ARYNews.tv | Urdu – Har Lamha Bakhabar

Tag: CAA

  • سول ایوی ایشن نے غیرقانونی طریقے سے 5 ارب روپے جے ایس بینک میں انویسٹ کردیے

    سول ایوی ایشن نے غیرقانونی طریقے سے 5 ارب روپے جے ایس بینک میں انویسٹ کردیے

    اسلام آباد: سول ایوی ایشن کے پنشنر ز کے لیے مختص کردہ رقم حیلے بہانوں سے جہانگیر صدیقی کے بینک کے حوالے کردی گئی‘ شرح سود بڑھنے سے سول ایوی ایشن کو پنشن کے لیے مختص رقم پر نقصان کا سامنا کرنا پڑے گا۔

    تفصیلات کے مطابق اے آروائی نیوز کے پروگرام’ پاور پلے ‘ میں انکشاف کیا گیا ہے کہ پانچ ارب کی خطیر رقم ضابطے کی کارروائی کیے بغیر سول ایوی ایشن پنشن ٹرسٹ فنڈ نے جے ایس بینک کو انویسٹ منٹ کے لیے دی ہے ۔

    CAAپاور پلے کے میزبان ارشد شریف سے گفتگو کرتے ہوئے کراچی بیورو کے ڈپٹی بیورو چیف کاشف حسین نے انکشاف کیا ہے کہ 6.7 فیصد کی شرح سے کی جانے والی یہ انوسٹ منٹ شرح سود میں اضافے کے سبب نقصان کا سبب بنے گی۔ کہا جارہا ہے کہ سوی ایوی ایشن نے22 نومبر 2017 کو چار ارب روپے جے ایس بینک کو انوسٹ منٹ کو دیے‘ اور اس کے بعد12 فروری 2018 کے مزید ایک ارب روپے جے ایس بینک کو انوسٹ منٹ کے لیے دیے گئے۔

    ذرائع کا کہنا ہے کہ اس قسم کی انوسٹ منٹ کے لیے تمام بینکوں سے پہلے سمری طلب کی جاتی ہے اور جو بینک زیادہ شرحِ منافع کی پیشکش کرتا ہے ‘ اس کے ساتھ سرمایہ کاری کی جاتی ہے تاہم اس کیس میں اس ضابطے کی پیروی کیے بغیر رقم براہ راست جے ایس بینک کے حوالے کردی۔

    ا س حوالے سے معاشی ماہرین کا کہنا ہے کہ شرح سود مئی میں آدھا فیصد بڑھ جائے گی جبکہ رواں ماہ ستمبر تک یہ شرح 8 فیصد تک پہنچ جائے گی‘ جس سے سول ایوی ایشن کو خسارے کا سامنا کرنا پڑے گا۔

  • سی اے اے کے 2قائم مقام ڈپٹی ڈی جی کا اپنے عہدوں پر منظور شدہ مدت سے زائد تعیناتی کا انکشاف

    سی اے اے کے 2قائم مقام ڈپٹی ڈی جی کا اپنے عہدوں پر منظور شدہ مدت سے زائد تعیناتی کا انکشاف

    کراچی : سول ایوی ایشن اتھارٹی کے دو قائم مقام ڈپٹی ڈی جی کا اپنے عہدوں پر منظور شدہ مدت سے زائد تعیناتی کا انکشاف ہوا، جس پر ڈی جی سی اے اے سے وضاحت طلب کرلی ہے۔

    تفصیلات کے مطابق سول ایوی ایشن اتھارٹی کے دو قائم مقام ڈپٹی ڈی جی کا اپنے عہدوں پر منظور شدہ مدت6 ماہ کے بجائے 15 ماہ تعینات رہنے کا انکشاف ہوا، ایوی ایشن ڈویژن نے منظور شدہ مدت سے زائد تعیناتی پر ڈی جی سی اے اے سے وضاحت طلب کرلی۔

