لاہور: چیئرمین پی سی بی شہریار خان نے کہا ہے کہ جس نے کرپشن کی وہ کیرئیر ختم سمجھے، اب بکیز دوستوں اور رشتہ داروں کے ذریعے رابطہ کرتے ہیں، صرف فٹ کھلاڑی ٹیم کا حصہ ہوں چاہے جونیئر ہوں یا سینئر۔
پی ایس ایل فکسنگ اسکینڈل کی تحقیقات کا دائرہ کار بڑھا دیا گیا، چیئرمین پی سی بی شہریار خان نے دو ٹوک الفاظ میں واضح کردیا ہے کہ فکسنگ میں ملوث کھلاڑیوں کو کوئی رعایت نہیں ملے گی۔
لاہور میں بات کرتے ہوئے انہوں نے کہا کہ اگر کوئی کھلاڑی فکسنگ میں ملوث پایا گیا تو وہ اپنا کیرئیر ختم سمجھے، فکسنگ کا طریقہ کار اب بدل گیا ہے، اب بکیز کسی رشتہ دار یا دوست یا کسی پرانے ساتھی کے ذریعے پیغام دیتے ہیں کہ کرکٹر ایسا کرلے تو اسے رقم مل جائے گی۔
فٹ نہ ہوئے تو سینئر کھلاڑی بھی ٹیم سے باہر ہوں گے
چیئرمین پاکستان کرکٹ بورڈ شہریار خان نے مزید کہا کہ اب صرف فٹ کھلاڑی ٹیم کا حصہ ہوں گے اگر فٹ نہ ہوا تو سینئر کھلاڑی بھی ٹیم سے باہر ہوگا۔
شاہ زیب منگل کو بیان ریکارڈ کرائیں گے
اطلاعات ہیں کہ شاہ زیب منگل کو بیان ریکارڈ کرائیں گے، دونوں کرکٹر کے بیان کے بعد انہیں شوکاز جاری کرنے یا نہ کرنے کا فیصلہ ہوگا۔
لاہور : پاکستان کرکٹ بورڈ کے چیئر مین شہریار خان نے کہا ہے کہ ناصر جمشید کے خلاف شواہد موجود ہیں، معطل کھلاڑیوں کے خلاف جرم ثابت ہوا تو سخت سے سخت سزا دیں گے۔ چاہتے ہیں پی سی ایل کا فائنل لاہور میں ہو۔
ان خیالات کا اظہار انہوں نے لاہورمیں میڈیا سے گفتگو کرتے ہوئے کیا، انہوں نے کہا کہ چیئرمین پی سی بی شہریارخان کا کہنا ہے کہ ناصر جمشید کے خلاف شواہد موجود ہیں جو برطانیہ کو بھی دئیے جا چکے ہیں۔
شہریار خان نے کہا معطل کھلاڑیوں کو مؤقف پیش کرنے کا پورا موقع دیا جائے گا، کھلاڑیوں نے جرم تسلیم کرلیا تو کوئی کمیشن نہیں بنےگا ان کو مثالی سزائیں دیں گے تاکہ آئندہ کوئی کھلاڑی ایسی حرکت نہ کر سکے۔
شہریا ر خان نے کہا کہ پی ایس ایل کا فائنل لاہور میں کرانے کی خواہش ہے۔ غیرملکی سیکورٹی ماہرین بھی معائنے کے لیے آرہے ہیں۔
ان کا کہنا تھا کہ آرمی چیف جنرل قمر جاوید باجوہ نے پی ایس ایل کے فائنل کے حوالے سے فول پروف سیکیورٹی کو یقینی بنانے سے متعلق بیان دے کر زبردست کام کیا، چیئرمین پی سی بی نے لیگ کے فائنل کیلئے سپورٹ کرنے پر آرمی چیف جنرل قمر جاوید باجوہ کا بھی شکریہ ادا کیا۔
