اسلام آباد: چینی صدر شی چن پنگ آج پارلیمنٹ کے مشترکہ اجلاس سےخطاب کریں گے۔
چین کے صدر شی چن پنگ آج پارلیمنٹ کے مشترکہ اجلاس سے خطاب کریں گے، چینی صدر کو نشان پاکستان سےبھی نوازا جائے گا، وزیر اعظم نواز شریف، اسپیکر قومی اسمبلی سردار ایاز صادق اور چیئرمین سینیٹ رضا ربانی چینی صدر کا استقبال کریں گے۔
وزرائے اعلیٰ ، گورنر ، مسلح افواج کے سربراہ ، سفارت کار اور دیگر اہم شخصیات پارلیمنٹ کے مشترکہ اجلاس میں بطور مہمان شرکت کریں گے۔
چینی صدر کے مشترکہ پارلیمنٹ کے اجلاس سے خطاب کے بعد قائد حزب اختلاف خورشید شاہ اظہارِ خیال کریں گے اور پھر وزیرِاعظم نوازشریف پارلیمنٹ سے خطاب کریں گے۔
چین کے صدر، ایوان میں تمام پارلیمانی سربراہوں ،اسپیکرقومی اسمبلی اور چیئرمین سینیٹ سےملاقات کریں گے۔
چینی صدرآج گرین پارلیمنٹ سولر پاور پراجیکٹ کا افتتاح بھی کریں گے، منصوبے کی مجموعی لاگت 66 کروڑ ہوگی۔
گزشتہ روز وزیرِاعظم نوازشریف اور چینی صدر شی جن پنگ نے آٹھ ترقیاتی منصوبوں کی نقاب کشائی کی جبکہ دونوں ملکوں کے درمیان مفاہمت کی اکاون یادداشتوں پر دستخط کئے گئے۔
چینی صدر کا تاریخی دورۂ پاکستان میں وزیرِاعظم نوازشریف اور چینی صدرشی جن پنگ نے بجلی کے پانچ منصوبوں سمیت آٹھ ترقیاتی منصوبوں کا افتتاح کیا، پاک چین اقتصادی تکنیکی معاہدے پر دستخط بھی کیے گئے، آپٹیکل فائبرمنصوبوں کا بھی آغاز کردیا گیا ہے، پنجاب میں نو سو میگا واٹ کےشمسی توانائی کےمنصوبے کا سنگ بنیاد رکھا گیا جبکہ شاہراہ قراقرم کی اپ گریڈیشن کی مفاہمتی یاداشت پر بھی دستخط کیے گئے، پاک چین مفاہمت کی اکیاون یادداشتوں پر بھی دستخط کیے گئے۔
جن منصوبوں کا افتتاح کیا گیا ان میں میٹرو ٹرانزٹ سسٹم ،اورنج لائن لاہور کا منصوبہ بھی شامل ہیں، بہاولپور میں سو میگاواٹ کے سولر پارک، اسلام آباد میں ایف ایم ریڈیو نائنٹی ایٹ دوستی چینل، ڈی ٹی ایم بی براڈکاسٹنگ ،اسمال ہائیڈرو پاور مشترکہ ریسرچ، پاک چین ثقافتی مرکز کے قیام،انڈسٹریل اینڈ کمرشل بینک آف چائنا کی لاہور برانچ اور سات سو بیس میگاواٹ کے پن بجلی منصوبے کا بھی افتتاح کیا گیا۔
یاد رہے کہ چینی صدر کا طیارہ جب پاکستانی حدود میں داخل ہوا تو پاک فضائیہ کے طیاروں نے اپنے حصار میں لے لیا تھا، معزز مہمان کو اکیس توپوں کی سلامی دی گئی جبکہ جے ایف سترہ تھنڈرطیاروں نے فلائی پاسٹ کیا۔
نورخان ایئربیس پر چین کے صدرشی چن پنگ کا فقیدالمثال استقبال کیا گیا اور اکیس توپوں کی سلامی دی گئی، صدر ممنون حسین اور وزیرِاعظم نوازشریف نے چین کے صدر کا استقبال کیا۔
معزز مہمان کو مسلح افواج کے چاق و چوبند دستوں نے سلامی دی، چین کے صدر شی چن پنگ نے گارڈ آف آنر کا معائنہ کیا اور مسلح افواج کے سربراہان، وفاقی وزراء سے مصافحہ کیا۔
صدر شی چن پنگ چین کی خاتون اول، سینئروزرا،کمیونسٹ پارٹی کےاعلیٰ حکام کے ہمراہ پاکستان آئے ہیں۔ چین کی بڑی کمپنیوں کے سربراہان بھی چینی صدر کے ہمراہ ہیں۔
