موسم سرما کی آمد کے ساتھ ہی بہت سے طبی مسائل بھی جنم لیتے ہیں جن میں سب سے اہم نزلہ زکام اور جلد پر منفی اثرات کا مرتب ہونا لازمی امر ہے۔
سردیوں میں جلد کی نمی کو برقرار رکھنے کے لیے ضروری ہے کہ اس کا خصوصی خیال رکھا جائے۔
اے آر وائی ڈیجیٹل کے پروگرام گڈ مارننگ پاکستان میں اداکارہ شرمین علی نے اپنی صحت مند اور چمکدار جلد کی حفاظت کے حوالے سے ناظرین کو آگاہ کیا۔
انہوں نے بتایا کہ وہ روزانہ باقاعدگی سے رات کو سونے سے قبل میک اپ صاف کرنے کے بعد چہرہ اچھی طرح دھو کر ’ہائیلورونک ایسڈ‘ لازمی لگاتی ہوں، یہ چیز میری روٹین میں شامل ہے۔
اداکارہ شرمین علی کا کہنا تھا کہ پہلے میں اپنی جلد کی نرمی کو برقرار اور فریش رکھنے کیلئے فروٹ اور سبزیاں کھایا کرتی تھیں لیکن بعض اوقات ایسا لگتا ہے کہ شاید میں اپنی ڈائیٹ سے یہ سب حاصل نہیں کرپارہی تو اس کیلئے ’ہائیلورونک ایسڈ‘ بہترین چیز ہے۔
انہوں نے بتایا کہ اسے منہ دھونے کے بعد گیلی جلد پر لگائیں، یہ ایسڈ بازار میں باآسانی دستیاب ہے۔
جلد کی نمی کیلئے بہترین نسخہ
علاوہ ازیں ماہرین صحت کا کہنا ہے کہ موسم سرما میں جلد کو نرم رکھنے،لکیروں اور جھریوں سے بچانے کے لئے دودھ کا پروٹین کمال کی خاصیت رکھتا ہے۔
اس موسم کے لئے شہد بہترین اور قدرتی موئسچرائزر ہے اور سردی سے متاثر جلد کے لئے اس کا استعمال انتہائی سود مند ہے اور خاص طور پر جلد پر لکیریں اور نشانات وغیرہ اس موسم میں نمایاں ہونے لگیں تو اس وقت شہد کا استعمال بہترین ہوتا ہے۔
خوبصورت اور صاف جلد کیلئے موئسچرائزر کو دن میں 3 بار استعمال کیا کریں، موئسچرائزر کے استعمال کا سب سے بہتر وقت نہانے کے بعد ہے ۔
اس طرح جسم سے نکلنے والا روغن ضائع نہیں ہو پاتا اور وہ جلد ہی میں رہتا ہے جس کی وجہ سے جلد خشک نہیں ہو پاتی اور نرم اور چکنی رہتی ہے۔
