کراچی : صوبے میں غیرقانونی بھرتیوں کے حوالے سے متحدہ قومی موومنٹ کی جانب سے سندھ حکومت پر رشوت کے الزامات عائد کیے جانے پر مراد علی شاہ غصے میں آگئے۔
کراچی میں پریس کانفرنس سے خطاب کرتے ہوئے انہوں نے ایم کیو ایم پاکستان کو بھی آڑے ہاتھوں لیا، انہوں نے کہا کہ رشوت لینے والے پر لعنت ہو۔
مراد علی شاہ کا کہنا تھا کہ الزام لگانے والوں سے پوچھا جائے کہ ان کے اپنے ایم پی اے نے کتنی رشوت دے کر نوکری حاصل کی ہے۔
متحدہ رہنماؤں کی جانب سے سندھ حکومت کا موازنہ مودی سرکار سے کرنے پر بھی وزیراعلیٰ برہم ہوئے اور کہا کہ یہ الزام ناقابل قبول ہے کیونکہ یہ ملک دشمنی کے مترادف ہے۔
۔ پریس کانفرنس میں ان کا کہنا تھا کہ نہایت ہی مشکل سے پانچ سال میں سندھ کے لوگوں کی مدد کی کیونکہ اگر دو تین گندی مچھلیاں آجائیں تو پورا تالاب گندا کردیتی ہیں اور یہاں تو کئی گندی مچھلیاں تھیں۔
ایک سوال کے جواب میں انہوں نے کہا کہ پہلی بار جمہوری طریقے سے وزیراعظم کو عہدے سے ہٹایا گیا، شہباز شریف کے وزیراعظم بننے کے بعد صوبے کے وفاق سے تعلقات میں بہتری آئی۔
کراچی : وزیراعلیٰ سندھ مراد علی شاہ نے چین کو کراچی یونیورسٹی واقعہ کی تفتیش میں مدد کی پیشکش کرتے ہوئے کہا چین کے ماہرین مدد کرنا چاہتے ہیں تو خوشی ہوگی۔
تفصیلات کے مطابق وزیراعلیٰ سندھ سید مراد علی شاہ سے چین کے وفد کی ملاقات ہوئی ، ملاقات میں صوبے میں کام کے حوالے سے چینی باشندوں کی سیکیورٹی کے حوالے سے بات چیت ہوئی۔
وزیراعلیٰ سندھ مراد علی شاہ سے چینی وفد نے چین کے قومی دن کی سیکیورٹی کے حوالے اور کراچی یونیورسٹی خودکش حملے سے متعلق بات چیت کی۔
مراد علی شاہ نے کہا کراچی یونیورسٹی واقعہ نےبہت دکھ پہنچایا، واقعہ کی تفتیش جاری ہے، تفتیش میں چین کےماہرین مددکرناچاہتےہیں توخوشی ہوگی۔
چینی وفد نے سی ٹی ڈی اور اسپیشل برانچ کو مضبوط کرنے کیلئے تعاون کی یقین دہانی کرائی۔
یاد رہے جامعہ کراچی کے اندر ایک خاتون نے خود کش دھماکے کے ذریعے چینی باشندوں کی وین کو نشانہ بنایا تھا ، جس کے نتیجے میں 3 چینی باشندوں سمیت 4 افراد ہلاک اور 3 زخمی ہوگئے۔
ترجمان جامعہ کراچی کے مطابق دھماکے میں کنفیوشس انسٹیٹیوٹ کے ڈائریکٹر ہوانگ گیوپنگ سمیت خواتین اساتذہ ڈنگ میوپنگ اور چن سا ہلاک ہوئی جب کہ ایک پاکستانی ڈرائیور خالد بھی مرنے والوں میں شامل ہے۔
بعد ازاں ایک دہشت گرد گروپ نے خودکش حملہ آور لڑکی کی تصویر جاری کرتے ہوئے دھماکے کی ذمہ داری قبول کی تھی۔
کراچی : وزیراعلیٰ سندھ مراد علی شاہ کا کہنا ہے کہ وزیراعظم اپنی کرسی بچانے کے لیے آئین اورسیاست کوداؤ پرلگا رہے ہیں۔
تفصیلات کے مطابق وزیراعلیٰ سندھ مراد علی شاہ نے پریس کانفرنس کرتے ہوئے کہا کہ وزیراعظم اپنی کرسی بچانے کے لیے آئین اور سیاست کوداؤ پر لگارہے ہیں، عمران خان تمہارا کھیل ختم ہوچکا ہے اور اپنی اکثریت کھو چکے ہو۔
وزیراعلیٰ سندھ کا کہنا تھا کہ صدر پاکستان بھی اپنا آئینی فرض نہیں نبھارہے، 172 سے زیادہ ممبران عدم اعتمادمیں ووٹ کریں گے۔
شیخ رشید کے بیان کا حوالہ دیتے ہوئے مراد علی شاہ نے کہا کہ ایک وفاقی وزیرنےکہہ دیامیڈیاکی نوکری پراسکی نظرہے، وہ کل کہہ رہا تھا کہ صدرکی مرضی ہےکہ ایک مہینہ لگادیں۔
ان کا کہنا تھا کہ کل جیسےہی عدم اعتمادکامیاب ہوئی آئین کےمطابق اسی لمحےہی عمران خان وزیراعظم کاعہدہ کھودیں گےکسی نوٹی فکیشن کی ضرورت نہیں ہوگی۔
وزیراعلیٰ سندھ نے کہا کہ جووزیراعظم ہی نہ رہےتواسےعہدہ سنبھالنےکاکیسےکہاجاسکتاہے، صدرکواسی وقت قومی اسمبلی کا اجلاس بلانا ہوگا، ملک مزیدبحرانوں کامتحمل نہیں ہوسکتا۔
ان کا مزید کہنا تھا کہ پہلی بارآئینی طریقہ کارکےتحت وزیراعظم تبدیل ہورہا ہے،ہمیں تو خوش ہونا چاہیے، خوش ہونا چاہیے کہ جسے اکثریت پسند نہیں کررہی اسے آئین کے تحت ہٹا رہے ہیں۔
سندھ ہاوس پر حملے سے متعلق وزیراعلیٰ سندھ نے کہا سندھ ہاؤس میں جوکچھ ہوااس کےخلاف درخواست دی، ان کےایم این اے اور وزیر بے ہودہ باتیں کرتے ہیں، سپریم کورٹ نے کہا سندھ ہاؤس کےحوالےسےدرخواست پرایکشن لیں، ہم چاہتےہیں کیس کومیرٹ پرچلائیں۔
مراد علی شاہ کا کہنا تھا کہ ایسے بیانات نہ دیں جوغداری کامرتکب ٹھہرا دیں، آئین کے مطابق تحریک عدم اعتماد کا مقابلہ کریں، یہ لوگ ہواس باختہ ہوگئے ہیں، بہت کم لوگ عمران خان کو سپورٹ کرتے ہیں۔
ایم کیو ایم سے متعلق انھوں نے کہا کہ ایم کیوایم سے ہماری کافی بات چیت ہوئی، ایم کیوایم کےساتھ صوبےکی ترقی کیلئےکام کرناچاہتےہیں۔
کراچی: وزیراعلیٰ سندھ مرادعلی شاہ کا کہنا ہے کہ جولائی2020 کے بعد سندھ میں پولیو کا کوئی کیس سامنے نہیں آیا، والدین سے اپیل ہے کہ بچوں کو پولیو کے قطرے ضرور پلائیں۔
تفصیلات کے مطابق وزیراعلیٰ سندھ مرادعلی شاہ سوبھراج اسپتال پہنچے ، جہاں انھوں نے بچوں کو پولیوکےقطرے پلاکر پولیومہم کا افتتاح کیا ، اس موقع پروزیرصحت سندھ ڈاکٹرعذرا پیچوہوبھی موجود تھیں۔