    ڈپٹی سیکٹریری ایوی ایشن اتھارٹی امجد فیاض قاسم نے ڈائریکٹر جنرل ایوی ایشن اتھارٹی کو خط لکھا، جس میں کہا گیا ہے کہ ایوی ایشن ڈویژن نے عامر محبوب اور سہیل احمد کے ان عہدوں پر تعیناتی کی منظوری 9ستمبر 16 تا 8 مارچ 2017 تک دی تھی، دونوں افسران مذکورہ عہدوں پر 9مارچ 2017 سے 28 دسمبر 2017 تک اضافی غیر قانونی طور پر تعینات رہے۔

    خط میں سی اے اے کی جانب سے ان افسران کو جاری میں تعیناتی کی مدت درج نہ کرنے پر بھی ڈی جی سے وضاحت طلب کرلی ہے اور کہا ہے سی اے سے کے مذکورہ خط سے ان افسران کی غیر معینہ مدت پر مبنی تعیناتی کا تاثر ملتا ہے۔

    ایوی ایشن ڈویژن نے تعیناتی کی مدت کے بغیر خط جاری کرنے والے افسر سے بھی وضاحت طلب کر لی جبکہ اضافی مدت تک تعینات رہنے والے دونوں افسران سےبھی وضاحت طلب کی ہے۔

    خط میں پوچھا گیا ہے کہ منظور شدہ مدت سے زائد تعیناتی کے دوران افسران کو اگر کوئی مالی فوائد دئے گئے اور کہا گیا کہ ابہام پرمبنی خط میں درج تعیناتی مدت کی تصیح کی جائے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • سول ایوی ایشن نے کاک پٹ میں سگریٹ نوشی پرپابندی عائد کردی

    سول ایوی ایشن نے کاک پٹ میں سگریٹ نوشی پرپابندی عائد کردی

    کراچی : دوران ِپرواز کاک پٹ میں سگریٹ نوشی کرنے والے کپتانوں کی شامت آگئی‘ سول ایوی ایشن اتھارٹی نے سولہ سال بعد حکومتی آرڈی ننس پر عمل کرتے ہوئے دوران پرواز کاک پٹ میں سگریٹ نوشی پر پابندی عائد کردی ۔

    تفصیلات کے مطابق سول ایوی ایشن کے ڈائریکٹر فلائٹ اسٹینڈرڈ کیپٹن عارف مجید کے ذیر دستخط آرڈر کے ذریعے سگریٹ نوشی پر پابندی عائد کی گئی ہے۔ ذرائع کے مطابق سگریٹ نوشی کے عادی کپتانوں کے لیے آٹھ گھنٹے سے زائد پرواز کرنا دشوار ہوجائے گا۔

    سول ایوی ایشن اتھارٹی کے جاری کردہ خط کے مطابق دوران پرواز سگریٹ نوشی سیفٹی کے لیے خطرہ قرار دیا ہے۔دوران ِپرواز کوئی بھی کاک پٹ عملہ سگریٹ نوشی میں ملوث پایا گیا تو اس کا لائسنس تین ماہ کیلئے معطل کردیا جائے گا جبکہ قوانین کی خلاف ورزی کرتے ہوئے دوسری غلطی پر کاک پٹ عملے کا لائسنس منسوخ کردیا جائے گا۔

    سول ایوی ایشن اتھارٹی کی جانب سے جاری کردہ خط کی کاپی اے آروائی نیوز کو موصول ہوگئی۔خط کے مطابق کارروائی حکومت کی جانب سے جاری کردہ ہیلتھ آرڈیننس 2002کے تحت عمل میں لائی جائے گی۔بین الاقوامی سیفٹی ایجنسی سافا کی جانب سے متعدد بار رپورٹ کی گئی ہے کہ دوران پرواز پاکستانی پائلٹ سگریٹ نوشی کے مرتکب ہوتے ہیں جو قوانین کی خلاف ورزی ہے۔

