ARYNews.tv | Urdu – Har Lamha Bakhabar

Tag: CAR

  • سبزیوں سے بھرا ٹرک کار پر الٹ گیا، 3 افراد جاں بحق

    سبزیوں سے بھرا ٹرک کار پر الٹ گیا، 3 افراد جاں بحق

    ملتان(1 اگست 2025): خانیوال روڈ پر سبزیوں سے بھرا ٹرک کار پر الٹ گیا جس کے نتیجے میں 3 افراد جاں بحق ہوگئے۔

    تفصیلات کے مطابق ملتان سہو چوک خانیوال روڈ پر ایک ٹریفک حادثہ پیش آیا ہے، سبزیوں سے بھرا منی ٹرک کار پر الٹ گیا جس کی زد میں آکر 3 افراد جاں بحق ہوگئے۔

    ریسکیو حکام کے مطابق متی تل روڈ سے آنے والی کار خانیوال روڈ کی جانب مڑ رہی تھی،کار کے مڑتے ہی سبزیوں سے بھرا ٹرک بے قابو ہو کر اس پر الٹ گیا۔

    ریسکیو حکام کا کہنا ہے کہ کار سوار 5 افراد میں سے 2 خواتین اور ایک مرد جاں بحق ہوگئے، جاں بحق افراد میں کوثر پروین، زاہدہ اور غلام یاسین شامل ہیں۔

    ریسکیو حکام کا مزید بتانا ہے کہ کار سوار ایک بچہ اور خاتون معجزانہ طور پر محفوظ رہ ہیں جبکہ لاش کو اسپتال منتقل کردیا گیا ہے۔

    دوسری جانب کراچے کے سپر ہائی وے گداپ سٹی روڈ ایم ٹیک کے قریب ٹریفک حادثہ میں 2 افراد جان کی بازی ہار گئے، حادثے میں جاں بحق ہونیوالوں کی شناخت بینظیر اور شوہر علی شیر کے نام سے ہوئی ہے۔

     دریں اثناء حب ڈیم کے قریب ٹریفک حادثہ میں پولیس اہلکار 40 سالہ قربان جبکہ 45 سالہ خادم اور علی نواز زخمی ہوگئے ہیں۔

    https://urdu.arynews.tv/jhang-truck-accident/

  • گوگل میپس پر اندھا اعتماد، 3 افراد جان سے ہاتھ دھو بیٹھے

    گوگل میپس پر اندھا اعتماد، 3 افراد جان سے ہاتھ دھو بیٹھے

    نئی دہلی : گوگل میپ (جی پی ایس )کے بتائے ہوئے رستے پر سفر کرنا مسافروں کو مہنگا پڑگیا، تین کار سوار افراد پل سے گر کر جان سے ہاتھ دھو بیٹھے۔

    دنیا بھر میں لوگوں کی بڑی تعداد گوگل میپ (جی پی ایس ) کا استعمال کرتے ہوئے سفر کرتی ہے، تاہم اس کو استعمال کرتے ہوئے اپنی عقل کا استعمال کرنا بھی ضروری ہے۔

    بھارت میں پیش آنے والے ایک واقعے نے لوگوں کو عجیب شش و پنج میں مبتلا کردیا جس میں کار سوار تین افراد 50 فٹ اونچے پل سے گر کر ہلاک ہوگئے ہلاک شدگان میں دو سگے بھائی بھی تھے۔ بدقسمت کار سوار افراد بریلی سے ضلع بداٶں کے علاقے داتا گنج جا رہے تھے۔

    بھارتی میڈیا کی رپورٹ کے مطابق علاقہ مکینوں نے پولیس کو حادثے کی اطلاع دی، بعد ازں رام گنگا دریا سے تباہ شدہ ویگن آر کو نکالا گیا، کار میں موجود تینوں افراد جن میں دو بھائی بھی شامل تھے مو قع پر ہی ہلاک ہوگئے۔

    پولیس کے مطابق سیلاب کی وجہ سے پل کا اگلا حصہ دریا میں گر گیا تھا، لیکن یہ تبدیلی جی پی ایس میں اپ ڈیٹ نہیں کی گئی۔ نتیجتاً ڈرائیور کو یہ اندازہ نہیں ہوسکا کہ پل غیر محفوظ ہے۔

    متوفیان کے اہلخانہ کے مطابق مذکورہ نوجوان گوگل میپ کی رہنمائی میں سفر کر رہے تھے، جی پی ایس نے پُل کا راستہ کلیئر دکھایا لیکن آگے جا کر پُل موجود نہیں تھا۔

