کراچی : چیف میٹرولوجسٹ نے خبردار کیا ہے کہ شمال سے چلنے والی ہواؤں نے کراچی کا رخ کرلیا ہے ، جس کے باعث آئندہ3روزتک رات میں سردی کی شدت برقرار رہے گی۔
تفصیلات کے مطابق چیف میٹرولوجسٹ سردارسرفراز نے کہا ہے کہ شمال سےچلنےوالی ہواؤں نے کراچی کارخ کیا ہے، شمالی علاقوں سے ٹھنڈی ہوائیں سندھ میں داخل ہوئیں، جس کے باعث کراچی کا کم سے کم درجہ حرارت 15ڈگری سینٹی گریڈ رہا جبکہ سندھ کے بیشتر اضلاع میں کم سےکم درجہ حرارت 10ڈگری ریکارڈ کیا گیا۔
سردارسرفراز کا کہنا تھا کہ آئندہ3روزتک رات میں سردی کی شدت برقراررہے گی اور تین دن بعد ایران کے راستے ہوائیں پاکستان میں داخل ہوں گی ، ایران سے داخل ہونیوالی ہواؤں سے اندرون سندھ ہلکی بارش کا امکان ہے۔
مزید پڑھیں : کراچی میں سردی لوٹ آئی
خیال رہے کراچی میں موسم سرما کا آغاز ہوگیا ہے ، صبح کے درجہ حرارت میں واضح کمی کے باعث خنکی میں اضافہ ہوا، محکمہ موسمیات کا کہنا تھا کہ شہر میں علی الصبح درجہ حرارت19ڈگری سینٹی گریڈ ریکارڈ کیا گیا، سمندری ہوائیں بحال ہونے کے بعد نمی کے تناسب میں واضح کمی واقع ہوئی۔
محکمہ موسمیات کے مطابق شہر کا مطلع جزوی طور پر ابرآلود رہے گا، صبح وشام کے اوقات میں ٹھنڈی ہواؤں کے باعث موسم سرد اور خشک ہوگا۔
یاد رہے تین روز قبل ہی محکمہ موسمیات نے بتایا تھا کہ سمندری طوفان ماہا کراچی سے 675 کلوميٹر دور ہے، کراچی ميں7 نومبر سے جزوی سردی کی لہر داخل ہوگی ، سردی کی اس لہر کے دوران درجہ حرارت18 سے 20 ڈگری تک جاسکتا ہے۔
