لاہور: یوحنا آباد چرچ دھماکوں میں ملوث مزید پانچ دہشتگردوں کو گرفتار کر لیا گیا ہے۔
ذرائع کے مطابق حساس ادارے نے سانحہ یوحنا آباد کے پانچ دہشت گردوں کو حراست میں لے کر انھیں مزید تفتیش کے لیے سی آئی اے پولیس کے حوالے کردیا ہے، گرفتار پانچوں مبینہ دہشت گرد خود کش حملہ آوروں کے سہولت کار تھے اور ان کے قبضے سے نقشہ جات سمیت دیگر اہم سامان برآمد کرلیا گیا ہے، گرفتار ہونے والے پانچوں افراد نے خودکش حملہ آوروں کو رہائش فراہم کی تھی اور ان کو حملہ کی جگہ پہنچایا تھا۔
پانچوں مبینہ دہشت گردوں کو سی آئی اے پولیس نے تفتیش کے لیے نامعلوم مقام پر منتقل کردیا ہے، ملزمان سے تفتیش جاری ہے۔
واضح رہے کہ کزشتہ برس یوحنا آباد چرچ پر ہونے والے دو خودکش دھماکوں میں پندرہ افراد ہلاک اور ستر سے زائد زخمی ہوئے تھے اور اس کی ذمہ داری تحریک طالبان نے قبول کی تھی۔