افتتاح کے موقع پر وزیراعلیٰ سندھ مرادعلی شاہ نے کہا کہ مہم میں 90 لاکھ بچوں کو پولیو کے قطرے پلائے جائیں گے ، جولائی2020کےبعدسندھ میں پولیو کا کوئی کیس سامنے نہیں آیا۔
مرادعلی شاہ کا کہنا تھا کہ مہم کے دوران 12سال کے بچوں کو کویڈ کی ویکسین بھی دی جائےگی،والدین سے اپیل ہے کہ بچوں کو پولیو کےقطرے ضرور پلائیں ، سب مل کر اس کے خلاف مہم جاری رکھیں گے۔
انھوں نے کہا کہ دنیا بھر میں یہ قطرے پلائے گئے اور یہ وبا ختم ہوئی ہے ، پوری دنیا میں پولیو صرف پاکستان اور افغانستان میں ہے ، پولیو ورکرز کو سلام پیش کرتا ہوں۔
اسلام آباد : وزیراعلیٰ سندھ مراد علی کا کہنا ہے کہ اسلام آباد میں عمارت ریگولرائز ہوسکتی ہے تو نسلہ ٹاورکیوں نہیں؟ نسلہ ٹاور گرانے کے بجائے کوئی اور راستہ نکالا جاسکتا تھا۔
تفصیلات کے مطابق نوری آباد پاور پلانٹ میں مبینہ خورد برد سے متعلق ریفرنس میں پیشی کے موقع پر وزیراعلیٰ سندھ مراد علی شاہ نے میڈیا سے گفتگو کرتے ہوئے کہا تعمیرات کی کسی نے غلط منظوری دی ہے تو اسے سزاملنی چاہیے۔
وزیراعلیٰ سندھ کا کہنا تھا کہ اسلام آباد میں اگرعمارت ریگولرائزہوسکتی ہےتونسلہ ٹاورکیوں نہیں، نسلہ ٹاور گرانے کے بجائے کوئی اور راستہ نکالاجاسکتا تھا، سپریم کورٹ کےحکم کےمطابق نسلہ ٹاورگرارہے ہیں۔
مراد علی شاہ نے کہا کہ عمارتوں کو ریگولرائز کرنے کیلئے ریٹائرڈ جج پرمشتمل کمیشن بنائیں گے، ہم سپریم کورٹ کے حکم پر عملدرآمد کے پابند ہیں ، جب بھی عدالت بلائے گی حاضر ہوں گے۔
ان کا کہنا تھا کہ سندھ حکومت نے 25 ہزار روپے کم ازکم اجرت مقرر کی ہے، سپریم کورٹ نے اس پر بھی اسٹے دے دیا ہے تو ہم حکم کے پابند ہیں۔
لوکل گورنمنٹ بل کے حوالے سے وزیراعلیٰ سندھ نےکہا کہ گورنرسندھ عمران اسماعیل سے کل ملاقات ہوئی، جس میں لوکل گورنمنٹ بل پر کوئی بات نہیں ہوئی تاہم گورنرسندھ سے کہا ہے کہ کوئی آبزرویشن لکھ کر دیں۔
کراچی : وزیر اعلیٰ سندھ مراد علی شاہ نے وفاقی حکومت اور اسٹیبلشمنٹ ڈویژن کو خبردار کرتے ہوئے کہا جھگڑا میرے اور سندھ حکومت کیساتھ ہے ،افسران کو تنگ نہ کریں ، سندھ میں بیٹھے سیاسی یتیموں کے کہنے پر فیڈریشن کےافسران کو شوکاز جاری ہوتے ہیں۔
تفصیلات کے مطابق وزیر اعلیٰ سندھ مراد علی شاہ نے کابینہ اجلاس کے بعد پریس کانفرنس کرتے ہوئے کہا کہ سندھ میں 50فیصد پیداوار کاحصہ دار ہاری ہوتاہے، گندم کی قیمت 2200روپے فی من مقرر کردی ہے، 2200 روپے فی من قیمت کا فائدہ غریب ہاریوں کو ہوگا۔
