گلگت: گلگت بلتستان اسمبلی کے حلقہ جی بی اے 4 ۔ نگر 1 میں ضمنی انتخاب جاری ہے، مذکورہ نشست پیپلز پارٹی کے امجد حسین کے مستعفی ہونے پر خالی ہوئی تھی۔
تفصیلات کے مطابق گلگت بلتستان اسمبلی کے حلقہ جی بی اے 4 ۔ نگر 1 میں ضمنی انتخاب جاری ہے، حلقے کے 42 پولنگ اسٹیشنز پر پولنگ جاری ہے۔
پولنگ بلا تعطل شام 5 بجے تک جاری رہے گی، حلقے میں 4 امیدوار مدمقابل ہیں، حلقے میں کل ووٹرز کی تعداد 23 ہزار 497 ہے۔ مرد ووٹرز کی تعداد 12 ہزار 858 جبکہ خواتین ووٹرز کی تعداد 10 ہزار 639 ہے۔
ضمنی الیکشن کے لیے 42 پولنگ اسٹیشنز اور 98 پولنگ بوتھ قائم کیے گئے ہیں، 16 پولنگ اسٹیشن مردوں اور خواتین کے لیے مخصوص ہیں۔ 10 پولنگ اسٹیشنز میں مردوں اور خواتین دونوں کی پولنگ جاری ہے۔
الیکشن کمیشن کا کہنا ہے کہ پولنگ پر امن طریقے سے جاری ہے۔
نگر کے ضمنی انتخاب میں پاکستان پیپلز پارٹی اور پاکستان تحریک انصاف کے امیدواروں میں سخت مقابلہ متوقع ہے، مذکورہ نشست پیپلز پارٹی کے امجد حسین کے مستعفی ہونے پر خالی ہوئی تھی۔ گلگت بلتستان کے الیکشن میں امجد حسین 2 نشستوں سے کامیاب ہوئے تھے۔
