لاہور : مسلم لیگ (ق) کے سربراہ چوہدری شجاعت حسین نے کیمپ جیل میں پاکستان تحریک انصاف کے مرکزی صدر پرویز الٰہی سے ایک بار پھر ملاقات کی ہے، اس دوران مختلف امور پر گفتگو کی گئی۔
تفصیلات کے مطابق لاہور کی کیمپ جیل میں عدالت پیشی سے قبل ہونے والی ملاقات کے موقع پر چوہدری شجاعت حسین نے پرویز الٰہی سے ان کی صحت کے حوالے سے خیریت دریافت کی۔
ذرائع کا کہنا ہے کہ دونوں رہنماؤں کی جیل میں ملاقات ایک گھنٹہ جاری رہی پرویز الٰہی نے چوہدری شجاعت حسین کو اپنی صحت کی خرابی کے حوالے سے تفصیلات فراہم کیں۔
ذرائع کے مطابق ملاقات میں موجودہ ملکی سیاسی صورتحال پر تبادلہ خیال کیا گیا، پرویز الٰہی نے شجاعت حسین کو جیل میں درپیش دیگر مسائل سے بھی آگاہ کیا۔
یاد رہے کہ اس سے قبل ہونے والی ملاقات میں چوہدری برادران نے پرویز الٰہی کو خاندان میں واپسی کا مشورہ دیا تھا تاہم پی ٹی آئی صدر نے دوبارہ اپنے مؤقف کو دہرایا۔
چوہدری برادران نے ان سے کہا کہ وہ اس معاملے پر مزید سوچ لیں آپ سے پھر ملاقات ہوگی، دوبارہ سوچنے کے مشورے پر پرویز الٰہی خاموش رہے۔
یاد رہے کہ چوہدری پرویز الہیٰ کے خلاف پنجاب اسمبلی میں غیرقانونی بھرتیوں کا کیس چل رہا ہے اور اسی کیس میں وہ گرفتار ہیں۔
