بیجنگ : چینی وزارت خارجہ کا کہنا ہے کہ چین نے پاکستان کوٹڈی دل پر قابو پانے کی اشیا فراہم کی ہیں ، کرونا اور ٹڈی دل سے نمٹنے کے لئے پاکستان کی مدد کرتے رہیں گے۔
تفصیلات کے مطابق چینی وزارت خارجہ کی جانب سے جاری بیان میں کہاگیا ہے کہ کرونا اور ٹڈی دل سے نمٹنے کے لئے پاکستان کی مدد کرتے رہیں گے، چین نے پاکستان کوٹڈی دل پرقابوپانے کی اشیا فراہم کی ہیں، جس میں کرونا وائرس ٹیسٹنگ کٹس،جراثیم کش اسپرے،دیگرچیزیں شامل ہیں۔
گزشتہ روز ٹڈی دل سے نمٹنے کے لیے چین سے بڑی تعداد میں امداد پاکستان پہنچی تھی، امداد میں 50ٹن ادویات اور 15اسپرے مشینیں شامل تھیں جبکہ چین سے کرونا کے ٹیسٹ کی 12ہزار خصوصی کٹس بھی آئی ہیں۔
مزید پڑھیں : چین نے وعدہ پورا کردیا، بڑی امداد پاکستان پہنچ گئی
حالیہ دنوں پاکستان میں ٹڈی دل کے مسئلے پر چینی وفد نے دورہ کیا تھا، اس موقع پر چین نے ٹڈی دل کے خاتمے کے لیے ہر ممکن مدد اور سہولت فراہم کرنے کا بھی اعلان کیا تھا۔
خیال رہے کہ چینی سفیر نے پاکستان میں ٹڈی دل تلف کرنے کے لیے تعاون کی یقین دہانی کراتے ہوئے کہا تھا پہلے مرحلے میں 300ٹن ادویات آئندہ ہفتے پاکستان پہنچ جائے گی۔
