کراچی: آئی جی سندھ اے ڈی خواجہ کے زیر صدارت منعقد ہونے والے اجلاس میں شہرِ قائد میں ہونے والے پاکستان سپر لیگ میچز کی سیکیورٹی سے ملحقہ امور کا جائزہ لیا گیا اورعالمی معیار کی سیکیورٹی کو یقینی بنانے کے احکامات صادر کیے گئے۔
تفصیلا ت کےمطابق سنٹرل پولیس آفس میں آئی جی سندھ کے زیرِ صدارت منعقد ہونے والے اجلاس میں پی سی بی کے سیکیورٹی انچار چ کرنل ( ر) اعظم خان خصوصی طور پر موجود تھے‘ اس موقع پر آئی جی سندھ کا کہنا تھا کہ انتہائی مربوط اور ٹھوس اقدامات پر مبنی سیکیورٹی پلان تیار کیا جائے۔
ذرائع کا کہنا ہے کہ یہ ایک بڑا اجلاس تھا اور اس موقع پر سندھ پولیس سے ایڈیشنل آئی جی کراچی مشتاق احمد مہر‘ ایڈیشنل آئی جی سی ٹی ڈی ڈاکٹر ثناء اللہ عباسی‘ ایڈیشنل آئی جی اسپیشل برانچ ڈاکٹرولی اللہ دل‘ ڈی آئی جی ایڈمن کراچی‘ ڈی آئی جی ٹریفک کراچی‘ زونل ڈی آئی جیزکراچی‘ ڈی آئی جی اسپیشل برانچ‘ ڈی آئی جی ہیڈکوارٹرز‘ ایس ایس پی سیکیورٹی اسپیشل برانچ‘ ایس ایس پیز ساؤتھ اورایسٹ اے آئی جی آپریشنز سندھ‘ اے آئی جی ایڈمن سی پی او ایس ایس پیز زون وضلع ایسٹ ٹریفک‘ ایس ایس پیز ٹریفک ساؤتھ وسینٹرل‘ ایس پی گلشن اقبال‘ ایس پی ٹریفک ملیر شریک تھے ۔
دوسری جانب اس اجلاس میں ڈائریکٹر آئی ٹی کے علاوہ ڈی جی پاکستان رینجرز کے نمائندے بریگیڈیئر شاہد‘کرنل ضیاء‘ ڈی جی اے ایس ایف کراچی ایئرپورٹ کے نمائندے میجرطارق‘ جوائنٹ ڈی جی آئی بی سندھ عبدالوہاب‘ آئی ایس آئی ‘ ایم آئی‘ سول ایوی ایشن فائیو کور کے نمائندگان‘ ایم ڈی کراچی الیکٹرک‘ ڈی جی پروٹوکول اور جی ایم نیشنل اسٹیڈیم بھی موجود تھے۔
آج ہونے والے اس اجلاس میں رواں ماہ فروری میں شروع ہونے والے پی ایس ایل کے کراچی میں منعقد ہونے والے میچز کی مربوط اور فول پروف سیکیورٹی کے حوالے سے تمام ممکنہ اقدامات کا جائزہ لیا گیا۔
آئی جی سندھ اے ڈی خواجہ نے اس موقع پر احکامات جاری کرتے ہوئے کہا کہ انتہائی ٹھوس اور مربوط حکمت عملی پر مشتمل سیکیورٹی پلان تیار کیا جائے اور اس سلسلے میں سیکیورٹی کے بین الاقوامی معیارات کو فوکس کیا جائے
یاد رہے کہ پاکستان کرکٹ بور ڈ کی جانب سے جاری کردہ پی ایس ایل شیڈول کے مطابق اتوار 25 مارچ کو اس تاریخ ساز ایونٹ کا فائنل کراچی میں ہو گا ‘ تاہم فائنل کے ٹائم کا تعین ابھی باقی ہے۔
پاکستان کرکٹ بورڈ (پی سی بی ) نے گزشتہ مہینے وزیراعلیٰ سندھ کو خط ارسال کیا تھا جس میں کہا گیا ہے کہ ’پی ایس ایل کا فائنل 25 مارچ کو نیشنل اسٹیڈیم میں کھیلا جائے گا، اس ضمن میں فروری کے دوسرے ہفتے میں فل ڈریس ریہرسل بھی کی جائے گی‘۔’آئی سی سی سمیت دیگر ادارے فل ڈریس ریہرسل کا مشاہد کریں گے جس کے بعد انٹرنیشنل کھلاڑیوں کو نیشنل اسٹیڈیم میں کھیلنے کی سفارش کی جائے گی‘۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں
