فلسطینی رہنما اسماعیل ہنیہ کی شہادت کے بعد ’حماس‘ نے ان کی نماز جنازہ اور تدفین کے مقام سے متعلق اعلان کردیا۔
برطانوی نشریاتی ادارے بی بی سی کی رپورٹ کے مطابق حماس کی جانب سے جاری بیان کے مطابق اسماعیل ہنیہ کی سرکاری اور عوامی سطح پر نماز جنازہ کی تقریب جمعرات کے روز ایران کے شہر تہران میں ادا کی جائے گی۔
رپورٹ کے مطابق شہید حماس سربراہ اسماعیل ہنیہ کو دو اگست کو قطر کے شہر لوسیل کے قبرستان میں سپرد خاک کیا جائے گا۔
عرب میڈیا کے مطابق اسماعیل ہنیہ کی نماز جنازہ ایرانی وقت کے مطابق صبح 8 بجے اور پاکستانی وقت کے مطابق صبح ساڑھے 9 بجے ادا کی جائے گی۔
رپورٹ کے مطابق اس کے بعد اسماعیل ہنیہ کا جسد خاکی قطر کے دارالحکومت دوحہ منتقل کیا جائے گا جہاں ان کی نماز جنازہ جمعہ کے بعد امام محمد بن عبدالوہاب مسجد میں ادا کی جائے گی۔
یاد رہے کہ اسماعیل ہنیہ کی شہادت سے قبل ان کے خاندان کے 70 اراکین اسرائیلی حملوں میں جان کی بازی ہار چکے ہیں۔
یاد رہے کہ گزشتہ روز ایران میں حماس کے سربراہ اسماعیل ہنیہ کو میزائل حملے میں شہید کردیا گیا، وہ ایرانی صدر کی تقریب حلف برداری میں شرکت کیلئے تہران گئے تھے، حملے میں اسماعیل ہنیہ کا ایک محافظ بھی شہید ہوا
