اسلام آباد: ہارس ٹریڈنگ کےخاتمےکےلیےحکومت نےتحریک انصاف سےرابطہ کرلیا،اسحاق ڈارنےجہانگیرترین کوکل آل پارٹیزکانفرنس میں شرکت کی دعوت دے دی۔
اسلام آباد میں حکومت اور تحریک انصاف کے رہنماؤں کے درمیان مذاکرات ہوئے، مذاکرات میں سینیٹ الیکشن میں ہارس ٹریڈنگ روکنے اور عدالتی کمیشن کے قیام کے حوالے سے امور پر غور کیا گیا۔
میڈیا سے گفتگو کرتے ہوئے اسحاق ڈار نے کہا کہ سینیٹ الیکشن میں ہارس ٹریڈنگ عروج پر ہے، ہارس ٹریڈنگ کے خاتمے کے لیے وہ اور تحریک انصاف ایک پیج پر ہیں۔
انہوں نے کہا کہ سینیٹ الیکشن میں ہارس ٹریڈنگ ہمیشہ کے لیے ختم کرنا چاہتے ہیں۔ ہارس ٹریڈنگ کے معاملے پر تمام سیاسی جماعتوں سے بات ہوئی ہے۔
وزیر خزانہ کا کہنا تھا کہ سینیٹ الیکشن میں شو آف ہینڈزنہیں ہوسکتا۔ سینیٹ انتخابات میں بیلٹ پیپر کو خفیہ نہ رکھنے کی تجویز بھی ہے، انہوں نے کہا کہ آئینی معاملات مل کر حل کرنا چاہتے ہیں، چاہتے ہیں کہ تحریک انصاف جلد پارلیمنٹ میں واپس آئے۔
اس موقع پر پی ٹی آئی کے رہنما جہانگیر ترین کا کہنا تھا کہ سینیٹ الیکشن خفیہ بیلٹ کے ذریعے نہیں ہونا چاہیے۔ سینٹ الیکشن میں خرید و فروخت سیاستدانوں پر بدنما دھبہ ہے۔ انہوں نے کہا کہ ووٹ کی قیمت لگوانے والے ایم پی اے کو سزا ملنی چاہیئے۔ اعلیٰ قیادت سے مشاورت کے بعد وزیر اعظم کے اجلاس میں شرکت پر غور کریں گے۔
