ARYNews.tv | Urdu – Har Lamha Bakhabar

Tag: China

  • چین : کوئلے کی کان بیٹھنے سے 21 مزدور ہلاک

    چین : کوئلے کی کان بیٹھنے سے 21 مزدور ہلاک

    بیجینگ : چین کے صوبے شانسی میں کوئلے کی کان افسوس ناک حادثہ پیش آیا جس کے نتیجے میں 21 افراد ملبے تلے دب کر ہلاک ہوگئے۔

    غیر ملکی خبررساں ادارے کے مطابق چین کے شمال مغربی صوبے شانسی میں کوئلے کی کان اچانک بیٹھ گئی جس کے نتیجے میں 21 افراد ہلاک ہوگئے جبکہ درجنوں کو زندہ بچالیا گیا۔

    ریسکیو حکام کا کہنا تھا کہ کان میں کل 87 مزدور موجود تھے، ریسکیو آپریشن کے دوران پہلے 19 افراد کی لاشیں نکالی گئی تھیں بعد میں مزید 2 افراد کی لاشیں اور نکالیں گئیں۔

    کوئلے کی کان میں کام کرنے والے ایک ڈرائیور نے غیر ملکی خبر رساں ادارے سے گفتگو کررتے ہوئے بتایا کہ کان بہت چھوٹی تھی جو اچانک بیٹھ گئی تاہم ابھی تک کان بیٹھنے کی وجوہات سامنے نہیں آئیں ہیں لیکن واقعے کی تحقیقات جاری ہیں۔

    خیال رہے کہ چین میں کوئلے کی بیشتر کانیں نجی اداروں و کمپنیوں کے زیر انتظام ہیں جس کے باعث وہاں حفاظتی انتظامات نہیں ہیں یا نہ ہونے کے برابر ہیں وہ آئے روز حادثات کا باعث بنتے ہیں۔

    مزید پڑھیں : چین میں کان کے قریب دھماکہ‘ 11 افراد ہلاک

    یاد رہے کہ گزشتہ برس جون میں چین کے لیاؤننگ صوبے میں لوہے کی کان کے دروازے کے قریب بارود سے بھرا ٹرک پھٹنے سے 11 افراد جان کی بازی ہار گئے تھے جبکہ 9 زخمی اور 25 افراد ملبے تلے پھنس گئے تھے۔

    مزید پڑھیں : چین: کوئلے کی کان میں لفٹ گرگئی‘ 17 کان کن ہلاک

    مارچ 2017 میں شمال مشرقی چین کے صوبے میں کوئلے کی کان میں کام کرنے والے کان کن لفٹ کے ذریعے ایک جگہ سے دوسری جگہ منتقل ہو رہے تھے کہ اچانک لفٹ گر گئی، جس کے نیتجے میں 17 چینی کان کن موقع پر ہی جان کی بازی ہار گئے۔

  • پاکستان اور چین کے نوجوانوں پر مشتمل یوتھ کمیٹی کے قیام کا فیصلہ

    پاکستان اور چین کے نوجوانوں پر مشتمل یوتھ کمیٹی کے قیام کا فیصلہ

    اسلام آباد : وزیراعظم عمران خان کی نوجوانوں کے لئےکوششیں رنگ لانے لگیں، پاکستان اور چین کے نوجوانوں پر مشتمل یوتھ کمیٹی کے قیام کا فیصلہ کرلیا گیا ، چین نے پاکستانی نوجوانوں کے وفد کو دورہ چین کی دعوت بھی دی، عثمان ڈار کا کہنا ہے کہ چین کی جانب سےدعوت نامہ ملنانوجوانوں کے لئے بڑی کامیابی ہے۔

    تفصیلات کے مطابق وزیراعظم عمران خان کے دورہ چین کے مثبت اثرات نظر آنے لگے، پاکستان چین میں نوجوانوں کی فلاح وبہبود کے لئے سرکاری سطح پر اقدامات کا آغاز کر دیا اور دونوں ممالک کے نوجوانوں پر مشتمل یوتھ کمیٹی کے قیام کا فیصلہ کیا ہے، کمیٹی کے قیام کا فیصلہ وزیراعظم کے دورہ چین کے نتیجے میں کیاگیاہے۔

    [bs-quote quote=” چین نے پاکستانی نوجوانوں کے وفد کو دورہ چین کی دعوت دے دی ” style=”style-6″ align=”left”][/bs-quote]

