قاہرہ میں غزہ جنگ بندی مذاکرات آج سے پھر شروع ہوں گے، اسرائیل نے جنوبی غزہ میں فوج کی تعداد کم کر دی۔
غیر ملکی میڈیا رپورٹس کے مطابق اسرائیلی فوج نے جنوبی غزہ میں فوجیوں کی تعداد کم کر دی ہے، اسرائیلی فوج نے کہا ہے کہ جنوبی غزہ میں ایک بریگیڈ چھوڑ کر باقی فوجی دستے واپس بلا لیے گئے ہیں۔
ادھر قطر، مصر اور امریکا کی ثالثی میں غزہ میں جنگ بندی کے لیے مذاکرات کی کوششیں جاری ہیں، مصر کے دارالحکومت قاہرہ میں غزہ جنگ بندی مذاکرات آج دوبارہ شروع ہو رہے ہیں۔
اسرائیلی حکام کا کہنا ہے کہ اسرائیل کا وفد قاہرہ مذاکرات میں شرکت کرے گا، عرب میڈیا کا کہنا ہے کہ قاہرہ مذاکرات میں حماس کا وفد بھی شامل ہو رہا ہے، مذاکرات میں سی آئی اے سربراہ اور قطری وزیر اعظم بھی شامل ہوں گے۔
دوسری طرف اسرائیل کے غزہ پر وحشیانہ حملے جاری ہیں، اسرائیلی حملوں میں گزشتہ 24 گھنٹوں میں مزید 38 فلسطینی شہید ہو گئے ہیں، جس کے بعد فلسطینی شہدا کی تعداد 33 ہزار 175 ہو گئی۔
