ٹورنٹو: کینیڈا کی ایک خاتون وزیر پر تیز رفتاری کے لیے جرمانہ ہو گیا، دل چسپ بات یہ ہے کہ خاتون کے پاس کوئی گاڑی نہیں ہے۔
تفصیلات کے مطابق کینیڈا کی وزیر خزانہ کرسٹیا فری لینڈ کے پاس اگرچہ کوئی کار نہیں ہے، تاہم البرٹا ہائی ویز پر تیز رفتاری سے گاڑی چلانے کے لیے انھیں جرمانہ کر دیا گیا ہے۔
کرسٹیا فری لینڈ ایک شوقین سائیکلسٹ ہیں، ان پر ان کے آبائی صوبے البرٹا میں تیز رفتاری پر 200 ڈالر جرمانہ کیا گیا، انھیں گرانڈے پریری اور پیس ریور کے قصبوں کے درمیان 132 کلو میٹر فی گھنٹہ (82 میل فی گھنٹہ) کی رفتار سے گاڑی چلاتے ہوئے پکڑا گیا تھا۔
امریکی میڈیا رپورٹس کے مطابق وزیر خزانہ کی ترجمان کیتھرین کپلنسکاس نے منگل کو بتایا کہ کرسٹیا فری لینڈ نے جرمانہ ادا کر دیا ہے، اگرچہ انھوں نے یہ نہیں بتایا کہ مذکورہ سڑک پر رفتار کی حد کیا تھی، تاہم البرٹا ہائی ویز پر زیادہ سے زیادہ رفتار کی حد 110 کلومیٹر فی گھنٹہ ہے۔
رپورٹس کے مطابق قانون ساز کرسٹیا فری لینڈ کینیڈا کے سب سے بڑے شہر وسطی ٹورنٹو میں ایک پارلیمانی حلقے کی نمائندگی کرتی ہیں، سائیکل پر اکثر ان کی تصاویر سامنے آتی رہتی ہیں۔ گزشتہ ماہ انھوں نے میڈیا کو بتایا تھا کہ ان کے پاس کوئی کار نہیں ہے اور یہ کہ اس بات پر ان کے والد حیران ہوتے ہیں۔ ان کا کہنا تھا کہ ان کے بچے بھی سائیکل پر آتے جاتے ہیں۔
