اسلام آباد : سینیٹ اجلاس کا پانچ نکاتی ایجنڈا جاری کردیا گیا ، جس کے مطابق اپوزیشن سینیٹرز چیئرمین سینیٹ کو ہٹانے کی قرارداد کی تحریک پیش کریں گے جبکہ حکومتی سینیٹرز ڈپٹی چیئرمین کو ہٹانے کی قرارداد کی تحریک پیش کریں گے
ٹفصیلات کے مطابق سینیٹ کا اجلاس آج ہوگا، اجلاس کا پانچ نکاتی ایجنڈا جاری کردیا گیا ہے ، ایجنڈے کے مطابق اپوزیشن سینیٹرز چیئرمین سینیٹ کو ہٹانے کی تحریک پیش کریں گے اور اجازت ملنے پر اپوزیشن سینیٹرز چیئرمین سینیٹ کو ہٹانے کی قرارداد بھی پیش کریں گے۔
قرارداد میں کہا گیا ہے کہ چیئرمین سینیٹ ایوان کی اکثریت کااعتمادکھوبیٹھےہیں، صادق سنجرانی اب چیئرمین سینیٹ کےآفس میں نہیں رہے۔
ایجنڈے کے مطابق حکومتی سینیٹرز ڈپٹی چیئرمین کو ہٹانے کی قرارداد کی تحریک پیش کریں گے اور اجازت ملنےپر ڈپٹی چیئرمین کیخلاف قرارداد پیش کریں گے ، قرارداد میں کہا گیا ہے کہ ڈپٹی چیئرمین سینیٹ ایوان کی اکثریت کااعتمادکھوبیٹھےہیں، سلیم مانڈوی والااب ڈپٹی چیئرمین سینیٹ کےآفس میں نہیں رہے۔
سینیٹ اجلاس اور قرارداد سے متعلق تیاریاں مکمل کرلی گئیں ہیں اور قرارداد سے متعلق بیلٹ پیپر تیار کرلیا گیا ،سینیٹ سیکرٹریٹ نے قرارداد پر ووٹ کے لئے ہدایت نامہ جاری کردیا۔
جس میں کہا گیا قرارداد پر خفیہ رائے شماری کرائی جائے گی ، ہر رکن حروف تہجی کے حساب سے اپنا بیلیٹ پیپر حاصل کرے گا، قرارداد کے حق یا مخالفت میں ووٹ دیکر بیلیٹ باکس میں ڈالنا لازمی ہوگا ، ارکان پر پولنگ بوتھ میں موبائل فون لے جانے پرپابندی عائد ہے۔
سینیٹ سیکرٹریٹ کا کہنا ہے کہ بیلٹ پیپر کسی کو دکھانا یا تصویر بنانا سختی سے منع ہے، ووٹ کی رازداری کوہرحال میں یقینی بنایاجائے گا، قرارداد پر رائے شماری بذریعہ خفیہ بیلٹ ہوگی۔
خیال رہے سینیٹ میں مجموعی طورپر ایک سو تین ارکان ہیں۔ متحدہ اپوزیشن نے ایک سو تین میں سے چونسٹھ ارکان کی حمایت کا دعویٰ کیا ہے جبکہ حکومت کے پاس مجموعی طور پر انتالیس ارکان ہیں۔
پی پی،ن لیگ،نیشنل پارٹی،پی کے میپ، جے یو آئی ف، اے این پی حکومت کے خلاف ہیں جبکہ پی ٹی آئی کے ساتھ ایم کیوایم، آزاد ارکان، فنکشنل لیگ، بی این پی مینگل اورآزاد ہیں، ایوانِ بالا میں قرارداد کی منظوری کے لیے صرف ترپن ووٹ درکار ہیں۔
