Tag: bushra bibi

اسلام آباد: قومی احتساب بیورو (نیب) نے 190 ملین پاؤنڈ کیس میں سابق خاتون اول بشریٰ بی بی کو آج دوبارہ طلب کر لیا ہے۔

نیب ذرائع کے مطابق سابق وزیر اعظم کی اہلیہ بشریٰ بی بی کو نیب راولپنڈی کی جانب سے آج پھر طلب کیا گیا ہے، نیب نے فرحت شہزادی کو بھی آج طلب کیا ہے۔

ذرائع کا کہنا ہے کہ بشریٰ بی بی کو گزشتہ سماعت پر سوالنامہ دیا گیا تھا۔

دوسری طرف بشریٰ بی بی کی جانب سے مقدمات کی تفصیلات کی فراہمی اور گرفتاری سے روکنے کی درخواست دائر کی گئی ہے، جس میں وفاقی و پنجاب حکومت، سیکریٹری داخلہ، اور ایف آئی اے، اسلام آباد، بلوچستان، سندھ، پنجاب، کے پی پولیس، اینٹی کرپشن اور نیب کو فریق بنایا گیا ہے۔

درخواست میں بشریٰ بی بی کا مؤقف ہے کہ ان کے خاوند کو غیر قانونی طور پر سیاسی انتقام کا نشانہ بنایا جا رہا ہے، اور ان کے اور ان کے خاوند کے خلاف خفیہ مقدمات کی بھرمار کی گئی ہے، ہائیکورٹ بھی 22 جون کو بشریٰ بی بی کو کسی نامعلوم مقدمے میں گرفتار کرنے سے روک چکی ہے، تاہم عدالت کے 22 جون کے حکم کے بعد بھی درخواست گزار کو خدشہ ہے کہ لاتعداد خفیہ مقدمات درج کیے گئے ہوں گے۔

درخواست گزار نے کہا کہ بشریٰ بی بی کے خلاف 22 جون کے بعد مقدمات اور انکوائریز کی تفصیلات فراہم کی جائیں، اور استدعا کی جاتی ہے کہ درخواست کے حتمی فیصلے تک تمام فریقین کو بشریٰ بی بی کی گرفتاری سے روکا جائے۔

اسلام آباد: سیشن عدالت نے بشریٰ بی بی کی 12 ستمبر تک عبوری ضمانت میں توسیع کر دی۔

تفصیلات کے مطابق بشریٰ بی بی کے خلاف توشہ خانہ تحائف کی جعلی رسیدوں سے متعلق کیس میں سیشن عدالت نے 12 ستمبر تک ان کی عبوری ضمانت میں توسیع کر دی۔

بشریٰ بی بی اپنے وکلا سلمان صفدر، انتظار پنجوتھہ اور نعیم پنجوتھہ کے ہمراہ عدالت میں پیش ہوئے، تفتیشی افسر عدالت کے روبرو پیش ہوا اور استدعا کی کہ بشریٰ بی بی کی گرفتاری مطلوب ہے، ان کی آڈیو ایف آئی اے کو فرانزک کے لیے بھیجی ہوئی ہے۔

وکیل سلمان صفدر نے عدالت کو بتایا کہ تفتیش کے لیے ہمیں تین تین گھنٹے بلایا جاتا ہے اور بٹھائے رکھتے ہیں، تفتیش کے دوران بتایا بھی گیا کہ آڈیو بشریٰ بی بی کی نہیں ہے۔

عدالت نے کہا کہ یہ معاملہ توشہ خانہ کے تحائف کی جعلی رسیدوں کا ہے تو آڈیو کہاں سے آ گئی؟ ایف آئی آر کے مطابق کیس کو لے کر چلیں۔ تاہم تفتیشی افسر نے استدعا کی کہ بشریٰ بی بی کی وائس میچنگ کے لیے انھیں وقت دیا جائے، عدالت نے یہ استدعا منظور کرتے ہوئے سماعت 12 ستمبر تک ملتوی کر دی۔