لاہور: پی سی بی کے چیئرمین شہریار خان نے کہا ہے کہ پی ایس ایل پر کوئی دھبہ نہیں آنے دیں گے، فائنل کے بعد ڈسپلنری کمیٹی بنائی جائے گی، شرجیل خان اور خالد لطیف کو شوکاز نوٹس جاری کیا جارہا ہے جب کہ عرفان کو شوکاز دینا ممکن ہے۔
لاہور میں پریس کانفرنس کرتے ہوئے چیئرمین پاکستان کرکٹ بورڈ کا کہنا تھا کہ جائلز کلارک نے پاکستان کی سیکیورٹی سے متعلق اپنی رپورٹ جاری کی ہے جس میں لاہور کو محفوظ شہر قرار دیا گیا ہے اور کہا گیا ہے کہ پاکستان سے دہشت گردی 83 فیصد کم ہوئی، جائلز کلارک نے تجویز کیا ہے کہ دنیا بھر کی کرکٹ ٹیموں کو پاکستان جانا چاہیے۔
شہریار خان کا کہنا تھا کہ پی ایس ایل کا فائنل لاہور میں ہونا ہمارے لیے ایک اعزاز ہے، فائنل کو بھرپور سپورٹ ملنی چاہیے۔
پاکستان سپر لیگ کے حوالے سے انہوں نے کہا کہ ہر شخص کو پی سی ایل میں دلچسپی ہے،ہم بھی پی ایس ایل کو بہت اہمیت دیتے ہیں، اسی لیے اسپاٹ فکسنگ کا پتا چلنے پر دو کھلاڑیوں کو اسپاٹ فکسنگ میں ملوث ہونے پر فوری طور پر پاکستان واپس بھیجا۔
چیئرمین پی سی بی کا کہنا تھا کہ شرجیل اور خالد جس پرواز سے وطن واپس آئے میں بھی اسی پرواز سے وطن واپس آیا، ایئرپورٹ پر اترنے کے بعد دونوں کھلاڑیوں کو خوب شرمندہ کیا،شرجیل اور خالد لطیف کو شوکاز نوٹس دیا جارہا ہے،اگر شواہد نہ ہوتے تو فوراً کھلاڑیوں کو واپس نہ بلاتے، دونوں کھلاڑیوں کوصفائی کا پورا موقع بھی دیا جائے گا۔
ان کا کہنا تھا کہ دو سے تین مزید لڑکوں پر بھی توجہ تھی مگر وہ کلیئر ہیں تاہم محمدعرفان کے خلاف تحقیقات جاری ہیں ممکن ہے کہ عرفان کو بھی شوکاز نوٹس دے دیا جائے۔
شہریار خان نے کہا کہ آئی سی سی کے بگ تھری کا خاتمہ ہوگیا ہے جو کہ ایک بہترین اقدام ہے،آئی سی سی کا نیا قانون انتہائی اہم ہے،ہمیں معلوم تھا بھارت کی جانب سے اس کی مخالفت ہوگی تاہم بھارت کی پوزیشن مستحکم نہیں ہے کیونکہ اس کے ساتھ صرف سری لنکا ہے جبکہ دیگر ممالک آئی سی سی کے ساتھ کھڑے ہیں،آئی سی سی کے 10 رکن ممالک نے ہمارے حق میں ووٹ دیا ہے۔
انہوں نے کہا کہ ہم نے پاکستان سپر لیگ میں شرکت کرنے کے لیے بھارت کو بھی مدعو کیا تھا مگر اس نے وقت پر جواب نہ دیا ،سیریز میں تاخیر پر 20 کروڑ ڈالر کا نقصان ہوا۔
چیئرمین پی سی بی نے پاکستان سپر لیگ کے حوالے سے کہا کہ پی ایس ایل پر کوئی دھبہ نہیں آنے دیں گے ،پی ایس ایل کے فائنل کے بعد ڈسپلنری کمیٹی بنائیں گےجس میں سینئر جج کو کمیٹی کا سربراہ بنایا جائے گا۔
