اسلام آباد / کراچی / لاہور / پشاور / کوئٹہ : عیسائی برادری برادری کا مذہبی تہوار کرسمس آج عقیدتوں احترام سے منایا جا رہا ہے، ملک میں بھر میں کرسمس کی تیاریاں عروج پر پہنچ گئیں، مسیحی برادری کی خوشی کے موقع پر وزیراعظم نواز شریف نے مسیحی برادری کو بھی خوشخبری سنادی، اس موقع پر سیکیورٹی کے فول پروف انتظامات کیے گئے ہیں۔
تفصیلات کے مطابق دنیا بھر کےمسیحی پچیس دسمبر کو حضرت عیسٰی کایوم ولادت مناتےہیں گرجاگھروں میں خصوصی عبادت سےدن کاآغازکرتے ہیں، مسیحی براداری اپنے مذہبی تہوار کو منانے کے لئے پرجوش ہیں۔
پاکستان میں بھی کرسمس کا تہوار مذہبی جوش و جذبے سے منایا جا رہا ہے، اس موقع پر گرجا گھروں میں خصوصی دعائیہ تقریبات منعقد کی جائیں گی، جس میں ملک پاکستان کی ترقی اور خوشحالی کیلیے دعائیں مانگی جائیں گی۔
علاوہ ازیں مسیحی برادری کے تہوار پر وزیراعظم نواز شریف نے بجلی کی لوڈشیڈنگ نہ کرنے کی ہدایت کر دی ہے، کراچی میں رینجرز حکام نے سیکیورٹی کی حکمت عملی تیار کرلی، رینجرز اہلکار گرجا گھروں سمیت اہم مقامات پر تعینات کئے گئے ہیں۔
فیصل آباد میں اسلحہ لہرانے اور ہوائی فائرنگ پر پابندی عائد کردی گئی، کوئٹہ میں پولیس نے سیکیورٹی پلان مرتب کرلیا۔ پشاور میں بھی کرسمس بھرپور طریقے سے منانے کی تیاری ہوگئی، کسی نے رشتے داروں سے ملنا ہے تو کوئی بال کٹواکر ہیرو بن رہا ہے۔
پاکستان ریلوے کی جانب سے مسیحی برادری کے لیے خوبصورت رنگوں سے مزین تحفہ کرسمس ٹرین ہر سو خوشیاں بانٹ رہی ہے کرسمس ٹرین میں تین گیلریز اوردو فلوٹس ہیں جن پر جگمگ کرتا کرسمس ٹری اورتہوار سے متعلق اشیا سجائی گئی ہیں قائد کے اقوال بھی ٹرین کا حصہ ہیں۔
ٹرین کی ایک گیلری میں پاکستان میں موجود مشہور اور بڑے گرجا گھروں کے ماڈلز رکھے گئے ہیں ۔ ٹرین میں پاکستان کےمسیحی ہیروز کی تصاویرلگا کر انہیں خراج تحسین پیش کیا گیاہے۔ سرخ رنگ سےمزین ٹرین پرسانتا کلاز اور اسنو مین بھی بنائے گئے ہیں پاکستان ریلوے کی کرسمس ٹرین امن کاپیام لے کر چل پڑی ہے،جگمگ کرتی یہ ٹرین چھوٹے بڑے کئی شہروں سے ہوتے ہوئے اکتیس دسمبر کوآخری منزل کراچی پہنچے گی۔
لاہور میں مسلم لیگ نون کی جانب سے کرسمس کے موقع پر کرسمس بازار سجا کر مسیحی برادری سے یکجہتی کا اظہار کیا گیا۔ حکمران جماعت نے لاہور میں کرسمس کے موقع پر دیگر تقریبات کے ساتھ ساتھ اپنے ضلعی آفس میں کرسمس کیک کاٹا اور مسیحی برادری کیلئے کرسمس بازار کا انعقاد کیا۔
تقریب میں لارڈ میئر کرنل ریٹائرڈ مبشر جاوید اور صوبائی وزراء نے خصوصی شرکت کی۔ تقریب سے خطاب کرتے ہوئے کرنل ریٹائرڈ مبشر جاوید کا کہنا تھا کہ اسلام رواداری اور امن کا درس دیتا ہے۔ مسلم لیگ نون کی حکومت اس سلسلے میں عملی اقدامات اٹھا رہی ہے۔
انہوں نے مسیحی برادری کو کرسمس پر خصوصی مبارکباد دیتے ہوئے کہا کہ وہ پاکستان کی تعمیر و ترقی میں اپنی کوششیں جاری رکھے۔
