بیجنگ: چین میں عدالت نے ایک کینیڈین بزنس مین کو جاسوسی کے الزام پر 11 سال قید کی سزا سنا دی۔
تفصیلات کے مطابق چین کی ایک عدالت نے جاسوسی کرنے پر کینیڈا کے ایک کاروباری شخص مائیکل سپیور کو گیارہ سال جیل کی سزا سنا دی ہے۔
چین کے شہر ڈانڈونگ کے انٹرمیڈیٹ پیپلز کورٹ نے اپنے بیان میں کہا ہے کہ مائیکل سپیور کو جاسوسی اور غیر قانونی طور پر ریاست کے راز افشا پر مجرم قرار دیا گیا تھا۔
دوسری طرف چین میں کینیڈین سفیر نے سزا کے فیصلے پر برہمی کا اظہار کیا ہے، اور الزام لگایا ہے کہ اس سزا کا تعلق ہواوے کی افسر مینگ وینزو کے خلاف کینیڈا کے شہر وینکوور میں چلنے والے مقدمے سے ہے۔
کینیڈا کی حکومت نے بدھ کو سنائے گئے اس فیصلے کی مذمت کی ہے، اے ایف پی کے مطابق مائیکل سپیور اور ان کے ساتھی کینیڈین مائیکل کوورگ کو 2018 میں حراست میں لیا گیا تھا، کینیڈین حکومت کا دعویٰ ہے کہ ان دونوں کو دھوکے سے گرفتار کیا گیا تھا۔
کینیڈین حکومت کا کہنا ہے کہ امریکی حوالگی کے وارنٹ پر ہواوے کمپنی کی ایک افسر مینگ وینزو کی کینیڈا میں گرفتاری کے بعد چین نے دونوں کینیڈین شہریوں کو گرفتار کیا ہے۔ خیال رہے کہ دونوں ممالک کے درمیان تعلقات مزید خراب ہو گئے ہیں، چین نے یہ بھی الزام لگایا ہے کہ کینیڈا مقدمات کو سیاسی رنگ دے رہا ہے۔
