لاہور : وزیراعلیٰ پنجاب عثمان بزدار نے سی ای او اور صدراے آروائی نیٹ ورک سلمان اقبال کو گوجرانوالہ میں اے آروائی لاگونا کے افتتاح پر مبارکباد دیتے ہوئے کہا امید ہے عالمی سطح کامنصوبہ لاگونا پنجاب میں کامیابی سے ہمکنار ہوگا۔
تفصیلات کے مطابق وزیراعلیٰ پنجاب عثمان بزدار سے سی ای او اور صدراے آروائی نیٹ ورک سلمان اقبال کی ملاقات ہوئی ، ملاقات میں پنجاب میں جاری ترقیاتی کاموں اوربزدارحکومت کے اقدامات پر تبادلہ خیال کیا گیا۔
وزیراعلیٰ عثمان بزدار نے کہا ہے کہ پنجاب میں میگا ڈیولپمنٹ ، ترقیاتی منصوبے شروع کئے ہیں، صرف لاہور کے لئے 6ہزار کروڑ کے 7 ترقیاتی منصوبے شروع کریں گے۔
عثمان بزدار کا کہنا تھا کہ 83 کروڑ کی لاگت سے سیاحتی مراکزکے قریب رابطہ سٹرکوں کا آغاز کررہے ہیں جبکہ وزیراعظم کے ویژن کے مطابق پنجاب کے بڑے شہروں میں ہیلتھ کارڈ دیا جائے گا۔
وزیراعلیٰ پنجاب نے گوجرانوالہ میں اے آروائی لاگونا کے افتتاح پر سلمان اقبال کو مبارکباد دیتے ہوئے کہا امید ہے عالمی سطح کا منصوبہ لاگونا پنجاب میں کامیابی سے ہمکنار ہوگا۔
اس موقع پر سی ای او اور صدراے آروائی نیٹ ورک سلمان اقبال کا کہنا تھا کہ اے آروائی لاگونا عالمی سطح پر سرمایہ کاری کو پاکستان لانے کاباعث بنے گا۔
گذشتہ روز اےآروائی لاگونا اور ڈی ایچ اے نے کراچی میں بھرپور پذیرائی کے بعد اب اےآروائی لاگونا ڈی ایچ اے پنجاب کے وسطی علاقے گوجرانوالہ میں بھی تعمیر کرنے کا اعلان کیا تھا۔
اےآروائی لاگونا ڈی ایچ اے نے گوجرانوالہ میں بیچ ویوسوسائٹی بنائے گا، اس ضمن میں اے آر وائی لاگونا اور ڈی ایچ اے گوجرانوالہ میں مفاہمتی یادداشت پردستخط ہوئے تھے۔
اے آر وائی لاگونا کے چیئرمین سلمان اقبال، پروجیکٹ ڈائریکٹر ڈی ایچ اے بریگیڈیئر عامر کیانی نے مفاہمتی یادداشت پر دستخط کیے تھے، مفاہمتی یادداشت کے تحت ڈی ایچ اے گوجرانوالہ اے آر وائی لاگونا کو پروجیکٹ کے لیے 400 ایکڑ زمین فراہم کرے گا جس پر مصنوعی ساحل اور رہائشی و کمرشل تعمیرات کی جائیں گی۔