    مزید پڑھیں : گوگل میپس پر اندھا بھروسہ کرنے والے سیاحوں کے ساتھ کیا ہوا؟

    انہوں نے متعلقہ محکمہ کے حکام پر الزام عائد کیا کیونکہ پل کو نامکمل چھوڑ دیا گیا تھا اور علاقے کے اردگرد کوئی حفاظتی رکاوٹیں یا انتباہی نشانات بھی نہیں لگائے گئے تھے جس کی وجہ سے حادثہ پیش آیا۔

  • کرائے کی گاڑی پر قبضہ کرنے والی خاتون بڑی مصیبت میں پھنس گئی

    کرائے کی گاڑی پر قبضہ کرنے والی خاتون بڑی مصیبت میں پھنس گئی

    دبئی میں یورپی خاتون نے کرائے پر گاڑی لینے  کے بعد اس پر قبصہ کرلیا، کمپنی کا مینیجر عدالت پہنچ گیا۔

    الامارات الیوم کے مطابق دبئی میں ایک یورپی خاتون نے کرائے پر لی گئی گاڑی پر قبضہ کرلیا ایجنسی کے تعاقب سے بچنے کے لیے جی پی ایس بھی نکال دیا۔

    رپورٹ کے مطابق رینٹ اے کار ایجنسی کی شکایت پر یورپی خاتون کو پبلک پراسیکیوشن نے طلب کرلیا جہاں اس نے اقبالیہ بیان میں کہا ’جو کچھ ہوا اس میں میرا کوئی قصور نہیں، میری سہیلی نے مجھے پھنسایا ہے‘۔

    پبلک پراسیکیوشن نے خاتون کا کیس عدالت بھیج دیا، کمپنی کے مینجر نے پبلک پراسیکیوشن کو بتایا کہ خاتون نے واٹس اپ پر رابطہ کیا تھا، کرایے پر کار لے کر واپس نہیں کی تھی اور جی پی ایس نکال لیا تھا، گاڑی واپس کرنے اور کرایہ دینے سے بھی بھاگ رہی تھی۔

    رابطے کے بعد خاتون کے کہنے پر معاہدے پردستخط کے بعد گاڑی اس کے گھر پہنچائی گئی تھی، اس نے ماہانہ کی بنیاد پر 6 ماہ کے لیے گاڑی کرایے پر لی تھی۔

    مینیجر نے کہا کہ خاتون پہلےمہینے کی قسط 2500 درہم ادا کردی تھی،  دوسرے مہینے  کی قسط بھی جمع کرادی تھی لیکن تیسرے مہینے ٹال مٹول سے شروع کردیا رابطے کا جواب اس کی ماں  دینے لگی آخر میں رابطے کے جواب بھی دینا بند کردیا تھا۔

    کمپنی کے مالک نے بتایا  کہ اس نے جی پی ایس کمپنی سے رابطہ کیا تو پتہ چلا کہ وہ  گاڑی سے سسٹم کو نکال چکی ہے،  گاڑی کی قیمت 32000 درہم تھی۔

    ملزمہ نے کہا کہ دراصل یہ گاڑی اس نے نہیں بلکہ اس کی سہیلی نے حاصل کی تھی اور اسی نے اسے پھنسایا ہے۔

     تاہم عدالت نے تمام شواہد کی بنیاد پر یورپی خاتون کے خلاف 5 ہزار درہم جرمانے اور 32 ہزار درہم گاڑی کی قیمت ادا کرنے کا فیصلہ سنادیا۔

  • یہ فلمی سین نہیں، خاتون کار کو قابو نہ کر سکی، دل دہلا دینے والی ویڈیو

    یہ فلمی سین نہیں، خاتون کار کو قابو نہ کر سکی، دل دہلا دینے والی ویڈیو

    فلوریڈا: ایک ایسی دل دہلا دینے والی ویڈیو سامنے آئی ہے جو ہرگز کسی فلمی سین پر مبنی نہیں، بلکہ ایک اصلی فاسٹ اینڈ فیورس سین دکھائی دیتا ہے۔

    تفصیلات کے مطابق امریکی ریاست فلوریڈا کے ایک ہائی وے پر نوجوان خاتون سے تیز رفتار کار بے قابو ہو گئی، اور وہ سڑک کے کنارے کھڑے ٹو ٹرک کے ریمپ پر چڑھ دوڑی، اور اگلے لمحے وہ ہوا میں کئی میٹر بلند اڑتی نظر آئی۔

    کار ایک 21 سالہ خاتون چلا رہی تھی، جو اس ہولناک حادثے میں خوش قسمتی سے بچ گئی، لیکن اسے شدید زخمی حالت میں اسپتال لے جایا گیا تھا، جہاں اب اس کی حالت سنبھل چکی ہے۔

