کراچی : گورا قبرستان کے قریب ریسٹورنٹ سے ملزمان27ہزار روپے کا کھانا لے اڑے، مالک نے رائیڈر پر ملزمان کے ساتھ مل کر واردات کا الزام عائد کردیا۔
تفصیلات کے مطابق گزشتہ شب گورا قبرستان کے قریب واقع فوڈ مارکیٹ میں قائم ریسٹورنٹ پر دو افراد آئے جنہوں نے بوفے میں 5 ہزار روپے کا کھانا کھایا اور ساتھ میں لائے ہوئے آن لائن رائیڈر کو بھی اپنی طرف سے کھانا کھلایا، اس دوران انہوں نے 22 ہزار روپے کا کھانا پارسل کرنے کا بھی آرڈر دیا۔
ان ملزمان نے بھرپور طریقے سے کھانا کھایا اور کھانا ساتھ لے کر ان افراد نے اپنے ساتھ آئے رائیڈر کو ریسٹورنٹ میں یہ کہہ کر بٹھایا کہ وہ نیچے سے رقم لے کر آرہے ہیں، جس کے بعد وہ رفو چکر ہوگئے۔
ملزمان جاتے ہوئے آن لائن رائیڈر کا موبائل فون بھی ساتھ لے گئے تاہم کچھ دیر بعد جب وہ واپس نہ آئے تو رائیڈر اور ریسٹورنٹ منیجر کو تشویش ہوئی جس پر انہوں نے رائیڈر سے باز پرس کی تو اس نے بتایا کہ وہ رقم لینے گئے ہیں، انہوں نے اسے بھی کرائے کی ادائیگی کرنی ہے۔
مالک ریسٹورنٹ کا کہنا ہے کہ ملزمان نے آن لائن رائیڈر کو ساتھ ملا کر چونا لگایا ہے، تاہم پولیس کی جانب سے تفتیش کے بعد رائیڈر شفیق اللہ کو بے گناہ قرار دیا گیا ہے۔
رائیڈر شفیق اللہ کا کہنا ہے کہ ملزمان کورنگی میں چنیوٹ اسپتال سے رائیڈ پر ساتھ لائے تھے اور اسے لالچ دیا کہ کھانا کھانے کے بعد وہ اسے واپس چنیوٹ اسپتال کورنگی لے جائیں گے۔
