Tag: Chemicals

دودھ ایک مکمل غذا ہے یہ اینٹی آکسیڈینٹ کی خصوصیات سے بھر پور ہوتا ہے، اس کے استعمال سے جسمانی اور ذہنی نشوونما میں بہتر مدد ملتی ہے۔

لیکن آج کل دودھ پہلے زمانے کی طرح خالص نہیں ملتا بلکہ اس میں کئی طرح کی ملاوٹ کی جاتی ہے ان میں سنگھاڑے کا آٹا، کارن اسٹارچ، یوریا یا سرف اور پانی شامل ہیں۔

خراب دودھ یعنی ملاوٹ شدہ دودھ پینا صحت کو نقصان پہنچا سکتا ہے۔ درحقیقت میں دودھ میں پانی کے علاوہ بہت سے کیمیکل بھی ملائے جاتے ہیں، جس کی وجہ سے جسم جلد بیماریوں کا شکار ہوسکتا ہے۔

آپ گھر پر ہی اصلی اور نقلی دودھ کی آسانی سے شناخت کرسکتے ہیں، یہاں پر کچھ ایسے طریقے بتائے جارہے ہیں جن کی مدد سے آپ یہ کام گھر میں بھی کر سکتے ہیں اور صرف چند منٹ میں دودھ کے خالص یا ملاوٹ زدہ ہونے کے بارے میں جان سکتے ہیں۔

دودھ میں کتنا پانی ہے؟ :

خالص دودھ کی بات ہی الگ ہے مگر اس کی مقدار بڑھانے کے لئے دودھ والے جی کھول کر پانی ملاتے ہیں جو غلط ہے حالانکہ دودھ میں پانی ملا کر پینے سے آپ کی صحت کو کوئی نقصان نہیں ہوتا لیکن اس میں ایسے غذائی اجزاء نہیں ہوتے جن کی آپ کے جسم کو ضرورت ہوتی ہے۔

یہ جاننے کے لیے کہ دودھ میں پانی ملا ہے یا نہیں، دودھ کا ایک قطرہ جھکی ہوئی سطح (ڈھال) پر رکھیں اور اسے بہنے دیں۔ اگر دودھ سطح پر رہے اور آہستہ بہے تو اس میں پانی کم ہے اور اگر بہت تیزی سے بہتا ہے تو اس میں دودھ سے زیادہ پانی ہے۔

نقلی دودھ کی پہچان :

دودھ بیچنے والے کئی بار بہت زیادہ منافع کمانے کے لیے اس میں کیمیکل اور صابن جیسی چیزیں ملا کر مصنوعی دودھ یعنی جعلی دودھ بناتے ہیں۔

دودھ مصنوعی اس کی پہچان اس کے ذائقے سے کی جاسکتی ہے اس کے علاوہ اسے رگڑنے پر یہ صابن کی طرح محسوس ہوتا ہے اور گرم ہونے پر پیلا ہو جاتا ہے۔

دودھ کو ہلکی آنچ پر ابالیں:

آپ دودھ کو زیادہ دیر تک ہلکی آنچ پر ابال کر بھی اس کی اصلی پن کا اندازہ لگا سکتے ہیں۔ اس کے لیے دودھ کو ہلکی آنچ پر 2-3 گھنٹے تک ابالیں جب تک کہ یہ گاڑھا نہ ہو جائے۔ اگر دودھ کے ذرات گاڑھے اور سخت ہوں تو اس کا مطلب ہے کہ دودھ میں ملاوٹ ہے جبکہ گھی اور نرم ذرات کا مطلب ہے کہ یہ اچھی کوالٹی کا دودھ ہے۔

دودھ میں اسٹارچ ہے یا نہیں؟

اگر آپ کے بیچنے والے نے دودھ میں اسٹارچ ملایا ہے تو آپ 5 ملی لیٹر دودھ میں دو کھانے کے چمچ نمک (آیوڈین) ملا کر اس میں ملاوٹ کی جانچ کر سکتے ہیں۔ اگر دودھ میں اسٹارچ ہو تو ایسا کرنے سے دودھ پر نیلے رنگ کا مکسچر آجائے گا اور اگر اس میں ملاوٹ نہ ہو تو سفید رنگ ہی رہے گا۔

  دودھ میں یوریا ہے یا نہیں :

بلا شبہ دودھ میں یوریا کی ملاوٹ آپ اور آپ کے خاندان کی صحت کے لیے خطرناک ہے، یہ بات قابل ذکر ہے کہ اگر دودھ میں یوریا ملایا جائے تو اس کے ذائقے میں کوئی تبدیلی نہیں ہوتی، اس لیے اس کی شناخت قدرے پیچیدہ ہے۔

تاہم، اب آپ اسے آسانی سے پہچان سکتے ہیں، اس کے لیے آپ کو آدھا کھانے کا چمچہ دودھ اور سویا بین پاؤڈر ملا کر اچھی طرح ہلانا ہوگا۔

پانچ منٹ کے بعد لٹمس پیپر کو اس مکسچر میں تیس سیکنڈ کے لیے ڈبو دیں اگر لٹمس پیپر کا رنگ نیلا ہو جائے تو سمجھ لیں کہ دودھ میں یوریا ملا دیا گیا ہے۔