    یہ حادثہ جارجیا ہائی وے پر پیش آیا، جب بدھ کو سڑک پر لانڈس کاؤنٹی پولیس کی جانب سے ہائی وے پر جارجیا اسٹیٹ پٹرول کی مدد کی جا رہی تھی، یہاں ہائی وے کو درمیان میں گھاس کا قطعہ بنا کر دو حصوں میں تقسیم کیا گیا ہے، ایک سڑک کے کنارے ٹو ٹرک کھڑا تھا جس کا ریمپ نیچے کیا گیا تھا۔

    باڈی کیمرہ لگائے ایک نائب شیرف ٹو ٹرک کی سمت چل رہا تھا، جب اچانک ایک بے قابو کار آئی اور ریمپ پر چڑھ دوڑی، کار نے ٹرک کے پچھلے حصے میں لگے بیریئر کو توڑا اور ہوا میں بلند ہو گئی۔

    ویڈیو میں دیکھا جا سکتا ہے کہ کار سڑک کنارے ٹوو ٹرک سے ٹکرا کر اڑتی ہوئی کافی دور دوسری گاڑی پر جا گری ہے۔

  • ریورس کرتے ہوئے گاڑی بے قابو، تالاب میں جا گری

    ریورس کرتے ہوئے گاڑی بے قابو، تالاب میں جا گری

    بھارت میں ایک گاڑی تالاب میں جا گرنے سے ایک شخص ہلاک ہوگیا، واقعہ سی سی ٹی وی کیمرا میں ریکارڈ ہوگیا۔

    یہ واقعہ بھارتی ریاست مدھیہ پردیش میں پیش آیا، سی سی ٹی وی فوٹیج میں دیکھا جاسکتا ہے کہ گاڑی کا ڈرائیور اسے ریورس کرنے کی کوشش کر رہا ہے۔

    اچانک گاڑی قابو سے باہر ہوتی ہے اور تیزی سے پیچھے چلی جاتی ہے جہاں ایک تالاب موجود ہے، گاڑی تالاب میں گر جاتی ہے۔

    پولیس کا کہنا ہے کہ گاڑی میں 3 افراد سوار تھے جن میں سے 2 کو بچا لیا گیا ہے تاہم ایک شخص کی موت ہوگئی۔

  • سعودی عرب: سڑک پر پورا خاندان حادثے کا شکار ہونے سے بال بال بچ گیا

    سعودی عرب: سڑک پر پورا خاندان حادثے کا شکار ہونے سے بال بال بچ گیا

    ریاض: سعودی عرب میں ایک لاپرواہ ڈرائیور کی غفلت کے باعث پورا خاندان حادثے کا شکار ہونے سے بال بال بچ گیا، واقعے کی ویڈیو سوشل میڈیا پر تیزی سے وائرل ہوگئی۔

    ویڈیو میں دیکھا جا سکتا ہے کہ ایک پورا خاندان حادثے کا شکار ہونے سے اس وقت بال بال بچ گیا جب ایک لاپرواہ ڈرائیور انتہائی تیزی سے کار چلاتا دکھائی دیا، یہ فورڈ کار تھی۔

    ویڈیو کلپ میں دیکھا جا سکتا ہے کہ سڑک کراس کرتے ہوئے باپ اپنے بچوں کو بچانے کی کوشش کرتا نظر آیا اور انہیں سڑک پار کروانے کے بعد زمین پر گر گیا، خوش قسمتی سے سعودی شہری گاڑی کے پہیوں تلے آنے سے محفوظ رہا۔

    کار کا مالک رات کے وقت بھی گاڑی کی لائٹس بجھا کر ڈرائیونگ کر رہا تھا اور دوسروں کی جانوں کو خطرے میں ڈال رہا تھا۔

    یہ کلپ سوشل میڈیا پر تیزی سے وائرل ہوگیا اور لوگوں نے گاڑی کے ڈرائیور کو برا بھلا کہنا شروع کردیا۔

    یاد رہے جنرل ٹریفک ڈپارٹمنٹ نے گاڑیوں کے ڈرائیورز کو رات کے وقت گاڑی چلاتے ہوئے گاڑیوں کی لائٹس آن نہ کرنے کی وارننگ جاری کی ہے، اس ضابطے کی خلاف ورزی کی سزا 3 ہزار سے لے کر 6 ہزار ریال تک ہوسکتی ہے۔

