Tag: Cloves

لونگ ایک ایسا مسالہ ہے جو ذائقے سے لے کر علاج تک تقریباً ہر چیز میں استعمال ہوتا ہے، یہ اپنی بیش بہا افادیت کے سبب تمام گرم مسالوں میں نمایاں ہے۔

ہر گھر کے کچن میں موجود گرم مسالے کے طور پر استعمال کی جانے والی لونگ کے بے شمار طبی فوائد ہیں، لونگ کا تیل دانتوں کے درد میں بے حد مفید ہے جبکہ اس کا پانی بنا کر استعمال کرنے کے بھی بہت سے فوائد ہیں۔

یہ ایک قدرتی اینٹی سیپٹک جز ہے جس کے استعمال سے انسانی جسم میں موجود نقصان پہنچانے والے بیکٹیریا کا خاتمہ ہوتا ہے، وزن میں کمی آتی ہے اور گلے میں سوزش اور سوجن میں آرام آتا ہے۔

لونگ اس کا استعمال بہت سے طریقوں یعنی سالن، پلاؤ، بریانی اور اکثر اوقات مسالے والی چائے میں کیا جاتا ہے۔ ماہرین غذائیت کے مطابق لونگ میں وٹامن سی، فائبر، مینگنیز، اینٹی آکسیڈنٹ ایجنٹ اور وٹامن بھرپور مقدار میں پایا جاتا ہے۔

لونگ کا قہوہ صحت کے لیے بہت فائدہ مند ہے۔ اس چائے کو روزانہ پینے سے دانت کا درد ٹھیک ہو جاتا ہے۔ یہی نہیں بلکہ اس کا استعمال وزن کم کرنے میں مدد دیتا ہے اور مدافعتی نظام کو مضبوط کرتا ہے۔ سردیوں میں لونگ کی چائے کے فوائد اور بھی بڑھ جاتے ہیں۔ تو آئیے جانتے ہیں لونگ کی چائے پینے کے کیا فوائد ہیں۔

لونگ کے قہوے سے کون سے طبی فوائد حاصل ہوتے ہیں؟

لونگ کے اینٹی آکسیڈنٹ جز ہونے کے سبب اس کے قہوے کے استعمال سے جسم سے مضرِ صحت اجزاء کا اخراج ہو تا ہے، شوگر کے مریضوں کے لیے یہ نہایت مفید ہے، اس کے استعمال سے شوگر لیول متوازن رہتا ہے۔

لونگ کے قہوے کے فوائد میں سردی میں زکام اور کھانسی سے نجات، قوت مدافعت میں اضافہ، دانت کے درد میں آرام، ہاضمہ کی بہتری اور دیگر شامل ہیں۔

لونگ کے قہوے کے استعمال سے آپ دانتوں کی کئی بیماریوں سے بچ جاتے ہیں۔ لونگ کا قہوہ متلی، الٹی کی کیفیت ہونے کے علاوہ الٹیوں اور معدے کے دیگر مسئلوں میں مفید ثابت ہوتا ہے۔

لونگ اینٹی بیکٹیریل جز ہے اس کے قہوے کے استعمال سے کئی طرح کی الرجی اور موسمی انفیکشن میں افاقہ ہوتا ہے۔

وزن میں کمی کے خواہشمند افراد لونگ کا قہوہ استعما ل کرکے فاضل چربی سے چھٹکارہ پا سکتے ہیں۔ سردیوں میں لونگ کا قہوہ پینے سے موسمی بیماریوں سے نجات ملتی ہے ۔

لونگ کا قہوہ بنانے کا طریقہ:

ہم وزن لونگ، دار چینی اور چھوٹی الائچی کو پیس لیں، ایک کپ پانی ابالیں اور اس میں ایک چائے کا چمچ یہ پاؤڈر شامل کر لیں، پانی مزید ابلنے پر چولہا بند کردیں، اب اسے چھان کر نوش فرمائیں۔ ذائقہ بہتر بنانے کے لیے اس پانی لیموں ک چند قطرے یا شہد بھی شامل کیا جا سکتا ہے۔

چھوٹی الائچی ، دار چینی اور لونگ کے اس پاؤڈر کا استعمال صبح نہار منہ بھی کیا جاسکتا ہے، ایک چائے کا چمچ پھانکنے کے بعد نیم گرم پانی کا گلاس پی لیں۔ اس سفوف کے استعمال سے پیٹ کی چربی کو تیزی سے پگھلنے میں مدد ملے ملتی ہے۔