پاکستان میں اگر بڑھتی ہوئی مہنگائی کی بات کی جائے تو یوٹیلیٹی بلوں، پھلوں، سبزیوں اور دیگر روزمرہ کی اشیا کی قیمتیں آسمان سے باتیں کررہی ہیں، اس کے باوجود دنیا کے 3 سستے ترین شہر پاکستان میں موجود ہیں۔
رپورٹ کے مطابق ڈیٹا کمپنی نمبیو (Numbeo) کی طرز زندگی کے اخراجات کی سالانہ فہرست میں اس حوالے سے دعویٰ کیا گیا ہے۔
اس فہرست میں جنوری سے جون 2024 تک کے ڈیٹا کو پرکھا گیا اور نیویارک شہر کو بنیاد بنایا گیا۔
طرز زندگی کے اخراجات بشمول کرائے، سودا سلف، ہوٹلوں کی قیمتیں اور مقامی افراد کی قوت خرید جیسے شعبوں کو مدنظر رکھ کر دنیا بھر کے 218 شہروں کی درجہ بندی کی گئی۔
فہرست میں دعویٰ کیا گیا ہے کہ دنیا کے سستے ترین شہروں میں کراچی کا پہلا نمبر ہے، جو نیویارک کے مقابلے میں 81 فیصد سستا ہے جس کے بعد لاہور دوسرا سستا ترین شہر ہے۔
لاہور سے اوپر بھارتی شہر کولکتہ ہے جبکہ اسلام آبادکو دنیا کا چوتھا سستا ترین شہر قرار دیا گیا جو نیویارک سے 78.5 فیصد سستا ہے۔
مہنگے ترین شہر کی اگر بات کی جائے تو سوئٹزر لینڈ کے شہر جنیوا کو دنیا کا مہنگا ترین شہر قرار دیا گیا جو نیویارک کے مقابلے میں 1.7 فیصد زیادہ مہنگا ہے۔دوسرے نمبر پر جنیوا کے بعد سوئس شہر زیورخ رہا جبکہ تیسرے پر نیویارک کا نام سامنے آیا ہے۔
امریکی شہر سان فرانسسکو چوتھے نمبر ہے، جبکہ بوسٹن کو پانچویں مہنگے ترین شہر میں شامل کیا گیا ہے۔
پاکستان نے اپنے شہریوں کو لبنان چھوڑنے کی ہدایت کردی
فہرست کے مطابق چھٹے نمبر پر آئس لینڈ کا شہر Reykjavik رہا جس کے بعد 7 واں مہنگا ترین شہر واشنگٹن ڈی سی کو کہا گیا،امریکا کے 3 شہر Seattle، لاس اینجلس اور شکاگو بالترتیب 8 ویں سے 10 ویں مہنگے ترین شہروں میں شامل رہے۔
