ریاض : سعودی عرب کی کابینہ نے شاہ سلمان بن عبدالعزیز کی سربراہی میں اہم فیصلوں کی منظوری دی ہے، کورونا وائرس کے پھیلاؤ کو روکنے کے پیش نظر کیے جانے والے اقدامات کا جائزہ لیا گیا۔
تفصیلات کے مطابق سعودی کابینہ نے ملکی اور بین الاقوامی امور سے متعلق19 فیصلوں کی منظوری دی ہے، کابینہ کا ویڈیو اجلاس منگل کو خادم حرمین شریفین شاہ سلمان بن عبدالعزیز کی زیر صدارت ہوا۔
سعودی خبررساں ادارے ایس پی اے کے مطابق قائم مقام وزیر اطلاعات ڈاکٹر ماجد القصبی نے اجلاس کے بعد بتایا کہ کابینہ نے اس بات پر اطمینان کا اظہار کیا کہ51 ممالک سے250 پروازوں کے ذریعے47 ہزار سے زیادہ ان سعودی شہریوں کو وطن واپس لایا گیا جو واپسی کے آرزو مند تھے۔ سعودی شہریوں کی وطن واپسی کا آپریشن وزارت خارجہ کے تعاون سے ہنوز جاری ہے۔
سعودی کابینہ نے مملکت کے اندر اور باہر کورونا کی وبا کی تازہ صورتحال اور اس حوالے سے اندرون ملک وبا پر قابو پانے کے لیے جاری کاوشوں کی بابت مفصل رپورٹ سنی۔ جس میں بتایا گیا کہ مملکت بھر میں بڑے پیمانے پر کورونا ٹیسٹ کی مہم جاری ہے تاکہ وبا کو پھیلنے سے روکا جاسکے اور مقامی شہریوں و مقیم غیرملکیوں کی صحت و سلامتی کو یقینی بنایا جاسکے۔
القصبی نے بتایا کہ کابینہ نے1967 کے مقبوضہ فلسطینی علاقوں کو اپنی خودمختاری میں شامل کرنے کے اسرائیلی عزائم پر شدید غم و غصے کا اظہار کیا۔
اس حوالے سے مسلم وزرائے خارجہ کے ہنگامی اجلاس کی ان قراردادوں کی بھرپور تائید و حمایت کی گئی جن میں کہا گیا تھا کہ اسرائیل کی جانب سے فلسطینی علاقوں کو اپنی خودمختاری میں شامل کرنے کا اعلان بین الاقوامی قانونی قراردادوں پر کھلا جارحانہ حملہ ہے۔ اسرائیل کی اس قسم کی دھمکیوں سے امن عمل کی بحالی کے امکانات سبوتاژ ہوجائیں گے۔
سعودی کابینہ نے علاقائی و بین الاقوامی حالات حاضرہ پر بحث کے بعد یقین دہانی کرائی کہ سعودی عرب دہشت گردی اور انتہا پسندی کے خلاف جنگ میں تمام ممالک کے ساتھ بھرپور تعاون کرے گا۔
اس حوالے سے ادنی فروگزاشت سے کام نہیں لے گا۔ مملکت کو یقین ہے کہ انتہا پسندی اور دہشت گردی سے پوری عالمی برادری کو تشویش ہے اور یہ عالمی امن و سلامتی کے لیے خطرہ ہیں۔
کابینہ نے اس حوالے سے فرانس کی میزبانی میں جی فائیو ساحلی ممالک کے اتحادی اجلاس کی قراردادوں کی تائید و حمایت کی۔ سعودی کابینہ نے افغانستان کے دارالحکومت کابل، شمالی نائجیریا اور عراق کے دیالی صوبے میں دہشت گردانہ حملوں کی مذمت کی۔
اجلاس نے سعودی عرب اور وفاقی روس کے شہریوں کو وزٹ ویزوں کے اجرا سے متعلق مفاہمتی یادداشت کی منظوری دی ہے۔ ڈیموکریٹک کانگو کے ساتھ تعاون کے بڑے معاہدے کا اختیار وزیر خارجہ کو تفویض کردیا۔
جبوتی کی وزارت اسلامی امور کے ساتھ شاہ سلمان اسلامک کلچرل سینٹرکے حوالے سے مفاہمتی یادداشت کا ا ختیار وزیر اسلامی امور کو تفویض کیا گیا ہے۔
کابینہ نے صحت کے شعبے میں تعاون کے لیے متحدہ عرب امارات کے ساتھ مفاہمتی یادداشت کی منظوری منظوری دی ہے، مختلف عہدوں پر مقامی شہریوں کی تقرری اور ترقی کے احکام بھی جاری کیے۔