وزیر اعلیٰ سندھ کا کہنا تھا کہ مردم شماری کے معاملے پر قومی اسمبلی فلور پر غلط بیانی کی گئی، مجھ سے منسوب کرکے کل جوائنٹ سیشن میں غلط بیانی کی گئی ، کچھ ناسمجھ کم عقل لوگ سمجھتے ہیں باربار جھوٹ بول کر حاوی ہوجائیں گے، یہ ناسمجھ لوگ کہتے ہیں کہ وفاق کے افسران کے سندھ حکومت کوروک رکھا ہے۔
مراد علی شاہ نے بتایا کہ افسران کے تبادلے کامعاملہ بھی آج کابینہ میں ڈسکس ہوا، پہلی بات ہے کہ یہ افسران وفاق کے نہیں ہیں، افسران کےمعاملے پر 1954کے قانون کے مطابق صدراور گورنرز کے درمیان معاہدہ ہے، یہ وفاق کے افسران نہیں بلکہ فیڈریشن کے افسران ہیں۔
ان کا کہنا تھا کہ یہ کسی مشاورت پر یقین نہیں کرتے گھر میں بیٹھ کر فیصلے کرتے ہیں، افسران کے معاملے پر مشاورت کرنا ضروری تھی، مجھ سے وزیراعظم خود بات کریں یا اتھارٹیز مقرر کریں۔
وزیراعلیٰ سندھ نے کہا بات جب حد سے بڑھ جاتی ہے تو اس کا جواب دینا ضروری ہوتاہے، پاکستان ایڈمنسٹریٹو سروس کے 4افسران کو نکالا گیا اور4دیئےگئے ، پی ایس پی سے 8افسران نکالے گئے پھر 8افسران دوسرے بھیجے گئے، ہماری کوشش تھی پبلک میں نہ جائیں اور ان سے بات کریں۔
مراد علی شاہ نے تنقید کرتے ہوئے کہا کہ بنی گالہ سےپی ایم ہاؤس تک ہیلی کاپٹرمیں آنےجانےکےعلاوہ کوئی کام خودنہیں کرتے، سارے کام اتھارٹیز کے سپرد کیے ہوئے ہیں۔
ان کا کہنا تھا کہ 20 گریڈ کیلئے ہے کہ 60 فیصد افسران فیڈریشن اور 40 فیصد صوبے کے ہوں گے ، صورتحال کے مطابق ابھی تک ہمارے پاس 39افسران کی کمی ہے۔
وزیراعلیٰ سندھ نے وفاقی حکومت اور اسٹیبلشمنٹ ڈویژن کو خبردار کرتے ہوئے کہا جھگڑا میرے اور سندھ حکومت کیساتھ ہے ،افسران کو تنگ نہ کریں، وفاقی حکومت اور اسٹیبلشمنٹ ڈویژن کو لڑنا ہے تو سندھ کابینہ سے لڑیں۔
مراد علی شاہ کا کہنا تھا کہ یہاں سے سیاسی لوگ لکھ کر بھیجتے ہیں فلاح افسر ہمیں نہیں چاہیے، روٹیشن پالیسی کا بہانہ بناتے ایسی کئی مثالیں موجود ہیں، آپ لوگ سندھ میں گورننس خراب اور حکومت کمزور کرناچاہتے ہیں۔
انھوں نے مزید کہا کہ اسٹیبلشمنٹ ڈویژن کو واضح وارننگ دیتاہوں سیاست میں نہ آئیں، صوبے کی گورننس کی پوری ذمہ داری سندھ حکومت کو ہے، فیڈریشن کے افسران کو ٹارگٹ کرکے سندھ حکومت کی گورننس کو کیسے خراب کرسکتے ہیں۔
وزیراعلیٰ سندھ کا کہنا تھا کہ سندھ میں بیٹھے سیاسی یتیموں کے کہنے پر فیڈریشن کےافسران کو شوکاز جاری ہوتے ہیں، صوبے کا کھاتے ،اسی میں بڑے عہدے پربیٹھتے ہیں اوراسی کی برائی کرتے ہیں، یہ ہر چیز بلڈوز کررہے ہیں کیونکہ انھیں اور کچھ نہیں آتا۔
