کراچی:رواں ماہ سیمنٹ کی مقامی کھپت میں اضافہ اور برآمدات میں کمی واقع ہوئی، سیمنٹ مینو فیکچررز نے برآمدات میں مسلسل کمی کو تشویش ناک قرار دے دیا۔
تفصیلات کے مطابق اگست 2017ء میں سیمنٹ کی مقامی کھپت میں 10.85 فیصد اضافہ ہوا اور سیمنٹ کی برآمدات میں 26.47 فیصد کمی واقع ہوئی ،بھارت کو بھی سیمنٹ کی بر آمدات میں کمی واقع ہو ئی ہے۔
سیمنٹ مینو فیکچررز ایسوسی ایشن کے ترجمان نے بتایا ہے کہ اگست کے اعداد و شمار کے مطابق سیمنٹ کی فروخت 3.766 ملین ٹن رہی، اگست 2017ء میں سیمنٹ کی پیداواری صلاحیت 96 فیصد سے زائد استعمال کی گئی جس کی وجہ مقامی طلب میں اضافہ ہے۔
رواں برس کے ابتدائی دو ماہ سیمنٹ کی فروخت 7.148ملین ٹن رہی اور اس دوران مقامی کھپت میں 27.95 فیصد اضافہ ہوا تاہم ، برآمدات میں 13.39 فیصد کمی واقع ہوئی۔
ترجمان کے مطابق سیمنٹ کی برآمدات میں مسلسل کمی تشویش کا باعث ہے اور یہ کمی غیر ٹیکسٹائل مصنوعات کی مجموعی برآمدات میں کمی کے مطابق ہے اور یہ ہمارے مینوفیکچررزکی خراب مسابقتی صلاحیت کو ظاہر کرتی ہے۔
افغانستان کو سیمنٹ کی برآمدات میں جولائی اگست 2017ء میں 21.41 فیصد اضافہ ہوا یہ اضافہ بھارت اور دیگر ملکوں کو برآمدات کی کمی کے مقابلے میں انتہائی معمولی ہے، جولائی تا اگست 2017ء میں بھارت کو سیمنٹ کی برآمدات میں کمی 21.76 فیصد اور دیگر ملکوں کو 37.53 فیصدکم کی گئیں۔
.
