ٹیکساس: امریکی ریاست ٹیکساس میں جلتی ہوئی گاڑی سے ملنے والی شے دیکھ کر سیکیورٹی حکام دنگ رہ گئے۔
غیر ملکی میڈیا رپورٹ کے مطابق ٹیکساس پولیس کو علاقے میں انسانی اسمگلنک کی رپورٹ موصول ہوئی تھی، اسی دوران ایک ایس یو وی گاڑی کو رکنے کا اشارہ کیا، تاہم گاڑی میں موجود افراد نے رکنے کے بجائے پولیس اہلکار کو کچل ڈالا اور فرار ہوگئے۔
واقعے کے بعد ٹیکساس میں انٹراسٹیٹ ہائی وے پر ڈیپارٹمنٹ آف پبلک سیفٹی افسران نے ایمرجنسی الارم بجایا اور مشتبہ گاڑی کا تعاقب شروع کیا، اسی دوران ایک افسر نے گاڑی کو ٹکر دے ماری جس کے باعث گاڑی میں آگ لگ گئی۔
رپورٹ کے مطابق جب پولیس افسران متاثرہ گاڑی کے قریب پہنچے تو انہوں نے گاڑی کی آگ بھجانےکی کوشش کی اور اس کی جامہ تلاشی بھی لی، اسی دوران گاڑی کے عقب سےملنے والے بیگ نے انہیں حیران کرڈالا۔
مذکورہ بیگ میں کوئی اسلحہ یا منشیات نہیں بلکہ ایک زندہ خاتون کو اسمگل کیا جارہا تھا، اسمگلر خاتون کو ایک کاؤنٹی سے دوسری کاؤئنی میں لیجانے کی کوشش میں تھے کہ پولیس افسران سے مڈبھیر ہوگئی۔
خاتون کو جب بیگ سے نکالا تو وہ صحیح سلامت تھی اور اس کے ہاتھ میں جوتے موجود تھے، واقعے میں ایک اسمگلر کو گرفتار کیا گیا، اس ڈرامائی منظر کی عکس بندی باڈی کیم سے کی گئی جسے بعد ازاں ٹیکساس پولیس ریجن نے اپنے آفیشل ٹوئٹر اکاؤنٹ پر شیئر کیا۔
پولیس کے مطابق خاتون تارکین وطن ہے، اس سے قبل اکیس مارچ کو ایک مشترکہ آپریشن کے دوران ٹیکساس پولیس نے بھاری تعداد میں منشیات اور اسلحے کی بھاری کھیپ پکڑی تھی۔