    چین نے پاکستانی نوجوانوں کےوفدکودورہ چین کی دعوت دی ہے اور تحریری طور پر پاکستانی دفترخارجہ کو آگاہ کردیا ہے۔

    معاون خصوصی عثمان ڈاراور چینی سفیر نے ملاقات میں معاملات کو حتمی شکل دی ، عثمان ڈار نے کہا نوجوانوں کے درمیان تجربات کا تبادلہ اور رابطوں کو بڑھایاجائےگا، وزیراعظم کی ہدایت پر نوجوانوں کے لئے تاریخی اقدامات کررہے ہیں۔

    معاون خصوصی کا مزید کہنا تھا کہ چین کی جانب سےدعوت نامہ ملنانوجوانوں کےلئےبڑی کامیابی ہے، ملائیشیااورجرمنی سمیت دیگرممالک سےبھی رابطے جاری ہیں، نوجوانوں کوترقی کےمیدان میں آگےدیکھناچاہتےہیں، سرکاری سطح پرچین کی دعوت قبول کرلی گئی ہے۔

    یاد رہے 27 دسمبر 2018 کو نوجوانوں کی فلاح و بہبود سے متعلق پہلا اجلاس ہوا تھا ، اجلاس کے لیے پہلی مرتبہ چاروں صوبوں کے یوتھ منسٹرز، مشیر اور سیکریٹریز اکٹھے ہوئے تھے، جس میں صوبائی حکومتوں نے وفاق کے ساتھ مل کر پالیسی بنانے پر اتفاق کیا گیا تھا۔

    اس موقع پر وزیر اعظم کے معاون خصوصی برائے یوتھ افیئرز عثمان ڈار کا کہنا تھا کہ نوجوان ملک کا سرمایہ ہیں ان کا مستقبل محفوظ بنائیں گے، روزگار کی فراہمی کے لیے جامع منصوبہ بندی کرلی گئی ہے ، نوجوانوں کو نظر انداز کرنے کا سلسلہ ختم کر رہے ہیں۔

    اس سے قبل وزیراعظم عمران خان کا کہنا تھا کہ نوجوانوں کو تعلیم، صحت اور روزگار کی فراہمی حکومت کی اولین ترجیح ہے، نوجوان ملک کی تقدیر بدل سکتے ہیں۔

    خیال رہے کہ عثمان ڈار کو اکتوبر میں وزیر اعظم یوتھ پروگرام کا چیئرمین تعینات کیا گیا تھا، بعد ازاں انہیں وزیر اعظم عمران خان نے اپنا معاون خصوصی برائے یوتھ افیئرز مقرر کیا تھا۔

    وزیر اعظم نے نوجوانوں کے لیے قومی پالیسی لانے کا فیصلہ بھی کیا تھا، پالیسی کی تیاری کا ٹاسک عثمان ڈار کے سپرد کیا تھا۔

  • آئی فون کے لیے گردہ فروخت، مذاق نہیں حقیقت

    آئی فون کے لیے گردہ فروخت، مذاق نہیں حقیقت

    بیجنگ : جدید ٹیکنالوجی سے لیس آئی فون خریدنے کا شوق ہر نوجوان کو ہوتا ہے تاہم چین میں ایک نوجوان نے آئی فون خریدنے کےلیے اپنا گردہ فروخت کردیا جس کے باعث وہ زندگی بھر کےلیے معذور ہوگیا۔

    تفصیلات کے مطابق چین کے غریب صوبے ہوننان کا رہائشی ایک نوجوان نے آٹھ سال قبل ریلیز ہونے والے آئی فون 4 سے متاثر ہوکر اسے خریدنے کا فیصلہ کیا لیکن ژیاؤ وینگ کے مالی حالات کے باعث آئی فون 4 غریب طالب کی پہنچ سے باہر تھا۔

    غیر ملکی میڈیا کا کہنا ہے کہ ژیاؤ نامی 17 سالہ چینی نوجوان نے آئی فون 4 خریدنے کی خاطر کالا بازار(بلیک مارکیٹ) میں اپنا ایک صحت مند عضو (گردہ) ڈیڑھ لاکھ (ین) 7ہزار 8 سو پاؤنڈ میں فروخت کرکے رقم کا 10 فیصد (22ہزار ین) میڈل مین کو دیئے۔