  • بیٹے کی جان بچانے کے لیے باپ حد سے گزر گیا

    بیٹے کی جان بچانے کے لیے باپ حد سے گزر گیا

    والدین اپنی اولاد کو نقصان سے بچانے کے لیے ہر حد سے گزر سکتے ہیں، اور ایسا ہی قدم ایک باپ نے بھی اٹھایا جس میں اس نے اپنے بیٹے کو بچانے کے لیے کروڑوں کا نقصان کردیا۔

    اسپین میں ایک شخص نے اپنے نشے میں دھت بیٹے کو کار چلانے سے روکنے اور اسے کسی ممکنہ حادثے سے بچانے کے لیے کدال سے اس کی لگژری گاڑی کو سخت نقصان پہنچایا۔

    لوگرونو کے 60 سالہ شخص نے پہلے تو شراب کے نشے میں دھت بیٹے کو ڈرائیونگ سے باز رکھنے کے لیے اسے سمجھانے کی کوشش کی لیکن ناکامی پر انتہائی اقدام کرتے ہوئے لوہے کی کدال سے بیٹے کی چمچاتی قیمتی بی ایم ڈبلیو کار کے نہ صرف شیشے توڑ ڈالے بلکہ کار کے پہیوں کی ہوا نکالنے کے بعد کار کی باڈی پر بھی کدال چلائے۔

    گزشتہ ہفتے پیش آنے والے اس واقعے کے حوالے سے مزید معلوم ہوا ہے کہ جب یہ معمر شخص یہ حرکت کر رہا تھا تو مقامی پولیس کو ایک کال موصول ہوئی کہ ایک شخص عوامی سڑک پر کھڑی گاڑی کو کدال مار کر نقصان پہنچا رہا ہے۔

    پولیس اسکواڈ وہاں پہنچی تو انہوں نے دیکھا کہ ایک سفید وین انہیں دیکھ کر وہاں سے تیزی سے نکلی ہے، تاہم پولیس نے اسے روک لیا اور دیکھا کہ اس کے اندر ایک معمر شخص ایک نشے میں مست نوجوان کے ساتھ بیٹھا ہے۔

    پولیس نے دونوں سے سوالات کیے تو معلوم ہوا کہ یہ دونوں باپ بیٹے ہیں اور معمر شخص نے اپنے 32 سالہ بیٹے کی گاڑی کو نقصان پہنچایا ہے۔

    معمر شخص نے پولیس کو ساری صورتحال سے آگاہ کیا، پولیس نے بعدازاں اس واقعے کو سوشل میڈیا پر ٹویٹ کیا جس پر یہ وائرل ہوگئی۔

  • ہوٹل کے مہمان نے غصے میں اپنی گاڑی داخلی دروازوں سے ٹکرا دی

    چین کے شہر شنگھائی میں ایک ہوٹل کے اندرقیام پذیر شخص نے انتظامیہ سے نالاں ہو کر اپنی گاڑی ہوٹل کے داخلی دروازوں پر دے ماری اور گاڑی دوڑاتا ہوا اندر تک لے آیا، مذکورہ شخص اپنا لیپ ٹاپ کھو جانے پر غصے میں تھا۔

    بین الاقوامی میڈیا کے مطابق شنگھائی میں ایک ہوٹل کے اندر ایک شخص نے غصے میں اپنی گاڑی ہوٹل کے شیشے پر دے ماری اور گاڑی لے کر ہوٹل کی لابی تک آگیا۔

    28 سالہ گاہک نے الزام عائد کیا کہ ہوٹل والوں نے اس کا لیپ ٹاپ گما دیا جس میں انتہائی اہم معلومات تھیں۔

    گاڑی ہوٹل کے دروازوں سے ٹکرانے کے بعد ہوٹل ملازمین سے گاہک کی تکرار ہوئی جس میں ہوٹل انتظامیہ کی جانب سے کہا گیا کہ انہوں نے لیپ ٹاپ گم نہیں کیا، ساتھ ہی انتظامیہ نے خدشہ ظاہر کیا کہ ہوسکتا ہے لیپ ٹاپ کسی نے چوری کیا ہو۔

    ویڈیو میں دیکھا جاسکتا ہے کہ وہاں موجود لوگ چیخ و پکار کر رہے ہیں اور مذکورہ شخص کو برا بھلا کہہ رہے ہیں، اس کے علاوہ کچھ لوگوں نے یہ بھی کہا کہ کیا آپ کو احساس ہے کہ آپ نے ابھی کیا کیا؟

    کچھ افراد کو گاڑی سے ڈرائیور کو باہر نکالتے بھی دیکھا جاسکتا ہے۔

    مقامی پولیس کے مطابق ہوٹل انتظامیہ نے تصدیق کی ہے کہ مذکورہ شخص کا لیپ ٹاپ ہوٹل کے باہر سے مل گیا جبکہ خوش قسمتی سے واقعے میں کسی قسم کا جانی نقصان نہیں ہوا۔

