان میں کہا کہ آئندہ ماہ پیش بجٹ میں مقامی کپاس پر جی ایس ٹی ختم کی جائے اور کپاس کے فروغ ککیلیے پاکستان سینٹرل کاٹن کمیٹی کو سالانہ ایک ارب روپے مختص کیا جائے۔

احمد جواد نے کہا کہ حکومت ایک ارب روپے دے آپ کو کپاس مد میں سالانہ ایک ارب ڈالر ملے گا، ٹیکسٹائل ملز سینٹرل کاٹن کمیٹی کو کاٹن سیس واجبات کی ادائیگی جلد مکمل کریں۔

یہ بھی پڑھیں: کپاس کے مقامی کاشتکاروں کیلیے خوشخبری

انہوں نے مطالبہ کیا کہ گرین پاکستان انیشٹیو پروگرام کے فروغ کیلیے 7 سالہ ٹیکس چھوٹ کا اعلان بھی کیا جائے، آئندہ بجٹ میں زرعی اہداف 4.8 فیصد رکھنے کی تجویز ہے۔

اس سے قبل پاکستان بزنس فورم نے وفاقی حکومت سے گندم سپورٹ پرائس کے معاملے پر نظر ثانی کا مطالبہ کیا تھا کہ گندم کا معاملہ مشترکہ مفادات کونسل میں لایا جائے، اگر اس معاملے کو سنجیدہ نہ لیا گیا تو مڈل مین اس سے کروڑوں روپے کمائے گا۔

چیف آرگنائزر احمد جواد نے کہا تھا کہ گندم کی کٹائی شروع ہو چکی ہے اور بحران پیدا ہونے کا خدشہ ہے، فری مارکیٹ میکنزم پر حکومت نے جلد بازی کی ہے، آئی ایم ایف کی شرط پر ابھی ایک سال باقی تھا۔

ان کا کہنا تھا کہ حکومت نے فری مارکیٹ میکنزم پر اسٹیک ہولڈرز سے مل کر جامع پالیسی نہیں دی، پنجاب کی غلہ منڈیوں میں گندم کا ریٹ 2500 روپے فی من ہے جبکہ اس کی قیمت کاشت 3200 روپے ہے۔

’2 سال سے گندم کی کاشت میں 700 روپے فی من نقصان کا سامنا ہے۔ غلط پالیسوں کی وجہ سے گندم کی کاشت کا ہدف اس سال پورا نہیں ہوا، 50 سال سے زائد سپورٹ پرائس کا سلسلہ اچانک بند کرنا کہاں کا انصاف ہے۔‘

چیف آرگنائزر نے خدشہ ظاہر کیا تھا کہ ایسا لگ رہا ہے حکومت دسمبر میں گندم درآمد کی طرف جائے گی۔

پشاور: خیبر پختونخوا حکومت نے رواں مالی سال کیلیے مقررہ ہدف سے زیادہ سرپلس بجٹ 26-2025 دینے کا اعلان کر دیا۔

مشیر خزانہ کے پی مزمل اسلم نے اپنے بیان میں کہا کہ رواں مالی سال 180 ارب روپے کا سرپلس بجٹ دیں گے، صوبے نے 100 ارب روپے کا سرپلس بجٹ کا ہدف مقرر کیا تھا۔

مزمل اسلم نے بتایا کہ بجٹ بنانا آسان جبکہ اچھے سے نبھانا اور عمل درآمد مشکل کام ہے، ماہانہ 65 ارب روپے صرف سرکاری ملازمین کی تنخواہوں اور پنشن میں جاتے ہیں، صوبے میں 7 لاکھ سے زائد سرکاری ملازمین کام کر رہے ہیں۔

یہ بھی پڑھیں: وفاقی بجٹ کیلیے آئی ایم ایف کی شرائط سامنے آگئیں

انہوں نے بتایا کہ جاری اخراجات کم نہیں ہوں گے تب تک زیادہ ترقیاتی منصوبے شروع نہیں ہو سکتے، صوبے کے جاری اخراجات بہت زیادہ ہے، جابز پرائیویٹ سیکٹر دیتی ہے جبکہ حکومت سروس ڈیلیوری دیتی ہے۔

ان کا کہنا تھا کہ صوبائی حکومت نے ٹیکس اور نان ٹیکس ریونیو میں کافی حد تک اضافہ کیا، کے پی ریونیو اتھارٹی نے اہداف سے زیادہ محصولات جمع کیے ہیں، وومن ایمپاورمنٹ زیادہ ضروری ہے لیکن کوٹہ سسٹم پر زیادہ یقین نہیں رکھتا، خواتین کو برابری کے مواقع ملنے چاہیے اور جنرل الیکشن میں حصہ بھی لینا چاہیے۔

خیبر پختونخوا حکومت نے آئندہ مالی سال کے بجٹ 26-2025 میں سالانہ ترقیاتی پروگرام کیلیے 249 ارب 20 کروڑ روپے کا تخمینہ لگایا ہے جس میں صوبائی ترقیاتی پروگرام کیلیے 165 ارب 60 کروڑ روپے، ضم اضلاع کے ترقیاتی بجٹ کیلیے 39 ارب 60 کروڑ اور اے آئی پی کیلیے سالانہ ترقیاتی پروگرام میں 44 ارب روپے مختص کرنے کی تجویز دی گئی۔

صوبائی حکومت نے ترقیاتی بجٹ کیلیے اہم مشاورتی اجلاسوں کا شیڈول جاری کر دیا ہے۔ دستاویز کے مطابق نئے مالی سال کے بجٹ میں صحت کے تمام شعبوں کیلیے مجموعی طور پر 179 ارب 76 کروڑ روپے، تعلیم کیلیے 92 ارب 31 کروڑ روپے مختص کرنے پر غور ہو رہا ہے جس میں بنیادی تعلیم کیلیے 53 ارب روپے اور اعلیٰ تعلیم کیلیے 39 ارب مختص کرنے کی تجویز ہے۔