    غیر ملکی میڈیا کے مطابق ژیاؤ وینگ نے فوری طور پر ایک آئی فون 4 اور ایک آئی پیڈ خریدا لیکن بعد ازاں نوجوان کے اس فیصلے نے اس کی زندگی تباہ کردی۔

    ژیاؤ وینگ ایک گردہ فروخت کرنے کے بعد گردوں کا مریض ہوگیا اور اب ڈائلیسس مشین سے اپنا خون صاف کروانے کا محتاج ہے۔

    غیر ملکی میڈیا کے مطابق ژیاؤ وینگ انسانی اعضاء کے اسمگلر نے کہا تھا کہ وہ ایک گردے پر بھی زندہ رہ سکتا ہے تاہم جس غیر قانونی آپریشن تھیٹر میں انسانی اعضاء کا سوداگر 17 سالہ طالب علم کو لے کر گیا تھا وہاں صفائی کا نظام سرے سے تھا ہی نہیں، جس کے باعث ژیاؤ کے زخم میں انفیکشن ہوگیا۔

    میڈیا ذرائع کا کہنا ہے کہ چینی طالب علم نے اپنی خراب صحت سے متعلق اپنے اہل خانہ کو آگاہ نہیں کیا تاہم کچھ روز بعد صحت مزید خراب ہوئی حقیقت سب کے سامنے آگئی۔

    انفیکشن کے باعث ژیاؤ وینگ کا دوسرا گردہ بھی بیکار ہوگیا اور وہ مستقل ڈائلائیسس کا محتاج ہوگیا، متاثرہ نوجوان کے والدین نے بیٹے خراب صحت دیکھتے ہوئے انسانی اعضاء کے اسمگلر کو تلاش کیا اور اس کے خلاف مقدمہ درج کردیا۔

    ذرائع کا کہنا ہے کہ سنہ 2012 میں پولیس نے ژیاؤ وینگ کے والدین کی شکایت پر کارروائی کرے ہوئے تین میڈل مین اور دو ڈاکٹرز سمیت 9 افراد کو گرفتار کرکے عدالت میں پیدا کیا.

    چینی عدالت نے تینوں میڈل مین کو تین سے پانچ برس قید اور دو ڈاکٹرز کو تین تین سال قید کی سزا سنائی اور متاثرہ نوجوان کو ہرجانے کا حکم دیا جس کے بعد انسانی اعضاء کے سوداگروں نے 1 لاکھ 69 ہزار ڈالرز ہرجانے کے طور پر ادا کیے جس سے ژیاؤ وینگ کا علاج جاری ہے۔

    غیر ملکی خبر رساں ادارے کا کہنا ہے کہ چینی نوجوان کی گردہ فروشی کے باعث معذوری کی خبر سوشل میڈیا پر وائرل ہوئی تو سوشل میڈیا صارفین کی جانب سے اصل قصوروار چینی طالب علم کو ٹھرایا گیا جس نے ایک موبائل کی صحت مند عضو فروخت کردیا جس کی قیمت برقی آلے سے کہیں زیادہ تھی۔

  • رنگوں اور روشنیوں سے سجا دنیا کا سب سے بڑا آئس فیسٹیول

    رنگوں اور روشنیوں سے سجا دنیا کا سب سے بڑا آئس فیسٹیول

    چین کے شہر ہربن میں دنیا کا سب سے بڑا آئس فیسٹیول منعقد کیا جارہا ہے جسے دیکھنے کے لیے دنیا بھر سے لوگ کھنچے چلے آرہے ہیں۔

    رنگا رنگ آتش بازی سے شروع کیے جانے والے اس فیسٹیول میں برف سے بے شمار مجسمے اور عمارتوں کی نقول تیار کی جاتی ہیں جس کے لیے 1 لاکھ 20 ہزار کیوبک میٹر ٹھوس برف اور 1 لاکھ 11 ہزار کیوبک میٹر نرم برف استعمال کی جاتی ہے۔

    اس فیسٹیول کے لیے دنیا بھر سے تعلق رکھنے والے ہزاروں فنکاروں نے دن رات کام کیا ہے۔

    فیسٹیول میں رات کے وقت مجسموں کو روشنیوں میں نہلا دیا جاتا ہے جس کے بعد یہ حصہ رنگ و روشنی سے منور ہوجاتا ہے۔