مراد علی شاہ نے مزید کہا کہ انہوں نےآئینی قوانین کی دھجیاں بکھیردی ہیں، 21گریڈکی کل24پوسٹس ہیں جس میں سے16فیڈریشن نےدینی ہیں، 24میں سے8پوسٹس صوبائی ہیں، عدالت کی طرف سےحکم ہےڈوئل چارجزنہیں دینے۔
کراچی : وزیراعلیٰ سندھ سید مراد علی شاہ کا کہنا ہے کہ ، ہمارے بہت سارے فیصلوں سے اچھے نتائج ملے، آج سندھ میں کوروناکیسز کی شرح 7فیصد جبکہ کراچی میں اب بھی کورونا کیسز کی شرح 10فیصد ہے۔
تفصیلات کے مطابق وزیراعلیٰ سندھ سید مراد علی شاہ کراچی یونیورسٹی پہنچنے تو وی سی، کمشنرکراچی اورافسران نے ان کا استقبال کیا، مراد علی شاہ نے کراچی یونیورسٹی میں سائنسی نمائش کاافتتاح کیا۔
اس موقع پر وزیراعلیٰ سندھ نے نمائش کی افتتاحی تقریب سےخطاب کرتے ہوئے کہا کہ ٹیکنالوجی اب تمام مسائل کا حل نکالنےکی صلاحیت رکھتی ہے، ہمارے بہت سارے فیصلوں سے اچھے نتائج ملے، آج سندھ میں کوروناکیسز کی شرح 7فیصد جبکہ کراچی میں اب بھی کوروناکیسزکی شرح 10فیصد ہے۔
مراد علی شاہ کا کہنا تھا کہ ہم 20ہزارکوویڈ ٹیسٹ روزانہ کر رہے ہیں، کبھی 1000 ٹیسٹ کرنے کا سوچنا بھی مشکل تھا، پبلک پرائیویٹ پارٹنرشپ سے ٹیکنالوجی،تعلیم میں بہت ترقی کرسکتے ہیں۔
انھوں نے مزید کہا کہ آج صحت سے منسوب نمائش منعقد کی گئی ہے ، نمائش بھی ٹیکنالوجی کی کامیابی کا منہ بولتا ثبوت ہے، ٹیکنالوجی کی مدد سے کوویڈ پر قابو پایا، صحت کی بہتری کے لیے ٹیکنالوجی کی مدد لی جا رہی ہے، ایک بچے کو ربوٹک بازو لگایا گیا ہے۔
کراچی : وزیراعلیٰ سندھ مراد علی شاہ نے خطرے کی گھنٹی بجاتے ہوئے کہا ہے کہ کورونا کیسز بڑھنے کی وجہ سے ہمارے اسپتالوں میں گنجائش ختم ہوچکی ہے۔
تفصیلات کے مطابق جہاں پاکستان میں کورونا کے مثبت کیسز کی شرح میں کمی آرہی ہیں ، وہیں سندھ میں کورونا کیسز میں مسلسل اضافہ ریکارڈ کیا جارہا ہے۔
اس حوالے سے وزیر اعلیٰ سندھ نے نیشنل کوآرڈی نیشن کمیٹی کو بتایا کہ سندھ میں کیسز بڑھ رہے ہیں اور نئےکیسزکی وجہ سےاسپتالوں پردباؤہے، ہمارے اسپتال،خاص طورپرپرائیویٹ اسپتال بھرچکےہیں۔
وزیراعلیٰ سندھ کا کہنا تھا کہ ہمارےکورونااسپتال میں بھی گنجائش ختم ہوچکی ہے ، ایکسپوسینٹر80فیصدبھرچکاہے، نئےمریض سول،جےپی ایم سی اورلیاری میں داخل کررہےہیں۔
مراد علی شاہ نے مزید بتایا کہ کراچی میں 10.22 فیصد کوروناکیسز، حیدرآبادمیں 9.21فیصد اور باقی شہروں میں 3.68 فیصد کیسزہیں۔
