کراچی : سول ایوی ایشن اتھارٹی نے کورونا وائرس کے پھیلاؤ کی روک تھام کیلئے ملک بھر کے تمام ایئر پورٹس میں داخلے کیلئے سخت ہدایات جاری کی تھیں جس کی خلاف ورزی پر متعدد مسافروں کو داخل ہونے سے روک دیا گیا۔
تفصیلات کے مطابق جناح انٹرنیشنل سمیت ملک بھر کے دیگر ایئرپورٹس پر کورونا ایس او پی پر سختی سے عمل درآمد کا آغاز کردیا گیا ہے جس کے بعد متعدد مسافروں کو آنے سے روک دیا گیا۔
اس حوالے سے ذرائع کا کہنا ہے کہ کراچی ایئرپورٹ پر تعینات تمام عملے اور مسافروں کو بغیر ماسک داخلے کی اجازت نہیں ہوگی، کراچی ایرپورٹ منیجر خود مانیٹرنگ کے لیے انسپکشن کریں گے۔
سول ایوی ایشن اتھارٹی کے ذرائع نے بتایا ہے کہ تمام ایرلائنز کے عملے کو بھی سختی سے ماسک پہننے کی ہدایت کی گئی ہے، خلاف ورزی پر ان کے خلاف بھی محکمہ جاتی کارروائی عمل میں لائی جائے گی۔
ایرپورٹ منیجر عمران خان نے اے آر وائی نیوز سے گفتگو کرتے ہوئے کہا کہ پابندی پر عمل درآمد کرتے ہوئے چند مسافروں کو بغیر ماسک کے ایئرپورٹ داخل ہونے سے بھی روکا گیا ہے۔
انہوں نے بتایا کہ بغیر ماسک پہنے مسافروں کو انٹری پوائنٹ پر روکا جارہا ہے اور انہیں ماسک فراہم کیے جارہے ہیں، ایئر پورٹ پر کام کرنے والے بیشتر عملے کو بھی بغیر ماسک کے داخل ہونے نہیں دیا گیا ہے ان کووارننگ بھی دی گئی ہے، آئندہ خلاف ورزی جرمانے بھی عائد کیے جائیں گے۔
