دالیں صحت کیلئے انتہائی مؤثر اور اپنی غذائیت کے اعتبار سے بہت اہمیت کی حامل ہیں، یہ گوشت سے کسی طور بھی کم نہیں اس میں وہی اجزاء پائی جاتے ہیں جو گوشت میں موجود ہیں۔
دالیں پکانے کے بہت سے طریقے ہیں جس میں اس کے اندر سبزی کا گوشت ڈال کر بنایا جاتا ہے لیکن صرف دال بنائی جائے تو اس کا بھی اپنا الگ ہی مزہ ہے۔
اے آر وائی ڈیجیٹل کے پروگرام گڈ مارننگ پاکستان میں معروف اداکارہ سعدیہ امام نے چنے کی دال کو مزید ذائقہ دار بنانے کا بہت آسان سا طریقہ بیان کیا۔
انہوں نے کہا کہ میری والدہ نے چنے کی دال اور ملکہ مسور کو ذائقہ دار بنانے کے طریقے بتاتے ہوئے کہا تھا کہ انہیں جب بھی بناؤ اگر اس میں پودینہ نہیں ڈالا تو اس کا ذائقہ کھلے گا ہی نہیں۔
سعدیہ امام نے بتایا کہ دال کو مکمل طور پر پکانے کے بعد بھگار علیحدہ سے لگائیں جس کا طریقہ یہ ہے کہ ایک گڈی پودینہ کے پتے۔ ایک بڑی پیاز کے باریک سے ٹکڑے۔ موٹی والی لال مرچ اور ہری مرچ تیل میں ڈال کر اچھی طرح گرم کریں اور پھر دال کی ڈش پر یہ تڑکا ڈال دیں۔
اور جب آپ اس پودینے کی تڑکا لگی دال کو گرم گرم تندور کی روٹی کے ساتھ کھائیں گے تو آپ اس کے دیوانے ہوجائیں گے۔