کورونا ویکسی نیشن کے حوالے سے مراد علی شاہ نے کہا کورونا ویکسی نیشن میں ہم وفاق کی پالیسی پرعمل پیراہیں، سندھ میں روزانہ70ہزارویکسی نیشن لگ رہی ہیں، روزانہ2 لاکھ ویکسین کاہدف پوراکرناچاہتےہیں، موبائل سسٹم بنایا جس سےروزانہ1لاکھ ویکسی نیشن لگیں گی۔
دوسری جانب ڈاکٹر قیصر سجاد نے اے آر وائی نیوز کے پروگرام باخبر سویرا میں گفتگو کرتے ہوئے کہا پاکستان میں زیادہ تر کیسز برطانوی ویرینٹ کے ہیں اور یہ خطرہ بھی تھا کہ بھارتی کورونا وائرس ملک میں موجود تو نہیں لیکن اللہ کا شکر ہے اسلام آباد اور کراچی میں بروقت بھارتی کورونا وائرس کی تشخیص ہوئی ہے۔
کیسز کے حوالے سے ان کا کہنا تھا کہ کورونا کی تیسری لہر کے آغاز میں پنجاب میں بہت زیادہ کیسزسامنے آئےجبکہ اس وقت سندھ میں کیسز کم تھے ، لیکن اب سندھ میں کیسز میں اضافہ ہورہا ہے، لوگ جتنی جلدی ویکسینیٹ ہوں گے ، اتنی جلدی ساری چیزیں کھول دی جائیں گی۔
خیال رہے این سی او سی کے سربراہ اسد عمر کا کہنا تھا کہ مجموعی طور پر ملک بھر میں کورونا وبا کے پھیلاؤ میں کمی نظر آرہی ہے لیکن سندھ میں کورونا کا پھیلاؤ زیادہ ہے ، اس لئے احتیاط زیادہ کرنی ہوگی۔
انہوں نے کہا تھا کہ کورونا سے بچاؤ کا واحد حل ویکسینیشن ہے، ہمیں ویکسینیشن پر زیادہ توجہ دینا ہے، مجموعی طور پر اب تک 70 لاکھ سے زائد ویکسینیشن ہوچکی ہے، رواں سال کے آخر تک 7 کروڑ تک ویکسینیشن چاہتے ہیں، چاہتے ہیں عید سے پہلے ایسی صورت حال پر پہنچیں کہ بندشیں نہ کرنا پڑیں۔
کراچی : وزیر داخلہ شیخ رشید نے وزیراعلیٰ سندھ سے ملاقات میں کہا امن و امان سندھ حکومت کی ذمہ داری ہے، سندھ حکومت کو چاہئے ہم مدد کرنے کے لئے تیار ہیں۔
تفصیلات کے مطابق وفاقی وزیرداخلہ شیخ رشید کی وزیراعلیٰ سندھ مراد علی شاہ سے ملاقات ہوئی ، ملاقات میں آئی جی سندھ ، چیف سیکریٹری، وفاقی سیکریٹری داخلہ یوسف نسیم موجود تھے۔
ملاقات میں شکارپور میں ڈاکوؤں کی حالیہ کارروائیوں پر تبادلہ خیال کیا گیا ، وزیراعلیٰ سندھ مرادعلی شاہ نے کہا کہ پاکستان خطرناک ممالک کی فہرست میں چھٹے نمبرپرتھااب126پرہے، پہلے سندھ میں لوگ قافلے کی شکل میں سفرکرتےتھے، 2007میں پی پی حکومت نے گرینڈ آپریشن کرکے ہائی ویزکلیئر کرایا۔
مراد علی شاہ کا کہنا تھا کہ کراچی میں بھی امن و امان اتنا خراب تھا کہ نو گو ایریا بن گئے تھے، پوراسندھ گڈوسےکوٹڑی بیراج تک کچا ایریا ہے،صرف 6کلومیٹرز جنگل ہے، کشمور بارڈرپنجاب،بلوچستان ،سندھ کےبارڈرزکوملاتاہے۔