    یاد رہے کہ اس سے پہلے بھی پی آئی اے کے کپتانوں کی جانب سے سیفٹی قوانین کی خلاف ورزی معمول کی بات ہے ‘ رواں سال کے اوائل میں بین الاقوامی مانیٹرنگ ایجنسی نے برطانیہ کے ہیتھرو ایئرپورت پر پی آئی اے کی 28 پروازوں کی لینڈنگ کو خلاف قانون رجسٹرڈ کیا ہے۔ مجموعی طور پر 40 پروازوں نے ہیتھرو ایئرپورٹ پر لینڈنگ کی تھی ‘ جن میں سے 28 نے غلطی کی۔

    گزشتہ سال پی آئی اے کی پرواز852میں جہاز کے کپتان نے ایک غیر ملکی خاتون کو خلاف قانون کاک پٹ میں بٹھا لیاتھا، مذکورہ لڑکی جہاز کے ٹیک آف سے لے کر لینڈنگ تک کاک پٹ میں ہی رہی۔ بعد ازاں مذکورہ کپتان کے خلاف پی آئی اے کی تحقیقاتی کمیٹی نے ضابطے کے مطابق کارروائی انجام دی ۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہچانے کےلیے سوشل میڈیا پرشیئر کریں

  • سول ایوی ایشن اتھارٹی کے ڈائریکٹر جنرل ائیرمارشل ریٹائرڈ عاصم سلیمان عہدے سے برطرف

    سول ایوی ایشن اتھارٹی کے ڈائریکٹر جنرل ائیرمارشل ریٹائرڈ عاصم سلیمان عہدے سے برطرف

    کراچی : سول ایوی ایشن اتھارٹی کے ڈائریکٹر جنرل ائیرمارشل ریٹائرڈ عاصم سلیمان کو عہدے سے برطرف کردیا گیا۔

    تفصیلات کے مطابق سول ایوی ایشن اتھارٹی کے ڈائریکٹر جنرل ائیرمارشل ریٹائرڈ عاصم سلیمان کو ان کے عہدے سے برطرف کردیا گیا، برطرفی کا نوٹس اسٹیبلشمنٹ ڈویژن نے جاری کیا۔

    نوٹیفکیشن کے مطابق عاصم سلیمان کو ایک ماہ کی تنخواہ بھی ادا کی جائے گی جبکہ ائیروائس مارشل ریٹائرڈ اوسید الرحمان کو ڈی جی سول ایوی ایشن اتھارٹی کا اضافی چارج سونپ دیا گیا ہے۔

    نوٹیفکیشن میں کہا گیا ہے کہ جب تک نئے ڈی جی کا تقرر نہیں ہوجاتا اس وقت تک اپنے فرائض انجام دیتے رہیں گے۔

    یاد رہے کہ عاصم سلیمان کیخلاف سول ایوی ایشن اتھارٹی کے ملازمین،ڈائریکٹران اور جنرل منیجرز کی جانب سے ان کی برطرفی کیلئے احتجاجی مہم شروع کی تھی، جو دو مہینے سے جاری تھی۔

    ملازمین اور افسران کا مطالبہ تھا کہ انھیں فوری طور پر برطرف کیا جائے، جس پر مشیر ہوابازی سردار مہتاب عباسی نے ملازمین و افسران کو یقین دلایا تھا کہ فروری کے آخر تک ان کو عہدے سے برطرف کردیا جائے گا۔

    واضح رہے کہ عاصم سلیمان کی برطرفی سے متعلق اے آروائی نیوز نے سب سے پہلے خبر نشر کی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • نیو اسلام آباد ایئرپورٹ افتتاح کے لیے تیار‘ نام نہیں رکھا جاسکا

    نیو اسلام آباد ایئرپورٹ افتتاح کے لیے تیار‘ نام نہیں رکھا جاسکا

    اسلام آباد: دس سال  کے عرصے میں مکمل ہونے والے نئے اسلام آباد ایئرپورٹ کا نام تاحال تجویز نہیں کیا جاسکا‘ ایئرپورٹ کی تعمیر پر 90 ارب روپے لاگت آئی ہے۔

