راولپنڈی : پاک چین مشترکہ فضائی مشقیں شاہین نو جاری ہیں، چیئرمین جوائنٹ چیفس آف اسٹاف کمیٹی جنرل ندیم رضا نے مشقیں دیکھیں۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) میجر جنرل بابر افتخار کی طرف سے جاری کردہ بیان کے مطابق چیئرمین جوائنٹ چیفس آف اسٹاف کمیٹی جنرل ندیم رضا نے پاک فضائیہ کی آپریشنل بیس کا دورہ کیا۔
آئی ایس پی آر کے مطابق ایئر بیس پہنچنے پر سربراہ پاک فضائیہ مجاہد انور خان نے جنرل ندیم رضا کا پرتپاک استقبال کیا۔ اس موقع پر گفتگو کرتے ہوئے جوائنٹ چیفس آف اسٹاف کمیٹی کا کہنا تھا کہ مشقوں سے دونوں ممالک کی فضائیہ باہمی تجربات سےاستفادہ کررہی ہیں۔
یاد رہے کہ گزشتہ روز پاک فوج کے سپہ سالار جنرل قمر جاوید باجوہ نے پاک فضائیہ کی آپریشنل بیس کا دورہ کیا۔ ڈی جی آئی ایس پی آر کے مطابق آرمی چیف نے دونوں ممالک کے افسران اور جوانوں سے ملاقات بھی کی اور پاک فضائیہ کی پیشہ ورانہ مہارت اور حربی صلاحیت کو سراہا۔
مزید پڑھیں : آرمی چیف کا پاک فضائیہ کے آپریشنل بیس کا دورہ
جنرل قمر باجوہ کا کہنا تھا کہ جیو اسٹرٹیجک چیلنجز سے نمٹنے کے لیے پاکستان اور چین کی مشترکہ فوجیں مشقیں اہم ہیں۔ ہ مشقوں سے باہمی اشتراک اور آپریشنل ہم آہنگی میں بہتری آئے گی، انٹر سروسز ہم آہنگی سے آپریشنل کامیابی کو تقویت ملتی ہے۔
