اسلام آباد : خیبر پختونخوا کے وزیر اعلیٰ پرویزخٹک نے کہا ہے کہ ملکی تاریخ میں پہلی مرتبہ بااثر خاندان کا احتساب ہورہا ہے، وقت آگیا ہے کہ ارب پتی چور سلاخوں کےپیچھے جائیں گے۔
یہ بات انہوں نے اسلام آباد میں میڈیا سے گفتگو کرتے ہوئے کیا، پرویزخٹک نے کہا کہ نوازشریف کے بعد اب شہبازشریف کی باری ہے، پاکستان کی ستر سالہ تاریخ میں پہلی مرتبہ بااثر خاندان قانون کے شکنجے میں آیا ہے۔
انہوں نے کہا کہ اس سے پہلے صرف لاکھوں روپے کی چوریاں کرنے والے سلاخوں کے پیچھے جارہے تھے، اب وقت آگیا ہے کہ ارب پتی چور بھی جیلوں کی ہوا کھائیں گے۔
ایک سوال کے جواب میں ان کا کہنا تھا کہ عمران خان نے الیکشن کیلئے نئےانتخابی منشور پرکام شروع کردیا ہے، پوراملک خیبر پختونخوا کی ترقی کو دیکھ کر نظام کی تبدیلی کا نعرہ لگارہا ہے۔
پرویزخٹک کا مزید کہنا تھا کہ وہ وقت دور نہیں جب ملک میں انصاف کابول بالاہوگا اور کرپشن، لوٹ مار کو فل اسٹاپ لگ جائے گا، آصف زرداری، نوازشریف ،اسفندیار ولی اور فضل الرحمان جیسے لوگ عوام کو دھوکا نہیں دے سکتے۔
ان سب نے اپنے اپنے دور حکومت میں تجوریاں بھریں، انہوں نے کہا کہ عمران خان کا اگلا ایجنڈا پاکستانی عوام کے چوری کیے گئے اربوں ڈالر بیرونی ممالک سے واپس لانا ہے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