کراچی: پی سی بی کے چیئرمین شہریار خان نے کہا ہے کہ شرجیل خان اور خالد لطیف کے خلاف اسپاٹ فکسنگ کے ثبوت موجود ہیں، معاملے کی تحقیقات جاری ہے جس کے بعد حقائق سامنے لائیں گے۔
اپنے بیان میں چیئرمین پاکستان کرکٹ بورڈ(پی سی بی) شہریار خان نے کہا ہے کہ اسپاٹ فکسنگ کا معاملہ کرکٹ بورڈ کا نہیں پورے پاکستان کا ہے،پی سی بی اس معاملے پر سختی سے پیش آئے گی اور تحقیقات مکمل ہونے تک دونوں کھلاڑی معطل رہیں گے۔
انہوں نے بتایا کہ شرجیل خان دبئی سے کراچی میرے ساتھ فلائٹ میں آئے، دونوں کے خلاف ثبوت موجود ہیں، میں ان سے سخت ناراض ہوں اس لیے میری شرجیل سے کوئی بات نہیں ہوئی، دونوں کے خلاف تحقیقات جاری ہیں جس کے بعد ہی حقائق سامنے لائیں گے اگر جرم ثابت ہوا تو کھلاڑیوں کو سخت سزا دیں گے۔
ایک سوال پر انہوں نے کہا کہ محمد عامر کے معاملے پر آئی سی سی نے نرمی برتی تو ہم نے بھی کی۔
دبئی: آئی سی سی نے ٹی ٹوئنٹی کی نئی رینکنگ جاری کردی، کراچی کنگز کے عماد وسیم دنیا کے چوتھے بہترین بولر بن گئے۔
پاکستان کی ویسٹ انڈیز کے خلاف ٹی ٹونٹی سیریز میں کلین سویپ کے بعد آئی سی سی نے نئی رینکنگ جاری کردی ہے،جس میں ایک سو گیارہ پوائنٹس کے ساتھ پاکستان کی ساتویں پوزیشن برقرارہے۔ شکست کے باعث ویسٹ انڈیز کی تیسری سے چوتھی پوزیشن پر تنزلی ہوگئی۔
ویسٹ انڈیز کے خلاف ٹی ٹوئنٹی سیریز میں کراچی کنگز کے عماد وسیم تباہ کن بولنگ کے باعث آئی سی سی میں لمبی چھلانگ لگانے میں کامیاب ہوگئے، تینتیس درجہ بہتری کیرئیر بیسٹ چوتھے نمبر پر آگئے، عماد وسیم نے تین میچز میں نو شکار کئے اور سیریز کے بہترین کھلاڑی قرار پائے، ویسٹ انڈین سیموئل بدری کی ٹاپ سے تیسری پوزیشن پرتنزلی ہوگئی اورجنوبی افریقہ کے عمران طاہرنمبر ون بولربن گئے۔
بھارت کے جسپریپ بمرا دوسرے نمبر پر آگئے، سہیل تنویر انیس درجے ترقی کے ساتھ چھتیسویں پوزیشن پر پہنچ گئے، سیریز میں ایک سو ایک رنز بنانے پر بابراعظم چھیاسٹھ ویں اورخالد لطیف چورانویں پوزیشن پرآگئےہیں۔
دس درجے ترقی کے ساتھ شعیب ملک پنتالیس ویں سے پینتیس ویں پوزیشن پر آگئے، ٹیم رینکنگ میں نیوزی لینڈ پہلی، بھارت دوسری اور جنوبی افریقہ تیسری پوزیشن پر موجود ہے۔
لاہور : پاکستان کرکٹ بورڈ کے چیئرمین شہریار خان نے کہا ہے کہ قومی ٹیم کے ہیڈ کوچ مکی آرتھرکا ایک دو روزمیں پاکستان کا ویزہ لگ جائےگا۔
مکی آرتھر کی عدم موجودگی سے ٹریننگ پر فرق ضرور پڑا ہے۔ امید ہے کہ وہ آئندہ ہفتے کے دوران پاکستان پہنچ جائیں گے۔