    تفصیلات کے مطابق دس سال کے طویل عرصے میں 90 ارب روپے کی لاگت سے تیار ہونے والے اسلام آباد ایئر پورٹ کا افتتاح وزیراعظم شاہد خاقان عباسی کریں گے ‘ تاہم ابھی تک ایئرپورٹ کے لیے کوئی نام تجویز نہیں کیا جاسکا ہے۔

    نیو اسلام آباد ایئرپورٹ 7اپریل 2007ء میں اس کا سنگ بنیادجنرل ریٹائرڈ جنرل پرویز مشرف نے رکھا تھا اور اسے تین سال کے عرصے میں مکمل ہونا تھا ‘ تاہم تعطل کا شکار رہنے کے سبب کام وقت پر مکمل نہیں کیا جاسکا اور اب دس سال بعد 20 اپریل 2018 کو وزیر اعظم شاہد خاقان عباسی اس کا افتتاح کریں گے۔

    وفاقی کابینہ کے اجلاس میں نیو اسلام آباد ایئرپورٹ کے لیے متعدد نام زیر بحث رہے ہیں ‘ جن میں عبدالستار ایدھی،لیاقت علی خان،فاطمہ جناح گندھارا اور نیو اسلام آباد ایئرپورٹ کے نام زیر بحث آئے لیکن کابینہ نے کسی بھی نام کی حتمی منظوری تاحال نہیں دی ہے۔

    دوسری جانب نیو اسلام آباد ایئرپورٹ پر پی آئی اے کی جانب سے گرونڈ ہینڈلنگ کے انتظامات نہیں کئے جاسکے، جس پر سول ایوی ایشن اتھارٹ نے برہمی کا اظہار کیا ہے۔ ذرائع کا کہنا ہے کہ تمام ایئرلائنز نے گراونڈ ہینڈلنگ کے انتظامات مکمل کرلئے۔پی آئی اے انتظامات کرنے میں ناکام رہی ہے ۔

    سول ایوی ایشن اتھارٹی کی جانب سے تمام ایئرلائنز کو 18اپریل تک نیو اسلام آباد ایئرپورٹ پر اپنے تما م تر انتظامات مکمل کرنے کی ہدایت کردی گئی ہے۔

    نئے ایئرپورٹ کی تصویری جھلکیاں

    ایئرپورٹ کا بیرونی منظر
    پاسپورٹ کاؤنٹر
    فضا سے لیا گیا حسین منظر
    ایئرپورٹ کی آرائش و زیبائش کی ایک جھلک
    ایئرپورٹ اور اس کے عقب میں اسلام آباد کا پہاڑی سلسلہ

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہچانے کےلیے سوشل میڈیا پرشیئر کریں

  • سول ایوی ایشن اتھارٹی کی جزوی نجکاری کے عمل کا آغاز

    سول ایوی ایشن اتھارٹی کی جزوی نجکاری کے عمل کا آغاز

    اسلام آباد : حکومت پاکستان نے سول ایوی ایشن اتھارٹی کی جزوی نجکاری کے عمل کا آغاز کردیا ہے۔ پہلے مرحلے کے طور پر پاکستان سول ایوی ایشن اتھارٹی نے ایک نئی کمپنی پاکستان ائرپورٹ سروسز لمیٹڈ کو سیکوریٹی ایکسچینج آف پاکستان میں رجسٹرڈ کروایا گیا ہے۔

    سول ایوی ایشن اتھارٹی کے ترجمان کا کہنا ہے کہ یہ نیا ادارہ سول ایوی ایشن اتھارٹی کے ملازمین کیلئے ایک فلاحی ادارے کے طور پر کام کرے گا۔ اس بارے میں سول ایوی ایشن اتھارٹی کے بورڈ آف ڈائریکٹرز نے بھی پاکستان ائرپورٹ سروسز لمیٹڈ کے قیام کیلئے این او سی جاری کردیا ہے۔

