ریاض: سعودی اسپورٹس فیڈریشن کے تعاون سے مملکت میں دوسری قومی کرکٹ چیمپیئن شپ کا آغاز کیا جارہا ہے، گزشتہ برس منعقد ہونے والی چیمپیئن شپ کا انعقاد اہم کامیابیوں میں سے ایک ہے۔
اردو نیوز کے مطابق سعودی اسپورٹس فار آل فیڈریشن کا کہنا ہے کہ سعودی کرکٹ فیڈریشن کے تعاون سے دوسری قومی کرکٹ چیمپیئن شپ کا پورے سعودی عرب میں انعقاد ہو رہا ہے۔
سعودی فیڈریشن مملکت کے 11 شہروں میں 4 ماہ کے دوران کرکٹ میچوں کی میزبانی کرے گی، اس قومی کرکٹ چیمپیئن شپ میں 8 ہزار کھلاڑیوں اور شرکا کی آمد متوقع ہے۔
قومی کرکٹ چیمپیئن شپ کے لیے مملکت کے جن شہروں کو میزبانی دی گئی ہے ان میں ریاض، جدہ، دمام، جبیل، قصیم، تبوک، مدینہ منورہ، ینبع، ابہا، جیزان اور نجران شامل ہیں۔
مملکت بھر میں منعقد کی جانے والی چیمپیئن شپ میں شامل ہونے والے کھلاڑیوں کو بہترین مواقع ملنے کی توقع ہے جہاں ہر ٹیم کو ایک راؤنڈ ملے گا، ونر اور رنر اپ ٹیموں کو انعامات اور نقد رقم دی جائے گی۔
اس چیمپیئن شپ کے ذریعے کرکٹ سے محبت کرنے والوں اور کمیونٹی کے اراکین کو اپنی فٹنس کی سطح بلند رکھنے کے لیے حوصلہ افزائی ملتی ہے۔
فیڈریشن کے صدر شہزادہ خالد بن الولید بن طلال آل سعود نے کہا ہے کہ کرکٹ فیڈریشن میں قومی چیمپیئن شپ کا دوبارہ آغاز فیڈریشن کے لیے پرجوش لمحہ ہے۔ گذشتہ سال کا کرکٹ ایونٹ فیڈریشن کی مقبول ترین کرکٹ چیمپیئن شپ رہی ہے۔
انہوں نے کہا کہ کرکٹ کی سرگرمیاں مملکت میں رہنے والے غیر ملکیوں کو مشغول رکھنے اور جسمانی فٹنس کے معیار کو بلند کرنے کے علاوہ سماجی رابطوں کو مضبوط کرنے کا بھی بہترین ذریعہ ہے۔
سعودی عربین کرکٹ فیڈریشن کے چیئرمین شہزادہ سعود بن مشعل بن محمد آل سعود نے بھی سعودی فیڈریشن کے ساتھ اس تعاون کا خیر مقدم کرتے ہوئے کہا ہے کہ 2021 میں کھیلوں کے شعبے میں قومی کرکٹ چیمپیئن شپ کا انعقاد اہم کامیابیوں میں سے ایک ہے۔
واضح رہے کہ گزشتہ برس مملکت کے 9 شہروں کی 369 ٹیموں اور 15 کرکٹ ایسوسی ایشنز کے ذریعے ہزاروں کھلاڑیوں اور شرکا نے حصہ لیا تھا اور 14 ہفتوں تک 106 میدانوں میں قومی کرکٹ چیمپیئن شپ منعقد ہوئی جس میں 456 پیشہ ور اہلکاروں اور رضا کاروں نے خدمات انجام دیں۔