ان خیالات کا اظہار انہوں نے لاہور میں میڈ یا سے گفتگو کرتے ہوئے کیا، شہریار خان کا کہنا تھا کہ بہترین کارکردگی کیلئے کھلاڑی بیٹنگ اور باؤلنگ ضرور کریں لیکن فیلڈنگ اور فٹنس پر بھی خاص توجہ دیں۔
انہوں نے کہا کہ محمد عامرکے ویزے سے متعلق سے پیر کو انگلش بورڈ سے بات کریں گے۔ لیکن پر امید ہیں کہ اس عمل میں کوئی رکاوٹ نہیں آئے گی اور محمد عامر کو ویزہ مل جائے گا۔
ان کا کہنا تھا کہ ماضی میں تمام بڑے کھلاڑی یونیورسٹیوں سے آئے ،کوشش ہے یونیورسٹیوں کی چیمپین شپ کرائی جائے۔
لاہور: چیئرمین پی سی بی شہریارخان نےعہدے سے علیحدگی کا فیصلہ کرلیا۔ استعفی پیٹرن ان چیف وزیراعظم کوبھجوا دیا، نجم سیٹھی کوبھی فارغ کرنے کافیصلہ کرلیاگیا۔
پی سی بی چیئرمین کے عہدے کا کانٹوں بھراتاج شہریارخان نے اتارنے کافیصلہ کرلیا، ذرائع نےدعوی کیاہے شہریارخان نے استعفی وزیراعظم کوبجھوا دیا، دو روز پہلے نجم سیٹھی شہریارخان کو منانے میں کامیاب رہے۔
چیئرمین نےمیڈیا سے بات کرتے ہوئے استعفی کی خبروں کی تردید کی، لیکن ذرائع کا کہنا ہےکہ شہریارخان نے کرکٹ بورڈ سے دوری اختیار کرنے کا فیصلہ کرکے استعفی پیٹرن چیف کوبھجوادیا۔
ایگزیکٹیو کمیٹی اورپی ایس ایل کے سربراہ نجم سیٹھی کی کرسی بھی خطرے میں پڑگئی، ذرائع نے دعوی کیاچڑیاوالے بابا کی بھی چھٹی ہونےوالی ہے۔
ذرائع نے دعویٰ کیا ہے کہ چیئرمین پی سی بی کیلئے بینکر، بزنس مین اورریٹائرڈآرمی افسر کے ناموں پرغورکیارہاہے، وزیراعظم نوازشریف دو ہفتوں میں اہم فیصلے کریں گے، تیرہ یا چودہ اپریل کو بورڈ آف گورنرز کے اجلاس میں پڑے پیمانےپراکھاڑپچھاڑکی توقع ہے۔
لاہور : پاکستان کرکٹ بورڈ کے چئیرمین شہریارخان نے ورلڈ ٹی ٹوئنٹی میں شرکت کیلئے کھلاڑیوں اور ٹیم مینجمنٹ کو تیاررہنے کی ہدایت کردی۔
تفصیلات کے مطابق ورلڈ ٹی ٹوئنٹی میں شرکت کے لئے پاکستان کرکٹ ٹیم کی تیاریاں مکمل ہیں۔ نیشنل کرکٹ اکیڈمی لاہور میں چئیرمین پی سی بی شہریار خان کی ٹی ٹوئنٹی ٹیم سے ملاقات کی۔
چئیرمین شہریار خان نے کھلاڑیوں کو توجہ کھیل پر مرکوز رکھنے کی ہدایت کی۔ ہیڈ کوچ وقار یونس، چیف سلیکٹر ہارون رشید اور دیگر کوچنگ اسٹاف کے لوگ بھی ملاقات میں شریک تھے۔
شہریار خان کا کہنا ہے کہ بھارت جانے کے لئے وفاقی حکومت کے گرین سگنل کا انتظار ہے۔ کھلاڑی تیار رہیں امید ہے اجازت جلد مل جائے گی۔