انھوں نے بتایا کہ 23مئی کو پولیس نے 8 مغویوں کو شکارپور کے کچے سے بازیاب کرایا، اے پی سیز خراب ہونےکے باعث ڈاکوؤں نے حملہ کیا، 2اہلکار شہید ہوئے۔
وزیراعلیٰ سندھ نے شیخ رشید سے مکالمے میں کہا آپ وزیر داخلہ ہیں، آپ جب بھی چاہیں آجائیں، ہم مل کر کام کریں گے، آپ کو سندھ میں ویلکم کرتے ہیں۔
وزیرداخلہ شیخ رشید نے کہا کسی بھی چیز کی ضرورت پڑے وزارت داخلہ مہیا کرےگی، رینجرز حاضر ہے جب چاہےسندھ حکومت آپریشن میں خدمات لے سکتی ہے۔
مرادعلی شاہ کا کہنا تھا کہ کچھ حساس سازوسامان کابندوبست سندھ حکومت کررہی ہے، ان سازوسامان کےحصول میں وزارت داخلہ مدد کرے، ہم جلد کچے کے ایریا سے ڈاکوؤں کا صفایا کردیں گے۔
شیخ رشید نے کہا امن و امان سندھ حکومت کی ذمہ داری ہے، سندھ حکومت کو چاہئے ہم مدد کرنے کے لئے تیار ہیں، ڈاکوؤں کے خلاف دہشت گردی کے کیسز درج کرائے جائیں۔
کراچی : وزیراعلیٰ سندھ مراد علی شاہ نے حیدرآباد اور شرقی کراچی میں مزید سخت اقدامات کرنے کا فیصلہ کرتے ہوئےپولیس اور کمشنرکراچی کوہدایت کہ سختی سےایس اوپیزپرعمل کرائیں۔
تفصیلات کے مطابق وزیراعلیٰ سندھ مراد علی شاہ کی زیرصدارت کورونا وائرس ٹاسک فورس کااجلاس ہوا، اجلاس میں بریفنگ دیتے ہوئے بتایا گیا کہ سندھ میں کوروناکیسز5.4 فیصد ، صحتیابی کی شرح93 فیصد اور شرح اموات 1.6 فیصد ہے جبکہ اپریل میں کوروناکے154 مریض انتقال کرگئے۔
وزیراعلیٰ سندھ نے پولیس اور کمشنرکراچی کوہدایت کی کہ ایس او پیز کی خلاف ورزی ہورہی ہے، سختی سےایس اوپیزپرعمل کرائیں اور ایس اوپیزپرعمل کرانےکیلئےوزراشہرکادورہ کریں۔
وزیراعلیٰ سندھ نے حیدرآباد اور شرقی کراچی میں مزید سخت اقدامات کرنے کا فیصلہ کرلیا۔
یاد رہے پاکستان میں کرونا وائرس کی وبا کی تیسری لہر ہلاکت خیز ثابت ہو رہی ہے، گزشتہ چوبیس گھنٹوں کے دوران مزید 79 مریض انتقال کر گئےٟ، جس کے بعد اموات کی مجموعی تعداد بڑھ کر 18 ہزار 149 ہوگئی ہے۔
این سی او سی کا کہنا ہے کہ گزشتہ 24 گھنٹوں کے دوران کرونا کے 45 ہزار 954 ٹیسٹ کیے گئے، جن میں سے مثبت آنے والے کیسز کی تعداد 4 ہزار 213 رہی، جب کہ کرونا کے ٹیسٹ مثبت آنے کی شرح 9.16 فی صد رہی۔
کرونا وائرس سے سب زیادہ متاثرہ صوبہ پنجاب ہے جہاں کیسز کی تعداد 3 لاکھ 6 ہزار 929 ہو چکی ہے جبکہ صوبہ سندھ میں کیسز کی تعداد 2 لاکھ 85 ہزار 626 ہے۔