    اس فیسٹیول میں تیراکی کا مقابلہ بھی منعقد کیا جاتا ہے جس میں شرکا کو ٹھنڈے پانی میں تیراکی کرنی ہوتی ہے۔

    ہربن مشرقی ایشیا کا سرد ترین شہر ہے جہاں جنوری میں درجہ حرارت منفی 12 سینٹی گریڈ تک چلا جاتا ہے، اس سردی کے باوجود دنیا بھر سے ہزاروں لوگ اس فیسٹیول کو دیکھنے آتے ہیں۔

  • پانچ ممالک اقوام متحدہ کی سیکیورٹی کونسل کے نئے رکن بن گئے

    پانچ ممالک اقوام متحدہ کی سیکیورٹی کونسل کے نئے رکن بن گئے

    نیویارک: اقوام متحدہ کی سیکیورٹی کونسل کے لیے نئے اراکین کا چناؤ ہوا جس میں پانچ ممالک کونسل کے نئے رکن بن گئے۔

    تفصیلات کے مطابق بیلجیئم، جرمنی، انڈونیشیا، جنوبی افریقہ اور ڈومینیکن ری پبلک اقوام متحدہ کی سیکیورٹی کونسل کے نئے رکن بن گئے۔

    پانچوں نئے اراکین ممالک کے پرچم کونسل چیمبر پر لگا دیئے گئے، جبکہ بولیویا، ایتھوپیا، نیدرزلینڈ، قزاقستان، سویڈن کی سیکیورٹی کونسل کی مدت ختم ہوگئی۔

    15 رکنی سیکیورٹی کونسل اقوام متحدہ کی سب سے طاقتور کونسل ہے، چین، فرانس، روس، برطانیہ ، امریکا ویٹوپاور کے ساتھ کونسل کے مستقل رکن ہیں۔

    مستقل اراکین کے علاوہ دو سال کے لیے مزید اراکین کا چناؤ 193 رکنی جنرل اسمبلی کرتی ہے۔

    خیال رہے کہ گذشتہ سال جنوری میں اقوام متحدہ کی سلامتی کونسل نے چھ نئے غیر مستقل ارکان کا چناؤ کیا گیا تھا۔

    واضح رہے کہ اکوٹوریل گنی، آئروی کوسٹ، کویت، نیدرلینڈز، پیرو اور پولینڈ کو گذشتہ سال جنرل اسمبلی کے 193 ارکان نے دو سال کی میعاد کے لیے منتخب کیا تھا۔

    اقوام متحدہ کے طاقتور ترین ادارے پر مامور رہنے کے دوران اِن ارکان کو بین الاقوامی امن اور سیکیورٹی کے معاملات سے نبردآزما ہونے کے حوالے سے موثر آواز حاصل ہوتی ہے۔

    مصر، جاپان، سنیگال، یوکرین اور یوروگوائے نے سال 2017 میں اپنی دو سالہ میعاد پوری کی تھی۔

  • چین پاکستان کو 2 ارب ڈالر دے گا: برطانوی اخبار

    چین پاکستان کو 2 ارب ڈالر دے گا: برطانوی اخبار

    لندن: برطانوی اخبار کا دعویٰ ہے کہ چین پاکستان کو معاشی بحران کا شکار نہیں ہونے دینا چاہتا لہٰذا چین پاکستان کو 2 ارب ڈالر دے گا، امداد کا باقاعدہ اعلان نہیں کیا گیا۔

    برطانوی اخبار فنانشل ٹائمز میں شائع رپورٹ کے مطابق چین پاکستان کو 2 ارب ڈالر دے گا، رقم زرمبادلہ ذخائر میں اضافے کا باعث بنے گی۔

    برطانوی اخبار کا کہنا ہے کہ چین پاکستان کو معاشی بحران کا شکار نہیں ہونے دینا چاہتا۔ چین کی جانب سے اس مدد کا باقاعدہ اعلان نہیں ہوا۔

    برطانوی اخبار کے مطابق پاکستان مالی بحران پر انٹرنیشنل مانیٹری فنڈ (آئی ایم ایف) سے بات چیت کر رہا ہے۔ آئی ایم ایف حکام سے مذاکرات دوبارہ جنوری کے آخر میں ہوں گے۔
    سعودی عرب اور متحدہ عرب امارات نے بھی مالی بحران میں مدد کی ہے۔