    این او سی کے مطابق سول ایوی ایشن اتھارٹی کے ڈائریکٹر ہیومن ریسورز سمیر سعید کو 34 فیصد شیئر ڈائریکٹر پلاننگ اینڈ ڈیولپمنٹ نادر شفیع ڈار کو 33 فیصد اور ایڈیشنل ڈائریکٹر کمپینسیشن اینڈ بینیفٹس انیس الرحمان کو 33فیصد شیئرزکے ساتھ نئی کمپنی پاکستان ائرپورٹ سروسز لمیٹڈکا بھی ڈائریکٹر مقرر کیا گیا ہے۔

    سی اے اے ترجمان کا کہنا ہے کہ پی اے ایس ایل میں مزیدڈائریکٹرز شامل کیے جائیں گے اور جلد بورڈ آف ڈائریکٹرز بھی تشکیل دے دیا جائے گا۔ ترجمان کے مطابق نئی کمپنی سی اے اے کے حاضرسروس اور ریٹائرڈ ملازمین کیلئے فلاحی منصوبوں کے علاوہ آوٹ سورس کیے جانے والے پاکستانی ایرپورٹس کا انتظام بھی چلاسکتی ہے۔

    دوسری جانب ماہرین نے نئی کمپنی کے قیام پر حیرت کا اظہار کرتے ہوئے کہا ہے کہ نئی کمپنی سی اے اے آرڈیننس میں تبدیلی کے بغیر کس طرح ائرپورٹ کے فنکشنز کسی اور ادارے یا کمپنی کو سونپ سکتی ہے۔

    ان ماہرین کے مطابق سول ایوی ایشن اتھارٹی آرڈیننس پارلیمنٹ سے منظور شدہ ہے اور پارلیمنٹ ہی اس میں تبدیلی کرسکتی ہے۔

    اس کے علاوہ ابھی تک سول ایوی ایشن اتھارٹی کا فارن کرنسی اکاو ¿نٹ بھی نہیں ہے ۔ انہوں نے کہا کہ یہ فرنٹ مین کے ذریعے بیک ڈور سے پاکستان کے منافع بخش ادارے پر قبضہ کرنے کی ایک سوچی سمجھی منصوہ بندی نظر آتی ہے۔

    سول ایوی ایشن اتھارٹی کے موجودہ چیئرمین ریٹائرڈ ائرمارشل عاصم سلیمان کی برطرفی کی تحریک چلانے والے سمیر سعید اور نادر شفیع کو نئے ادارے کا ڈائریکٹر بنانے پر بھی ماہرین نے حیرت کا اظہار کیا ہے۔

  • راؤ انوارکی روانگی سے متعلق تمام ایئرلائنز سے تفصیلات طلب

    راؤ انوارکی روانگی سے متعلق تمام ایئرلائنز سے تفصیلات طلب

    کراچی : معطل ایس ایس پی ملیر راؤ انوار کی مبینہ طور پر بیرون ملک فرار ہونے کے معاملے پر سول ایوی ایشن اتھارٹی نے تمام ایئر لائینز سے سفری دستاویز طلب کرلیں، تاحال ملزم کے فرار کا کوئی سراغ نہ مل سکا۔

    تفصیلات کے مطابق نقیب اللہ محسود قتل کیس میں ملوث سابق ایس ایس پی ملیر راؤ انوار کے مبینہ طور پر بیرون ملک فرار کے معاملے پر چیف جسٹس سپریم کورٹ نے از خود نوٹس لیا تھا، جس پر سول ایوی ایشن اتھارٹی نے تمام ایئر لائنز اورچارٹرڈ طیاروں کی سروس حلف نامہ لے لیا۔

    ذرائع کے مطابق راؤ انوار نے اب تک کسی بھی ایئر لائینز سے چارٹرسروس حاصل نہیں کی اور دی جانے والی تاریخوں میں ملزم راؤ انوار بیرون ملک نہیں گیا ہے۔

