لاہور: وزیراعلیٰ پنجاب سردار عثمان بزدار کی زیرصدارت وزیراعلی آفس میں اجلاس منعقد ہوا،جس میں لاہور ویسٹ مینجمنٹ کمپنی کی کارکردگی اورشہروں میں صفائی کے انتظامات کا جائزہ لیا گیا۔
وزیراعلیٰ نے لاہور اور بڑے شہروں کی صفائی کے موثر انتظامات نہ ہونے پر برہمی کا اظہار کیا اورکارکردگی مزید بہتر بنانے کی ہدایت کی۔ وزیراعلیٰ کی ہدایت پر لاہور میں صفائی کے لئے خصوصی مہم چلائی جائے گی جبکہ اجلاس میں پنجاب بھر میں پولی تھین بیگز پر پابندی لگانے کا فیصلہ کیا گیا۔
وزیراعلی عثمان بزدار نے اجلاس سے خطاب کرتے ہوئے کہا کہ شہروں کی صفائی پر خصوصی توجہ دی جائے ۔رقم دینے کے باوجود کوڑا کرکٹ کا نظر آنا افسوسناک ہے ۔
انہوں نے کہا کہ صفائی کے انتظامات کو بہتر بنانے کےلئے موثر انداز میں کام کیاجائے۔ لاہورکی سڑکوں پر کوڑا کرکٹ کی موجودگی متعلقہ اداروں کی کا رکردگی پر سوالیہ نشان ہے ۔
انہوں نے کہا کہ صفائی کے بارے میں شہریوں میں آگاہی پیدا کرنے کے لئے مہم بھی چلائی جائے اورمجھے نتائج چاہئیں اورصفائی نظر آنی چاہیے۔ کام نہ کرنے والے افسر وں اوراہلکاروں سے بازپرس ہوگی۔
وزیراعلیٰ نے مزید ہدایت کی کہ ویسٹ ٹو انرجی پراجیکٹ پر کام کی رفتار مزید تیز کی جائے۔ وزیراعلیٰ نے صوبائی وزیر بلدیات و قانون راجہ بشارت کی سربراہی میں اعلی سطح کی کمیٹی تشکیل دینے کی ہدایت کی ہے ۔
کمیٹی پولی تھین بیگز پر پابندی لگانے کے حوالے سے جامع سفارشات پیش کرے گی اوراس ضمن میں قانون سازی بھی کی جائے گی۔
