Tag: chinese president trip to pakistan

اسلام آباد: ہمسایہ ملک چین کے صدر نے رواں میں کیا جانے والا دورہِ پاکستان ملتوی کردیا ہے، دورہ ملتوی کرنے کی وجوہات اسلام آباد میں امن و امان کی صورتِ حال کا خراب ہونا بتایا جارہا ہے۔

اے آر وائی نیوز کے نمائندے شاہد رانا کے مطابق چینی صدر شی جن پنگ نے پندرہ ستمبر کو پاکستان آنا تھا ۔ چین سے آئی ہوئی سیکیورٹی ٹیم کی جانب سے کلئیرنس نہ ملنے پر ملتوی کیا گیا ہے۔

ذرائع کے مطابق اس سے پہلے چینی صدر کے دورے کے موقع پر ان کی مصروفیات اور دیگر سرگرمیاں لاہور منتقل کرنے کی تجویز بھی سامنے آئی تھی لیکن یہ تجویز منظور نہیں کی گئی۔

اسلام آباد میں پاکستان عوامی تحریک اور پاکستان تحریک ِ انصاف کی جانب سے دئے گئے دھرنوں کے باعث امن و امان کی مخدوش صورتحال کے پیشِ نظر وفاقی دارالحکومت مین موجودچین کی سیکیورٹی ٹیم نے کلیئرنس نہیں دی۔

اے آروائی نیوز کے بیورو چیف (اسلام آباد) صابر شاکر نے بتایا کہ چینی صدر کا دورہ ملتوی ہونے کا با ضابطہ اعلان دفترِ خارجہ نے نہیں کیا بلکہ وفاقی حکومت کے ذرائع سے یہ اطلاع موصول ہوئی ہے اور دورہ عارضی طور پر ملتوی کیا گیا ہے۔

سابق صدر آصف علی زرداری نے دورہ ملتوی ہونے پر افسوس کا اظہار کرتے ہوئے کہا ہے کہ حکومت شیڈول کو ری شیڈول کرائے۔