    سول ایوی ایشن اتھارٹی کے ترجمان نے اے آروائی نیوز کو بتایا کہ تمام ایئرلائنز اور چارٹرڈ طیارہ کمپنیوں سے 15 دن کی سفری دستاویز طلب کی گئی تھیں کہ آیا راؤ انوار نے ان کے طیاروں میں سفر یا چارٹرڈ طیارے کے ذریعے روانہ تو نہیں ہوا ؟

    اس کے علاوہ ساتھ ہی ان کمپنیوں سے حلف نامے بھی طلب کیے گئے تھے، ترجمان کے مطابق پی آئی اے سمیت تمام ایئرلائنز اور چارٹرڈ کمپنیوں نے سول ایوی ایشن اتھارٹی کو حلف نامے جمع کرادیئے ہیں، سول ایوی ایشن اتھارٹی اس معاملے پر حلف نامے اور رپورٹ بنا کر یکم فروری کو سپریم کورٹ میں جمع کرائے گی۔

  • ایئرلائنزکریو سے اضافی ڈیوٹی کیلئے پیشگی اجازت ضروری قرار

    ایئرلائنزکریو سے اضافی ڈیوٹی کیلئے پیشگی اجازت ضروری قرار

    کراچی : ایئرلائنزکریو سے اضافی ڈیوٹی کیلئے پیشگی اجازت ضروری قرار دے دی گئی ہے، ایئر لائنز پر عملے سے 12 گھنٹے سے زیادہ ڈیوٹی لینے پر پابندی ہوگی، سول ایوی ایشن اتھارٹی نےاحکامات جاری کردیے۔

    تفصیلات کے مطابق سول ایوی ایشن اتھارٹی نے پائلٹس اور کاک پٹ کریو کے مقررہ وقت سے زائد ڈیوٹی کے لئے پیشگی اجازت ضروری قرار دے دی۔

    ایئرنیویگیشن آرڈر12کے ورژن چھ فلائٹ ڈیوٹی ٹائم اینڈ فلائٹ ٹائم لمیٹیشن کے تناظرمیں جاری کیاگیا، مذکورہ حکم یکم جنوری 2018 سے نافذالعمل قرار دیا گیا ہے۔

    آرڈرکے تحت ائر لائنز کو کریو سے اضافی ڈیوٹی کے لئے سی اےاے سے پیشگی اجازت کا پابند کیا گیا ہے، مذکورہ احکامات سے قبل ائر لائنز اور کریو کے مابین اضافی ڈیوٹی کے حوالے سے متعدد تنازعات سامنے آچکے ہیں۔

    آرڈرکی رو سے ائر لائنز کو کیبن اورکاک پٹ کرو کوسال میں تیس چھٹیاں دینے کا پابند کیا گیا ہے، ایئرلائنز پر عملے سے بارہ گھنٹوں سے زیادہ ڈیوٹی لینے پر پابندی ہو گی، عملے سے اضافی ڈیوٹی کےلیے سی اے اے سے پیشگی اجازت لینا ہوگی۔

    اس کے علاوہ ایئرلائن انتظامیہ عملے کو مروجہ قوانین کے تحت ریسٹ دینے کی بھی پابند ہوگی، اے این او پر سب سے زیادہ پی آئی اے کواعتراض ہے۔

    اے این او پر عمل درآمد سے ایئرلائنز کو عملے کی تعداد میں اضافہ کرنا ہوگا، ایئرلائنز کی جانب سے اے این او نفاذ کی تاریخ میں دو سالہ اضافے کے لئے بھاگ دوڑ شروع کردی گئی ہے۔

    اے این او پر عملدرآمد نہ کرنے والی ائر لائنز کے خلاف سی اے اے کی جانب سے کارروائی کا امکان ظاہر کیا جارہا ہے۔

  • سول ایوی ایشن اتھارٹی کے ڈائریکٹر جنرل کی برطرفی کے لیے بکرے کا صدقہ

    سول ایوی ایشن اتھارٹی کے ڈائریکٹر جنرل کی برطرفی کے لیے بکرے کا صدقہ

    کراچی: سول ایوی ایشن اتھارٹی کے ملازمین نے ادارے کے ڈائریکٹر جنرل عاصم سلیمان کی برطرفی کے لیے انوکھا احتجاج کرتے ہوئے بکرے کا صدقہ دیا۔

