لاہور: وزیراعلیٰ پنجاب عثمان بزدار نے کہا ہے کہ صوبائی اراکین اسمبلی میرے دست وبازو ہیں، پنجاب اب تحریک انصاف کا قلعہ بن چکا ہے۔
ان خیالات کا اظہار انہوں نے پی ٹی آئی صوبائی پارلیمانی پارٹی کے اجلاس سے خطاب کرتے ہوئے کیا، عثمان بزدار کا کہنا تھا کہ اراکین اسمبلی سے ملاقاتوں کا سلسلہ جاری رہے گا۔
انہوں نے کہا کہ اراکین اسمبلی میرے دست وبازو ہیں، یہ صوبہ اب پی ٹی آئی کا گڑھ بن چکا ہے۔
وزیر اعلیٰ پنجاب کا مزید کہنا تھا کہ شہزاد وسیم ہمارے سینیٹ کی نشست کے لیے امیدوار ہیں، شہزاد وسیم کو بھرپور طریقے سے کامیاب کرائیں گے۔
پہلے بڑے مگر مچھوں پر ہاتھ ڈالا جارہا ہے، وزیراعلیٰ پنجاب عثمان بزدار
خیال رہے کہ دو روز قبل وزیراعلیٰ پنجاب عثمان بزدار کی زیرصدارت سرگودھا کے اراکین صوبائی اسمبلی کا اجلاس ہوا تھا، اجلاس میں سینیٹ الیکشن میں پی ٹی آئی امیدوار شہزاد وسیم کی کامیابی کے لیے حکمت عملی پر غور کیا گیا تھا۔
اس دوران فلاح عامہ کے کاموں، ترقیاتی منصوبوں اور مسائل کے حل سے متعلق بھی تبادلہ خیال کیا گیا تھا۔
اس موقع پر عثمان بزدار نے کہا تھا کہ کہ وزیر اعظم عمران خان نے تبدیلی کا عمل اپنی ذات سے شروع کیا، کرپشن ملک کے لئے ناسور ہے، اسے ختم کرکے رہیں گے، پہلے بڑے مگر مچھوں پر ہاتھ ڈالا جارہا ہے۔
