لندن: کینیڈا اور بھارت کے درمیان تنازع پر برطانیہ کا مؤقف سامنے آ گیا، امریکا کے بعد برطانیہ نے بھی بھارت پر خود مختاری کے احترام پر زور دیا ہے۔
غیر ملکی میڈیا رپورٹس کے مطابق برطانیہ نے جمعہ کے روزکینیڈا بھارت تنازع پر اپنے مؤقف کا اعادہ کرتے ہوئے کہا ہے کہ تمام ممالک کو خود مختاری اور قانون کی حکمرانی کا احترام کرنا چاہیے۔
برطانوی وزیر اعظم رشی سونک نے کینیڈین وزیر اعظم جسٹن ٹروڈو سے فون پر بات چی کی، جس کے بعد حکومتی ترجمان نے ایک بیان میں کہا کہ وزیر اعظم نے برطانیہ کے اس مؤقف کی توثیق کی ہے کہ تمام ممالک کو سفارتی تعلقات سے متعلق ویانا کنونشن کے قانون سمیت دیگر ملکوں کی خود مختاری اور قانون کی حکمرانی کا احترام کرنا چاہیے۔
واضح رہے کہ بھارت اور کینیڈا کے درمیان کشیدگی گزشتہ ماہ اس وقت بڑھی جب کینیڈا نے کہا کہ وہ جون میں برٹش کولمبیا میں ایک سکھ علیحدگی پسند رہنما ہردیپ سنگھ نجر کے قتل میں بھارتی حکومت کے ایجنٹوں کے ملوث ہونے کی سنجیدگی سے تحقیقات کر رہا ہے۔