    خیال رہے کہ وزیر اعظم عمران خان نے مسند اقتدار سنبھالنے کے بعد نومبر میں پہلا دورہ چین کیا تھا جس میں دونوں ممالک کے درمیان دو طرفہ تعاون کے 15 معاہدوں اور یادداشتوں پر دستخط کیے گئے تھے۔

    ذرائع کے مطابق چین کی جانب سے ڈیڑھ ارب گرانٹ اور ڈیڑھ ارب قرضہ دیے جانے کا امکان ہے جبکہ سی پیک کے لیے 3 ارب ڈالر اضافی ملنے کا امکان ہے۔

  • دنیا بھر میں نئے سال کا شاندار استقبال، آتش بازی کا بھرپور مظاہرہ، شہر دلہن کی طرح سج گئے

    دنیا بھر میں نئے سال کا شاندار استقبال، آتش بازی کا بھرپور مظاہرہ، شہر دلہن کی طرح سج گئے

    لندن: دنیا بھر میں نئے سال کا شاندار استقبال کیا گیا، تاریخی مقامات پر بھرپور آتش بازی کا مظاہرہ ہوا اور شہریوں نے رات گئے خوب ہلا گلا کیا۔

    تفصیلات کے مطابق لندن میں دریائے ٹیمز پر دل کو موہ لینے والا آتش بازی کا مظاہرہ ہوا، پیرس کی شاہراہ شانزے لیزے روشنیوں سے جگمگا اٹھی، جبکہ یونان کے شہر ایتھنز میں دلفریب آتشبازی نے دل موہ لیے۔

    ماسکو میں بھی آتشبازی کرکے نئے سال کو خوش آمدید کہا گیا، نئے سال کے جشن کی آخری تقریب نیویارک کے ٹائم اسکوائر پر منائی جائیگی جسے ایک ارب افراد براہ راست ٹی وی پر دیکھ سکیں گے۔

    دنیا بھر میں نئے سال کی آمد پر رات کے بارہ بجتے ہی آسمان رنگوں اور روشنیوں سے جگمگا اٹھا، سال نو کا سب پہلے شاندار استقبال نیوزی لینڈ میں ہوا جہاں آکلینڈ کے سٹی ٹاور پر شاندار آتشبازی سے آسمان جگما اٹا، معروف گھڑیال بگ بینگ کے بارہ بجاتے ہی شروع ہوا۔

    دریائے ٹیمز پر آنکھوں کو خیرہ کرنے والی آتشبازی اور موسیقی کے تڑکے نے ماحول کو سحر انگیز بنا دیا، پیرس میں شاہراہ شانزے لیزے پر سال نو کا جشن دھوم دھام سے منایا گیا۔

    روس کے دارالحکومت ماسکو میں سال نو کے آغاز پر آتش بازی کے شاندار مظاہرے سے کیا گیا، آسٹریلیا میں سڈنی ہاربر پر خراب موسم کے باوجود لاکھوں افراد نے دوہزار انیس کو خوش آمدید کہا، دبئی میں نئے سال کی تقریب میں برج الخلیفہ کو رنگ اور روشنیوں میں نہلا دیا گیا۔

    یونان کے شہر ایتھنز اور ہانگ کانگ کے وکٹوریہ ہاربر پر ہونے والی آتش بازی کو دیکھنے کے لیے ہزاروں افراد جمع ہوئے۔

    چین کے دارالحکو مت بیجنگ میں بھی آسمان روشنیوں سےجگمگانے لگا ، برازیل میں ریو ڈی جنیرو کے کوپا کبانا کے مشہور بیچ پر لاکھوں افراد نے نئے سال کو خوش آمدید کہا۔

  • پاکستانی صحافیوں کے لیے چین میں 7 روزہ تربیتی ورکشاپ کا انعقاد

    پاکستانی صحافیوں کے لیے چین میں 7 روزہ تربیتی ورکشاپ کا انعقاد

    بیجنگ: پاکستان کے مختلف شہروں سے تعلق رکھنے والے 10صحافیوں نے حال ہی میں چین کے دارالحکومت بیجنگ کا دورہ کیا اور وہاں کی قدیم رینمن یونیورسٹی کے زیراہتمام 7روزہ تربیتی ورکشاپ میں حصہ لیا۔