    پولیس کا کہنا ہے کہ گاڑی کے ڈرائیور کو گرفتار کرلیا گیا ہے۔

  • ویڈیو: چور پولیس افسر کی گاڑی بھی لے اڑے

    ویڈیو: چور پولیس افسر کی گاڑی بھی لے اڑے

    کراچی: شہر قائد کے علاقے سعدی ٹاؤن بلاک 5 سے پولیس افسر کی گاڑی چوری ہو گئی، واردات کی سی سی ٹی وی فوٹیج اے آر وائی نیوز نے حاصل کر لی۔

    تفصیلات کے مطابق چوروں نے پولیس افسر کی گاڑی بھی نہ چھوڑی، سعدی ٹاؤن کے بلاک فائیو سے ایک پولیس افسر کی گاڑی چوری ہونے کی واردات سامنے آئی ہے۔

    2021 کے ماڈل کی گاڑی میں آنے والے ملزمان 2011 ماڈل کی گاڑی لے اڑے، پولیس کی جانب سے پیٹی بند بھائی کی کار کی تلاش شروع کر دی گئی ہے۔

    ویڈیو میں دیکھا جا سکتا ہے کہ پارکنگ میں کھڑی گاڑی کے ساتھ ملزمان نے اپنی گاڑی پارک کی، ایک ملزم گاڑی سے اترا اور دوسری کار کا دروازہ کھول کر اندر بیٹھ گیا۔

    ویڈیو کے مطابق ملزم نے گاڑی اسٹارٹ کی، ویڈیو میں گاڑی کو ریورس ہوتے بھی دیکھا جا سکتا ہے، جس کے بعد ملزم کار کو لے کر نکل گیا، ملزم کے پیچھے سفید کار بھی گلی سے باہر نکل گئی۔

    پولیس حکام کا کہنا ہے کہ ملزمان جس گاڑی میں آئے تھے وہ نجی بینک کی ملکیت ہے، پولیس کے مطابق کار کا ایڈریس کلفٹن بلاک 7 کا آ رہا ہے۔

  • دبئی پولیس نے گاڑی میں بند ہوجانے والے 36 بچوں کو بچا لیا

    دبئی پولیس نے گاڑی میں بند ہوجانے والے 36 بچوں کو بچا لیا

    ابو ظہبی: متحدہ عرب امارات کے شہر دبئی میں رواں برس پولیس نے گاڑیوں میں لاک ہوجانے والے 36 بچوں کو بچایا ہے۔

    بین الاقوامی میڈیا کے مطابق دبئی پولیس نے سال رواں کے شروع سے ماہ رواں کے آغاز تک گاڑیوں میں لاک ہوجانے والے 36 بچوں کو بچایا ہے۔

    دبئی پولیس کے اعلیٰ حکام نے ایک بار پھر کہا ہے کہ کسی بھی حالت میں بچوں کو گاڑی میں تنہا نہ چھوڑیں۔ بند گاڑی میں تنہا رہ جانے والے بچوں کی زندگی خطرے میں پڑ سکتی ہے۔ آکسیجن کی کمی یا درجہ حرارت بڑھ جانے کے باعث ان کا دم گھٹ سکتا ہے۔

    دبئی پولیس نے والدین سے اپیل کی کہ وہ اپنے گھروں یا پبلک مقامات پر گاڑی کبھی کھلی نہ چھوڑیں، بچے گاڑی کھلی دیکھ کر اس میں بیٹھتے ہیں اور گاڑی لاک ہوجانے پر پھنس جاتے ہیں۔ اس طرح ان کی زندگی خطرے میں پڑ جاتی ہے۔

    دبئی پولیس میں ادارہ آگاہی کے ڈائریکٹر بطی احمد الفلاسی کا کہنا ہے کہ جائزوں سے یہ بات ثابت ہو چکی ہے کہ لاک ہونے پر گاڑی کا درجہ حرارت 70 سینٹی گریڈ تک پہنچ جاتا ہے۔ اتنی شدید گرمی بچے کی موت کا باعث بن جاتی ہے۔

    متحدہ عرب امارات کے قانون کے مطابق بچوں کے تحفظ کے سلسلے میں لاپرواہی قابل سزا جرم ہے، امارات میں 2016 میں تحفظ اطفال سے متعلق قانون جاری کیا گیا تھا جس میں لاپرواہی کو جرم قرار دیا گیا تھا۔