Tag: China

بیجنگ: ہر وقت اسمارٹ فون سے چپکے رہنے والے بیٹے نے گھر کے کام کے لیے اٹھائے جانے پر ایسی حرکت کی کہ والدین ہکا بکا رہ گئے۔

تفصیلات کے مطابق چین کے انہوئی صوبے کے علاقے مآنشن میں ایک شخص نے اپنے 14 سالہ بیٹے کو گھر کے کام کے لیے فون سے اٹھایا اور فون بھی لے لیا، تاہم لڑکا کام کرنے کی بجائے سیدھا پولیس اسٹیشن پہنچ گیا۔

چینی میڈیا رپورٹس کے مطابق لڑکے نے پولیس اسٹیشن میں اپنے والدین کے خلاف شکایت کی کہ والدین اس سے چائلڈ لیبر کروانا چاہتے ہیں، جس پر پولیس اہل کاروں نے اس کے ساتھ گھر جا کر معاملے کی تفتیش کی۔

معلوم ہوا کہ والد کو اپنے بیٹے کے ہر وقت اسمارٹ فون پر لگے رہنے سے بے حد فکر لاحق ہوئی تھی، انھوں نے بچے کو پڑھائی پر توجہ دینے کے لیے کہا تو اس نے بات نہیں مانی، آخر والدین نے سبق سکھانے کے لیے بیٹے کو گھر کے کچھ کام کے لیے کہہ دیا۔

لیکن بیٹے نے تھانے میں شکایت کر کے والد کو وضاحت کرنے کی پوزیشن میں کھڑا کر دیا، دراصل اسمارٹ فون نہ ملنے سے ناراض بیٹے نے گھر کا کام تو نہیں کیا بلکہ پولیس اسٹیشن جا کر پولیس سے کہا کہ میرے والد مجھ سے غیر قانونی طریقے سے بچہ مزدوری کراتے ہیں۔

جب پولیس نے لڑکے کے گھر جا کر حالات کا جائزہ لیا، تو بیٹے کے ساتھ پولیس کو دیکھ کر دنگ رہنے والے والدین نے پولیس کو اصل واقعہ بتایا، اور کہا کہ وہ صرف تھوڑی دیر کے لیے بیٹے کا دھیان فون سے ہٹانا چاہتے تھے۔

خیال رہے کہ بچوں سے مزدوری کرانا چین میں ممنوع ہے، تاہم گھر کے کام کاج کو بچہ مزدوری کے زمرے میں شامل نہیں کیا جاتا، بہ صورت دیگر لڑکے کی شکایت پر والدین کو جیل ہو جاتی۔

دوسری طرف پولیس کو جب لڑکے کی اسمارٹ فون لت کے بارے میں پتا چلا تو انھوں نے والد کو مشورہ دیا کہ وہ اپنے بیٹے کو ڈسپلن سکھائیں، انھوں نے یہ بھی کہا کہ اسمارٹ فون کو بھی لڑکے سے دور رکھا جائے۔ یہ واقعہ چین کی سوشل میڈیا پر وائرل ہو چکا ہے۔

بیجنگ: چین نے امریکا کو پیغام دیا ہے کہ وہ دنیا کے سامنے ہمارا بُرا تاثر پیش کرنا بند کرے۔

تفصیلات کے مطابق چین کے نائب وزیر خارجہ ژی فینگ نے امریکا پر زور دیا ہے کہ وہ دنیا کے سامنے چین کا بُرا تاثر پیش کرنا بند کرے۔

فرانسیسی خبر رساں ادارے اے ایف پی کے مطابق امریکی نائب وزیر خارجہ وینڈی شرمن چین کے دورے پر اتوار کو شہر تیانجن پہنچی تھیں، یہ صدر جو بائیڈن کی انتظامیہ کا چین میں پہلا اعلیٰ سطح کا دورہ ہے۔

اس دورے کا مقصد دونوں ممالک کے درمیان تعلقات کو صحیح سمت میں لانا ہے، دنیا کی دو عالمی طاقتوں کے تعلقات سائبر سیکیورٹی سے لے کر انسانی حقوق تک کئی مسائل پر خراب ہو رہے ہیں۔

چین کے نائب وزیر خارجہ اور وینڈی شرمن کے درمیان ہونے والی بات چیت کے بعد وزارت خارجہ نے جاری بیان میں کہا ہے کہ ممکنہ طور پر امید کی جا رہی ہوگی کہ چین کا بُرا تاثر پیش کر کے امریکا کسی طرح چین کو اپنے پیدا کردہ مسائل کا قصوروار ٹھہرایا جا سکتا ہے، لیکن ہم امریکا پر زور دیتے ہیں کہ وہ اپنی انتہائی گمراہ کن ذہنیت اور خطرناک پالیسی کو تبدیل کرے۔

وزارت خارجہ چین نے دونوں ممالک کے تعلقات کو ’تعطل‘ اور ’سنگین مشکلات‘ سے دوچار قرار دیا ہے، ادھر اپنے دورہ چین کے دوران وینڈی شرمن چینی وزیر خارجہ وینگ یی سے بھی ملاقات کریں گی۔ امریکا نے گزشتہ ہفتے امید ظاہر کی تھی کہ ان مذاکرات کے ذریعے چین کو دکھایا جا سکے گا کہ ’ذمہ دارانہ اور صحت مندانہ مقابلہ کیسا ہوتا ہے‘ لیکن ایسا کرتے ہوئے ’تنازعے‘ سے بھی بچنا ہے۔

وینڈی شرمن اپنے دورے کے دوران بیجنگ نہیں جائیں گی، البتہ دو دن تیانجن میں گزاریں گی، جو کہ چین کا شمال مشرقی شہر ہے۔