    تفصیلات کے مطابق چین میں ہونے والے تربیتی کورس کیلئے یونیورسٹی کے انتہائی ماہر اور مستقبل شناس لیکچررز کا انتخاب کیا گیا جنہوں نے دوطرفہ ترقی میں دونوں ممالک کے کلیدی کردار کے علاوہ تعلقات کو درپیش ممکنہ بیرونی خدشات پر پاکستانی صحافیوں کے ساتھ تفصیلی تبادلہ خیالات کیا، ان لیکچررز میں ایگزیکٹو وائس ڈین ژونگ ژن، ایسوسی ایٹ پروفیسرزژوکوئی،شوجن کوئی،ہوانگ وی،اسسٹنٹ پروفیسر ژوگوانگ جیا شامل تھے جنہوں نے نہ صرف پاک چائنہ راہداری بلکہ ترقی کے آئندہ روڈ میپ پر مفصل لیکچر دیئے۔

    علاوہ ازیں دورے کے دوران پاکستانی صحافیوں کو چینی اخبار(چائنہ ڈیلی) اور چینی ریڈیو براڈکاسٹ( چائنہ ریڈیو انٹرنیشنل) کے علاوہ چائنہ نیٹ اور سوشل میڈیاہب(سینا) کے دفاتر کا بھی دورہ کرایا گیا۔دونوں ممالک کے نشریاتی اور اشاعتی اداروں کے درمیان تعاون کو فروغ دینے کے لیے یہ انتہائی کارآمد کاوش رہی۔

    پاکستانی صحافیوں نے بتایا کہ چینی ذرائع ابلاغ میں جدید ٹیکنالوجی کا استعمال انتہائی متاثر کن ہے جس سے کم سے کم وقت میں معیاری خبروں کی دنیا بھر کے کونے کونے تک باآسانی رسائی یقینی بنائی جاسکتی ہے ، چینی میڈیا کے نمائندوں نے اس موقع پر بتایا کہ چین کا ذرائع ابلاغ پاکستانی سیاحت اور ثقافت کو اجاگر کرنے اور معیشت کی بہتری کیلئے اہم کردار ادا کررہا ہے اور یہ دونوں ممالک کے درمیان فاصلے مٹانے کیلئے ایک اہم پیشرفت اور مثبت قدم ہے۔

    چینی ثقافت اور سیاحت سے واقفیت کیلئے پاکستانی صحافیوں کو بھی بیجنگ کے کئی اہم ورثوں اور مقامات کا دورہ کرایا گیا جن میں لاؤشے ٹی ہاؤس، شی شا ہائے،قومی گرینڈ تھیٹر،چاؤہینگ تھیٹر ،شہرممنوعہ اور دیوارچین شامل ہیں۔

    تربیتی سیشن میں پاکستان اور چین کے صحافیوں نے دونوں ممالک کے میڈیا ورکرز کے درمیان قریبی تعاون پر زور دیا ہے تاکہ عوامی اور سرکاری سطح پر تجارت اور ثقافت سمیت باہمی تعلقات کی مزید بہتری میں کردار ادا کیا جاسکے۔

  • کرپشن میں ملوث سابق چینی انٹیلی جنس چیف کو عمر قید کی سزا

    کرپشن میں ملوث سابق چینی انٹیلی جنس چیف کو عمر قید کی سزا

    بیجنگ : عدالت نے چین کے سابق انٹیلی جنس چیف کو کرپشن رشوت ستانی اور کرپشن کیسز میں عمر قید کی سزا سنادی۔

    غیر ملکی خبر رساں ادارے کے مطابق سابق انٹیلی جنس چیف ’ماجیان‘ سنہ 2015 سے زیر تفتیش تھے اور کمیونسٹ پارٹی نے ماجیان کو زیر تفتیش آنے کے ایک سال بعد نکال دیا گیا تھا۔

    چین کے شمال مشرقی صوبے لیاؤنگ کی عدالت کا کہنا ہے کہ سابق انٹیلی جنس چیف کے اعتراف جرم کرنے اور کرپشن الزامات ثابت ہونے پر سزا سنائی گئی ہے، ماجیان عدالتی فیصلے کے خلاف اپیل نہیں کرسکتے۔

    خیال رہے کہ چینی صدر انسداد کرپشن مہم کے تحت اب تک کئی اعلیٰ حکام کو کرپشن میں ملوث ہونے کے باعث سزائیں ہوچکی ہیں۔

