Tag: Chaudhry Pervaiz Elahi

لاہور: چوہدری پرویز الہٰی نے کہا ہے کہ ہم نے پنجاب میں بلا مقابلہ سینیٹ الیکشن جتوایا، لیکن حکومت کی طرف سے پھر وہی پرانی خاموشی ہے۔

اے آر وائی نیوز کے مطابق پرویز الہٰی سے آج ڈسٹرکٹ بار منڈی بہاؤالدین کے وکلا کے ایک وفد نے ملاقات کی، جس کی سربراہی ایم پی اے ساجد خان بھٹی نے کی، چوہدری پرویز الہٰی نے ڈسٹرکٹ بار کے لیے چیک بھی دیا۔

اس موقع پر گفتگو میں انھوں نے کہا ہم تحریک انصاف کے اتحادی ہیں، ہماری طرف سے کبھی عدم اعتماد نہیں ہوگا، تاہم ہمارے ساتھ جو چیزیں طے کی گئی تھیں، ان پر عمل درآمد نہیں ہوا۔

پرویز الہٰی نے کہا مولانا فضل الرحمان کا معاملہ عمران خان کے کہنے پر ہم نے حل کیا، اس کے حل کے لیے چوہدری شجاعت اور میں نے بڑی محنت کی، سینیٹ الیکشن میں ولید اقبال اور جہانگیر ترین کی ہمشیرہ کو کامیاب کرایا، ورنہ یہ دونوں سیٹ ہار رہے تھے، بے شک ان سے پوچھ لیں۔

انھوں نے کہا آصف زرداری اور بلاول نے بلا مقابلہ سینیٹر منتخب کروانے میں اہم کردار ادا کیا، سسٹم کی بہتری کے لیے آصف زرداری اور بلاول بھٹو نے میری بات مان لی، اور ہم نے پنجاب میں بلا مقابلہ سینیٹ الیکشن جتوایا، لیکن حکومت کی طرف سے پھر وہی پرانی خاموشی ہے، الیکشن ختم ہو گیا تو کسی نے پوچھا تک نہیں۔

چوہدری پرویز الہٰی نے کہا پنجاب میں تبدیلی کا کوئی چانس نہیں، فی الحال اپوزیشن نے پکانے کے لیے کچھ اکٹھا نہیں کیا، جہانگیر ترین بھی تحریک انصاف کا حصہ ہیں، اور وہ پارٹی میں موجود ہیں، ان کے ساتھ کتنے ممبر ہیں یہ اسمبلی میں کھڑے ہوں گے تو پتا چلے گا، میرا ان سے کوئی رابطہ نہیں ہے۔

ان کا کہنا تھا جب ہم کسی کے ساتھ چلتے ہیں تو کسی کو دھوکا نہیں دیتے، ہم حکومت کے اتحادی ہیں لیکن ہمیں زیادہ مسائل کا سامنا کرنا پڑ رہا ہے، جب حکومت کو مشکل پڑتی ہے تو ہم ساتھ دیتے ہیں۔

نواز شریف سے متعلق انھوں نے کہا ن لیگ کی سیاست کی ساری کتاب نواز شریف کی ہے، باقی سب اس کتاب کے صفحات ہیں، مسلم لیگ ن نواز شریف کی پارٹی ہے اور وہی فیصلے کرتے ہیں، شہباز شریف ہو یا کوئی اور یہ نواز شریف کا بیانیہ ہے، جب کہ مریم نواز ہی ن لیگ کی وارث ہیں، وہ نواز شریف کی مکمل سپورٹ کے ساتھ لیڈ کر رہی ہیں۔

گجرات: مسلم لیگ (ق) کے مرکزی رہنما چوہدری پرویز الہٰی نے کہا ہے کہ نواز شریف دین کے غدار ہیں، 25 جولائی کو ن لیگ ماضی کی داستان بن جائے گی۔

ان خیالات کا اظہار انھوں نے گجرات میں ایک جلسے سے خطاب کرتے ہوئے کیا، ان کا کہنا تھا کہ نواز شریف نے دین کے ساتھ غداری کی، ان کا انجام قریب ہے۔

ق لیگ کے رہنما نے کہا ’الیکشن اور الیکشن کمیشن تو ٹھیک جا رہے ہیں لیکن شہباز شریف اور ن لیگ کی حالت خراب دکھائی دے رہی ہے۔‘

چوہدری پرویز الہٰی نے مزید کہا کہ نواز شریف کا بیانیہ ملک اور اداروں کے خلاف ہے، اب شریف خاندان کی چوری رنگے ہاتھوں پکڑی جا چکی ہے۔

انھوں نے عوام سے اپیل کی کہ پچیس جولائی ن لیگ کے خاتمے کا دن ہے اس لیے ووٹرز موسم کی پرواہ کیے بغیر پولنگ اسٹیشن جائیں اور ووٹ کاسٹ کریں۔

باپ بیٹی مل کر فوج اور عدلیہ پر حملے کر رہے ہیں: پرویز الٰہی

واضح رہے کہ چوہدری پرویز الہٰی این اے 69 گجرات سے الیکشن لڑ رہے ہیں، اس حلقے میں ان کا مقابلہ مسلم لیگ ن کے چوہدری مبشر حسین کے ساتھ ہے۔

یہ حلقہ چوہدری پرویز الہٰی کا پرانا انتخابی حلقہ ہے، یہاں پاکستان تحریک انصاف اور ق لیگ کا اتحاد بھی ہوا ہے، اس لیے حلقے پر ان کی گرفت مضبوط ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