لاہور : پاکستان مسلم لیگ ن کی سینئر نائب صدر اور چیف آرگنائزر مریم نواز نے کہا ہے کہ انہوں نے پارٹی قیادت کے خلاف اپنے شوہر کیپٹن (ر) صفدر اعوان کے ریمارکس پر انہیں نہیں ڈانٹا۔
لاہور میں صحافیوں بات چیت میں کیپٹن (ر) صفدر کےحالیہ بیان سے متعلق پوچھے گئے سوال پر مریم نواز نے کہا کہ میں نے کیپٹن صفدر کو بالکل نہیں ڈانٹا۔
ایک سوال کے جواب میں انہوں نے کہا کہ نون لیگ کا ووٹر پارٹی کے ساتھ چٹان کی طرح کھڑا ہے بلکہ ن لیگ کے ووٹ بینک میں اضافہ بھی ہوا ہے ،ن لیگ پرانی سیاسی جماعت ہے سب سمجھتی ہے، یقین کریں ابھی میرے ذہن میں کوئی عہدہ نہیں کہ میں وہ لوں۔
صحافیوں سے ملاقات میں غیر رسمی گفتگو کرتے ہوئے ن لیگ کی چیف آرگنائزر مریم نواز نے کہا کہ عمران خان اور ہمارا موازنہ نہیں کیا جاسکتا ہم پر سیاسی مقدمات تھے، عمران خان کو نوازشریف کی آڑ میں نہیں نکالا گیا، اس نے جرائم کیے تھے۔
انہوں نے کہا کہ اب وہ عدالت کیوں نہیں جارہا؟ کیونکہ اس نے جرائم کیے ہیں اسے علم ہے کہ گیا تو پکڑا جائے گا۔ خصوصی گھڑی وزیراعظم پاکستان کیلئے بنائی گئی تھی جو اس نے بیچ دی۔
کیپٹن (ر) کی لیگی قیادت پر کڑی تنقید
یاد رہے کہ کیپٹن (ر) صفدر نے کچھ روز قبل اے آر وائی نیوز کو دیے گئے ایک انٹرویو میں ن لیگ کی قیادت پر شدید تنقید کی تھی۔
اپنی گفتگو میں انہوں نے قمرجاوید باجوہ کو ایکسٹینشن کا ووٹ دینا نوازشریف کی بڑی غلطی قرار دیا اور دیگر غلط فیصلوں پر اپنی ہی قیادت پر برس پڑے تھے۔
مزید پڑھیں : کیپٹن(ر) صفدر کیخلاف کارروائی کیلئے دباؤ
ان کا کہنا تھا کہ مریم نواز کو وزیراعظم بنتا نہیں دیکھ رہا اور ہمارا ووٹ کو عزت دو کا بیانیہ دفن ہوگیا، اب نہیں چلے گا۔
اس تمام صورتحال کے پیش نظر ن لیگ کے سینئیر رہنماؤں اور کارکنان کی جانب سے نوازشریف اور مریم نواز سے ناراضی کا اظہار کرتے ہوئے آئندہ انتخابات میں پارٹی ٹکٹ نہ دینے کا مشورہ دیا۔