    تفصیلات کے مطابق سول ایوی ایشن اتھارٹی کے ملازمین ادارے کے ڈائریکٹر جنرل عاصم سلیمان کی برطرفی کا مطالبہ کر رہے ہیں۔

    اس سلسلے میں ملازمین نے انوکھا احتجاج کرتے ہوئے ڈی جی سی اے اے ہیڈ کوارٹر کے سامنے بکرے کا صدقہ دیا۔

    ملازمین کا کہنا ہے کہ ڈی جی کی برطرفی تک روزانہ بکروں کا صدقہ دیا جائے گا۔

    مزید پڑھیں: اے ٹی آر طیارے کی اڑان سے قبل کالے بکرے کا صدقہ

    ذرائع کا کہنا ہے کہ احتجاج ڈی جی سول ایوی ایشن کی جانب سے افسران اور ملازمین کے ساتھ تضحیک آمیز رویے پر کیا جا رہا ہے۔

    اس حوالے سے چیئرمین سی بی اے راؤ اسلم کا کہنا تھا کہ ہم سول ایوی ایشن اتھارٹی کو پرائیویٹ ایوی ایشن بننے نہیں دیں گے۔ ڈی جی سول ایوی ایشن اتھارٹی کو فوری نہ ہٹایا گیا تو ملک بھر کے ایئر پورٹس پر احتجاج کریں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • ڈی جی سی اے اے کی برطرفی کا معاملہ شدت اختیار کرگیا

    ڈی جی سی اے اے کی برطرفی کا معاملہ شدت اختیار کرگیا

    کراچی : ڈی جی سی اے اے کی برطرفی کا معاملہ شدت اختیار کرگیا، ڈائریکٹرز کے بعد ایئر ٹریفک کنٹرولرز بھی میدان میں آگئے، ڈی جی کیخلاف اعلیٰ حکام کو خط ارسال کردیا۔

    تفصیلات کے مطابق ڈی جی سول ایوی ایشن  اتھارٹی کے خلاف افسران و ملازمین کا احتجاج جاری ہے، پاکستان ایئر ٹریفک کنٹرولر کی نمائندہ تنظیم ائیر ٹریفک کنٹرول گلڈ بھی ڈی جی سول ایوی ایشن کے خلاف میدان میں آگئی۔

    ڈائریکٹرز کے بعد ایئر ٹریفک کنٹرولرز نے بھی ڈی جی سی اے اے کی برطرفی کا مطالبہ کردیا، ڈی جی سی اے اے کی برطرفی سے متعلق مشیر ہوا باز سردار مہتاب اور ایوی ایشن سیکریٹری کو خط ارسال کردیا گیا۔

    خط میں کہا گیا ہے کہ کنٹرولر شدید ذہنی دباؤ کا شکار ہیں جس سے سیفٹی کیلئے خطرات لاحق ہورہے ہیں، ایئر ٹریفک کنٹرولر کی ملازمت انتہائی حساس ہے ذرا سی غفلت سے مسافروں کو نقصان پہنچ سکتا ہے۔

    ایئر ٹریفک کنٹرولر پر ڈی جی سی اے اے کا شدید دباؤ ہے، خط میں مطالبہ کیا گیا ہے کہ معاملے کو جلد از جلد حل کرنے کے اقدامات کیے جائیں۔

    مزید پڑھیں: ڈی جی سول ایوی ایشن کی برطرفی کیلئے ملازمین سراپا احتجاج

    اس قسم کے تنازعات سول ایوی ایشن کے حساس شعبوں کے لیے قطعی موزوں نہیں ہیں، موجودہ صورتحال کی وجہ سے ملازمین کے ذہن کام پر یکسو ہونے کے بجائے منتشر ہورہے ہیں۔