اسلام آباد: صدر مملکت عارف علوی نے چوہدری سرور کی برطرفی کی منظوری دے دی۔
تفصیلات کے مطابق صدر مملکت نے چوہدری سرور کی برطرفی کی منظوری کے ساتھ ساتھ عمر سرفراز چیمہ کی بطور گورنر پنجاب تعیناتی کی منظوری دے دی۔
صدر مملکت نے یہ منظوری آئین کے آرٹیکل 101 کے تحت دی ہے۔
چوہدری سرور نے عہدے سے برطرفی کے ردِ عمل میں وزیر اعظم کو تنقید کا نشانہ بناتے ہوئے کہا ہے کہ آپ ایک طرف کہتے ہیں بلیک میل نہیں ہوں گا، پھر اس شخص سے بلیک میل ہو رہے ہیں جس کے 9 ایم پی اے ہیں۔
گورنر پنجاب محمد سرور چوہدری عہدے سے برطرف
خیال رہے کہ پنجاب میں وزیر اعلیٰ کے چناؤ سے قبل گورنر پنجاب چوہدری سرور کو برطرف کر دیا گیا تھا، ذرائع کا کہنا ہے کہ گورنر پنجاب کو علیم خان گروپ سے رابطوں کی وجہ سے برطرف کیا گیا ہے۔
چوہدری سرور کے بارے میں وزیر اعظم کو اطلاعات تھیں کہ وہ علیم خان گروپ کو سپورٹ کر رہے ہیں، فواد چوہدری نے کہا چوہدری سرور اچھے آدمی ہیں، ان کے لیے بڑا احترام ہے، تاہم چوہدری سرور کی پرویز الہٰی کے ساتھ نہیں بن رہی تھی، اس لیے ہٹا دیاگیا۔
