Tag: Chaudhry Nisar Ali Khan

ٹیکسلا: سابق وزیر داخلہ چوہدری نثار علی خان نے کھل کر بات شروع کردی ہے، کہا نواز شریف کو فوج نے نہیں نکالا، انھیں فوج کے ساتھ لڑنے سے منع کیا تھا۔

ان خیالات کا اظہار انھوں نے ٹیکسلا، راولپنڈی میں جلسے سے خطاب کرتے ہوئے کیا، ان کا کہنا تھا نواز شریف کو کہا عدلیہ اور فوج سے لڑائی مت کرو تو کون سا جرم کر دیا۔

ٹیکسلا جلسے میں چوہدری نثار کا لہجہ جارحانہ نظر آیا، انھوں نے کہا زندگی کے 34 سال ایک ایسے شخص کی وفاداری میں دیے جس نے وقت آنے پر میری وفاداری کا احساس نہیں کیا۔

ان کا کہنا تھا کہ نواز شریف اور ان کے خاندان کا حجاب رکھا اور رکھنا بھی چاہتا ہوں، ایک سال تک یہ حجاب رکھا اور وزارت چھوڑ کر کونے میں بیٹھ گیا، چند لوگوں نے میرے اعتماد کو ٹھیس پہنچائی، وقت آیا تو انھوں نے مجھ سے بے وفائی کی۔

مسلم لیگ ن کے رہنما نے پارٹی کے خلاف بغاوت کا اعلان کردیا

چوہدری نثار نے کہا نواز شریف کے حواریوں کا ذکر کروں تو آپ کانوں کو ہاتھ لگائیں گے، یاجوج ماجوج بات کریں گے تو جواب دینے پر مجبور ہوں گا اور میرا جواب پھر کھلی جنگ ہوگی۔

انھوں نے اپنے حریف امیدوار کے متعلق برہمی سے کہا کہ جمعہ جمعہ آٹھ دن ہوئے صوبائی اسمبلی کا امیدوار ن لیگ میں آیا، میں 1985میں آیا تو ن لیگ کا کوئی نام لینے والا نہیں تھا بس ایک مسلم لیگی تھا، اب کہا جاتا ہے ن لیگ کے اصل نمائندے کو ٹکٹ دیا جائے گا۔

چوہدری نثار کا کہنا تھا کہ ایک بار کہہ دیا تو کہہ دیا، آزاد حیثیت سے الیکشن لڑوں گا، آج تک پارٹی ٹکٹ کے لیے درخواست نہیں دی، میرا ٹکٹ مخلوقِ خدا ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: سابق وزیرداخلہ اور مسلم لیگ ن کے رہنما چوہدری نثار نے کہا ہے کہ آدمی اگر پوزیشن میں نہ ہو، تو اس کے کردار کا احساس کرنا چاہیے۔

تفصیلات کے مطابق چوہدری نثار نے پریس کانفرس کرتے ہوئے کہا کہ ضرورت اس بات کی ہے کہ اچھی گورننس پر توجہ دی جائے، میں نے اپنے آبائی علاقے میں بہت سے ترقیاتی کام کرائے۔

مسلم لیگ ن کے رہنما نے کہا کہ سیاست پر تو باتیں کرتا رہتا ہوں، آج عوامی ایشو پر بات ہو تو بہتر ہے،  صرف عمارتیں بنانے سے کچھ نہیں ہوتا، بلکہ ضروری سہولتیں مہیا ہونی چاہیے، اپنے آبائی علاقے میں جو اسپتال بنارہا ہوں وہ پورے ڈسٹرکٹ کے لیے بڑا اسپتال ہوگا۔

چوہدری نثار نے کہا موجودہ حکومت کے صرف چھ ہفتے رہ گئے ہیں، انتخابات کے بعد جو بھی حکومت آئے گی وہ اس منصوبے کو آگے لے کر چلے گی۔ انھوں نے کہا کہ ایک دن خاموشی سے آکر معاملات دیکھوں گا۔

مسلم لیگ اچکزئی گروپ کے ساتھ نہیں چل سکتا، چوہدری نثار

انھوں نے اپنے بنائے ہوئے منصوبوں کا ذکر کرتے ہوئے کہا کہ میں نے کلر سیداں اور پنڈی تحصیل میں جو اسپتال بنوائے وہ خوش اسلوبی سے کام کر رہے ہیں، یہ تینوں اسپتال پنڈی اور ٹیکسلا تحصیل کی بھی ضرورتیں پوریں کریں گے۔

سابق وزیر داخلہ نے پریس کانفرنس میں لڑکیوں اور اور لڑکوں کے لیے کالج اور متعدد اسکولوں کی منظوری کا ذکر کرتے ہوئے کہا اپنے دور اقتدار میں جو بھی کرسکتا تھا کیا۔

ماضی کے برعکس چوہدری نثار کی یہ کانفرنس انتہائی مختصر تھی۔ ایک صحافی کے سوال پر وہ پریس کانفرنس چھوڑ کر چلے گئے۔

واضح رہے کہ چوہدری نثار نے اپنے تازہ بیان میں کہا تھا کہ وہ مسلم لیگ اچکزئی گروپ کے ساتھ نہیں چل سکتے۔ آج احتساب عدالت کے باہر ایک صحافی نے سابق وزیر اعظم نواز شریف سے تبصرے کے لیے استفسار کیا تو انھوں نے سوال کا گول مول جواب دے کر معاملہ نظر انداز کردیا۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