کراچی : پی ڈی ایم کی حکومت میں شامل ن لیگ اور پیپلزپارٹی کے درمیان اختلافات کی خبریں سامنے آرہی ہیں، ذرائع کا کہنا ہے کہ حکومتی پالیسیوں پر خدشات کا اظہار کیا جارہا ہے۔
کراچی : اس حوالے سے ذرائع نے پیپلزپارٹی کی سینٹرل ایگزیکٹیو کمیٹی (سی ای سی) اجلاس کا احوال بتاتے ہوئے کہا ہے کہ پیپلزپارٹی اراکین کو ن لیگ کی پالیسیوں سے اختلاف ہے۔
رہنماؤں کا مؤقف ہے کہ مردم شماری پر ہمارے خدشات مسلسل نظر انداز ہوئے ہیں، پیپلزپارٹی رہنماؤں نے ڈیجیٹل مردم شماری کے نتائج کو بھی مسترد کردیا۔
ذرائع کے مطابق اجلاس میں فیصلہ کیا گیا کہ مردم شماری پر خدشات اتحادیوں کے سامنے رکھیں گے، ملک میں بدترین معاشی حالات پر پیپلزپارٹی ارکان بھی پریشان دکھائی دیئے۔
اجلاس میں ارکان کی رائے تھی کہ ہم حکومت کا حصہ ضرور ہیں لیکن ہمیں درست سمت کا تعین کرانا پڑے گا۔ اس موقع پر نو مئی کے واقعات کیخلاف قرارداد بھی منظور کی گئی۔
ذرائع کا مزید کہنا ہے کہ ملکی معیشت سے متعلق پی پی اپنی تجاویز ن لیگ کو دے گی، عوام کی فلاح کے اقدامات کرنے سے متعلق پی پی بھرپور آواز اٹھائے گی۔