ذرائع کے مطابق حکومتی کلئیرنس کے بعد ٹیم کا آج رات کولکتہ کے لئے اڑان بھرنے کا امکان ہے۔ پاکستان کا بارہ مارچ کو وارم اپ میچ شیڈول ہے۔ جبکہ شاہین ٹورنامنٹ کا آغاز سولہ مارچ کو کوالیفائنگ ٹیم کے خلاف میچ سے کریں گے۔
لاہور: پی سی بی نے آئی سی سی کو اپنے تحفظات سے آگاہ کردیا، شہریارخان نے کہا ہے کہ پریشان کن صورتحال میں کھیلنا مشکل ہوگا۔
ورلڈ ٹی ٹوینٹی میں پاک بھارت میچ خطرے میں ہے پاکستان کرکٹ بورڈ نے آئی سی سی کو خدشات سے آگاہ کر دیا، پی سی بی کا کہنا ہے کہ آئی سی سی دھرم شالا میں پاکستانی ٹیم کی سکیورٹی کو یقینی بنانے میں کردار ادا کرے۔
شہریار خان چیئرمین پی سی بی شہریار خان نے اس سے پہلے بھارتی بورڈ کے سربراہ ششانک منوہر سے بھی ٹیلیفون پر اپنے تحفظات کا اظہار کیا تھا۔
شہریار خان پی سی بی کے مطابق مقامی حکومت کی جانب سے سیکیورٹی دینے سے انکار کو نظر انداز نہیں کیا جا سکتا اور ایسی پریشان کن صورتحال میں پاکستان ٹیم کا کھیلنا مشکل ہوگا۔
لاہور : محمد عامرکے معاملےپرمحمد حفیظ اوراظہرعلی میں معاملات طے پاگئے۔ شہریارخان کا کہنا ہے کہ دونوں کھلاڑی آج کیمپ میں حصہ لیں گے۔
تفصیلات کے مطابق چیئرمین پی سی بی شہریارخان نے محمدعامرکے معاملےپرمحمدحفیظ اوراظہرعلی کومنالیا۔ شہریارخان کا کہنا ہے کہ حفیظ اوراظہرعلی سے تین منٹ تک بات چیت ہوئی۔ پیار محبت سے سمجھایا کہ اس طرح آپ کا بھی نقصان ہوسکتاہے۔ محمدحفیظ اوراظہرعلی نے ملاقات میں تحفظات سے آگاہ کیا۔
شہریارخان نےبتایاکہ دونوں کھلاڑیوں کو محمدعامرکیساتھ کھیلنے میں کوئی ذاتی رنجش نہیں بلکہ اصولی اختلاف ہیں۔ دونوں کھلاڑی بورڈ کی پالیسی کیخلاف نہیں ہیں۔ حفیظ اور اظہر کل سے کیمپ جوائن کریں گے۔
ان کا کہنا تھا کہ محمد عامر نے کھلاڑیوں سے اپنی غلطی کی معافی بھی مانگی ہے۔ شہریارخان نے کہاکہ حفیظ اوراظہرعلی کل تربیتی کیمپ میں حصہ لیں گے۔
ذرائع کے مطابق دونوں اس سیشن میں حصہ لیں گے جس میں عامر نہیں ہوں گے۔ شہریارخان نے بتایاکہ محمدعامرنے پیغام دیاہےکہ اگر سنیئرکھلاڑی کھیلنے کوتیارنہیں توکیمپ چھوڑنے کوتیارہوں۔
علاوہ ازیں اے آروائی نیوزنے محمدعامرکے معاملے پراندرکی کہانی کاپتہ لگالیا۔ کیمپ میں محمدعامرروپڑے اورمعافی بھی مانگی۔ کہاکہ ٹیم اسپرٹ خراب ہوتی ہے توکیمپ چھوڑنے کوتیارہیں۔
محمدعامرنےمحمدحفیظ اورون ڈے کپتان اظہرعلی سےمعافی مانگ لی۔ دونوں نے عامرکو معاف کیا اورگلے بھی لگایا۔