    سابق انٹیلی جنس چیف ’ماجیان‘ چین کے نائب وزیر برائے قومی سلامتی (اسٹیٹ سیکیورٹی) تھے۔

    غیر ملکی میڈیا کا کہنا ہے کہ ماجیان کے کیس کا تعلق چین کے مفرور اور جلاوطن بزنس مین گؤ ونگوئی سے ہے، جس نے کمیونسٹ پارٹی کے اعلیٰ عہدیداران پر کرپشن الزامات کی پوری سیریز شائع کی تھی۔

    غیر ملکی خبر رساں ادارے کا کہنا ہے کہ سابق انٹیلی جنس چیف نے اپنے عہدے کا استعمال گؤ ونگوئی کی مدد کےلیے کیا تھا۔

    واضح رہے کہ چینی صدر ژی جن پنگ نے سنہ 2012 میں اقتدار سنبھالنے کے بعد انسداد کرپشن مہم کا آغاز کیا تھا جس کے تحت اب تک 10 لاکھ سے زائد افراد کو سزا دی جاچکی ہے۔

    مزید پڑھیں : کرپشن اور رشوت خوری کا الزام، انٹرپول چیف کا مستعفیٰ ہونے کا اعلان

    یاد رہے کہ دو ماہ قبل پراسرار طور پر لاپتہ ہونے والے انٹرپول کے سربراہ مینگ ہونگ کو چین نے تفتیش کے لیے حراست میں لینے کی تصدیق کی تھی جس کے بعد انہوں نے اپنا استعفیٰ انٹرپول کو ارسال کیا تھا۔

  • چین امریکا تجارتی جنگ، دونوں فریقین نے ملاقات کا عندیہ دے دیا

    چین امریکا تجارتی جنگ، دونوں فریقین نے ملاقات کا عندیہ دے دیا

    واشنگٹن: چین اور امریکا کے درمیان جاری تجارتی جنگ کی شدت میں کمی کا امکان ہے، دونوں فریقین نے جلد ملاقات کا عندیہ دیا ہے۔

    تفصیلات کے مطابق چینی اور امریکی حکام کے اعلیٰ حکومتی نمائندے اگلے سال جنوری میں ملاقات کریں گے، جس میں تجارتی جنگ کے خاتمے پر گفتگو ہوگی۔

    غیر ملکی خبر رساں ادارے کے مطابق دونوں حکومتوں کی جانب سے ملاقات کی حتمی تاریخ کا اعلان نہیں کیا گیا، تاہم یہ اہم ملاقات تجارتی جنگ کے خاتمے میں معاون ثابت ہوگی۔

    دونوں فریقین کی جانب سے اہم ملاقات جنوری میں ہوگی، علاوہ ازیں چین اور امریکا کے اعلیٰ عہدیداران تجارتی جنگ کے خاتمے سے متعلق مسلسل رابطے میں ہیں۔

    چینی حکام کا کہنا ہے کہ امریکا میں ان دنوں کرسمس کی چھٹیاں ہیں، اس کے باجود دونوں ممالک کے معاشی ماہرین رابطے میں ہیں، معاملات حل کرکے مضبوط معاشی مستقبل کا سوچنا ہے۔

    تجارتی جنگ تھم گئی، چین اور امریکا کا نئے ٹریڈ ٹیرف عائد نہ کرنے پر اتفاق

    اس سے قبل امریکی صدر ڈونلڈ ٹرمپ نے چینی ہم منصب شی جن پنگ سے ارجنٹینا کے دارالحکومت بیونس آئرس میں ملاقات کی تھی، اس دوران دونوں ممالک کے صدرو نے تجارتی جنگ کے خاتمے پر تبادلہ خیال کیا تھا۔

    واضح رہے کہ امریکی صدر ڈونلڈ ٹرمپ اور ان کے چینی ہم منصب شی جن پنگ نئے تجارتی محصولات 90 دنوں کے لیے معطل کرنے پر اتفاق کیا تھا تاکہ دونوں ممالک مذاکرات سے معاملات حل کرسکیں۔

    یاد رہے کہ یکم دسمبر کو چین کے سرکاری ٹی وی نے کہا تھا کہ یکم جنوری کے بعد سے کوئی محصول نہیں لگے گا اور دونوں ممالک کے درمیان بات چیت جاری رہے گی۔