کراچی : قائد آباد کا رہائشی اسکریپ کا تاجر پنجاب جاتے ہوئے اغواء کرلیا گیا، اغواء کاروں نے تاوان کیلیے تاجر کی تشدد زدہ برہنہ ویڈیو بھی بھیجی ہے۔
اے آر وائی نیوز کی رپورٹ کے مطابق پولیس کا کہنا ہے کہ قائد آباد کے رہائشی اسکریپ کے تاجر معین الدین کو پنجاب کے شہر صادق آباد جاتے ہوئے اغواء کرلیا گیا ہے۔
واقعے کا مقدمہ مغوی کے بیٹے غیاث الدین کی مدعیت میں قائد آباد تھانے میں درج کرلیا گیا ہے، پولیس کے مطابق اغوا کاروں نے تاوان وصولی کیلیے مغوی تاجر کی تشدد زدہ برہنہ ویڈیو اہلخانہ کو بھیجی ہے۔ مغوی تاجر کو بازیاب کرانے کی بھرپور کوششیں کی جارہی ہیں۔
مغوی تاجر معین الدین کے بیٹے غیاث الدین نے پولیس کو بیان دیا ہے کہ میرے والد مختلف فیکٹریوں، اداروں اور مارکیٹوں سے اسکریپ خریدتے ہیں، والد نے کہا تھا کہ وہ پنجاب کے شہر صادق آباد اسکریپ لینے جا رہے ہیں۔
بیٹے غیاث نے بتایا کہ میرا بھائی ذیشان 21 جون کو والد کو لانڈھی ریلوے اسٹیشن چھوڑ کر آیا تھا، اگلے دن والد کا فون نہیں آیا، اور ہمارے رابطہ کرنے پر ان کا نمبر مسلسل بند جا رہا تھا۔
غیاث الدین کے مطابق 23جون کو والد کے نمبر سے بھائی کو ایک وائس میسج موصول ہوا، جس میں اغواء کاروں نے والد کی رہائی کے بدلے بھاری تاوان مانگا۔
اغواء کاروں نے 2 کروڑ روپے، 2 مہنگی گھڑیاں اور 2 آئی فونز کا مطالبہ کیا ہے، مغوی معین الدین کے بیٹے نے بتایا کہ اغواء کاروں نے میرے والد کی تشدد زدہ برہنہ ویڈیو بھی بھیجی ہے۔
